غزو الاستثمارات البرازيلية للسوق المصري.. انتهاء أزمة الدولار وتحقيق الجنيه المصري مكاسب غير مسبوقة.. محطة "تحيا مصر 1" تغير خريطة التجارة الدولية
منصات بانكير قدمت النهاردة عدد من التقارير والتحليلات الخاصة في الشأن الاقتصادي والمالي المصري.. والبداية بتقرير عن غزو الاستثمارات البرازيلية للسوق المصري.
قال التقرير، إن الرئيس الأمريكي دونالد ترامب رجع يعمل قلق جديد في السوق العالمي بعد ما أعلن عن فرض رسوم جمركية جديدة علي دولتين بيعتبروا من أكبر الدول المصدرة للسوق الامريكي وهما البرازيل واللي أكثر من 75% من صادراتها موجه للسوق الأمريكي وكندا.
وأضاف التقرير، أن مصر هتقدر تستفاد من الرسوم الجمركية الأمريكية، لأن الفترة اللي فاتت الحكومة قدمت تسهيلات غير مسبوقة لدخول الاستثمارات الاجنبيه للسوق المصري، والتسهيلات دي كانت عبارة عن تسهيلات في إجراءات تخصيص الأراضي اللازمة لبناء واقامة المشروعات والمصانع المختلفة وكمان تسهيلات في إجراءات الحصول علي التراخيص اللازمة للبناء والتشغيل.
وأوضح تقرير بانكير، أن الرسوم الجمركية دي بتلعب دور مهم جدا، وبتكون سبب اساسي في توجيه المستثمرين لقطاعات معينة داخل الدولة واي مستثمر أجنبي لما بيفكر في دخول سوق جديد بيسأل نفسه هل الأفضل اني أصدر منتجاتي في دول بتفرض رسوم جمركية كبيرة ولا بتقدم تسهيلات كبيرة للمستثمرين خصوصا أن ارتفاع الرسوم على السلع المستوردة بيضاعف التكلفة علي المستهلك وبالتالي حركة البيع بتقل جدا وده بيخلي المستثمرين يوجهوا استثماراتهم لاسواق تانية.
وأشار التقرير إلى أن الفترة اللي فاتت كمان الحكومة المصرية قدمت تسهيلات كتيرة جدا لجذب المستثمرين الأجانب للسوق المصري وبالتالي السوق المصري مرشح وبقوة لاستقبال استثمارات برازيلية جديدة جديدة في الفترة اللي جاية خصوصاً أن مصر دلوقتي عضو في تكتل بريكس.
منصات بانكير قدمت تقرير مختلف النهاردة عن انتهاء أزمة الدولار وتحقيق الجنيه المصري مكاسب غير مسبوقة.
كشف تقرير بانكير، أنه من فترات طويلة والحكومة أعلنت عن بدء بناء برنامج اقتصادي مرن لمصر يكون قادر على مواجهة كل الصدمات وده بيحصل فعلا بالتعاون مع عدد كبير من الجهات والمكاتب الاستشارية في العالم، وكانت نتيجة الجهود اللي قامت بيها الدولة هو التحسن اللي حصل في أسعار صرف الجنيه المصري قدام العملات الأجنبية وده اللي خلي الدولار الأمريكي يعاود ويحقق خسائر جديدة في سوق الصرف ويكسر حاجز ال 50 جنيه.
وأضاف التقرير، أن المكاسب اللي حققها الجنية المصري هيا نتيجة الجهود اللي قامت بيها الحكومة لتحسين مصادر الدخل الدولاري لمصر في الخارج وفتح ابواب جديدة للدخل الدولاري، وده في ظل ظروف هيا الاكثر صعوبة علي مصر من فترات طويلة بسبب التحديات والتوترات الجيوسياسية والاقتصادية واللي لها التأثير السلبي الاكثر علي مصر واللي أثرت علي أهم مصدرين للدخل القومي المصري وهيا قناة السويس واللي إيراداتها انخفضت باكثر من 70% عن الإيرادات اللي كانت بتحققها القناة في السنين اللي فاتت ووصلت إجمالي الخسائر لأكثر من 7 مليون دولار.
وأوضح التقرير، أن التحسن الحالي في سعر صرف الجنية المصري له اكثر من سبب أولهم ارتفاع الاحتياطي النقدي الأجنبي في البنك المركزي وزيادة تدفقات الاستثمار الأجنبي المباشر ونمو الصادرات وانخفاض الواردات وتحسن إيرادات السياحة وقناة السويس وتراجع معدلات التضخم وقرب الانتهاء من برنامج الإصلاح الاقتصادي بالتعاون مع صندوق النقد الدولي.
وحدة أبحاث بانكير قدمت تقرير خاص النهاردة عن محطة "تحيا مصر 1" اللي هتغير خريطة التجارة الدولية.
أكد تقرير بانكير، أن الحكومة المصرية ماشية بخطوات ثابتة وناجحة جدا، أنها تقوي الاقتصاد بكل الطرق الممكنة، وده في ضمن خطتها القومية لتطوير المواني وتحويل مصر إلى مركز لوجستي عالمي، وده من أول ما اشتغلت على تنفيذ مشروع إنشاء محطة "تحيا مصر 1"، وده بيعتبر من أضخم مشروعات النقل البحري في المنطقة.
وأوضح التقرير، أن المحطة دي في دمياط، واللي هتكون على مساحة 273 ألف متر مربع، اتحفرت في ميناء دمياط، واللي بتُعتبر واحدة من أكبر المحطات متعددة الأغراض في الشرق الأوسط.. وده مش كلام إعلام، ده كلام أرقام.
وكشف التقرير، أن المشروع ده بيشتغل عليه تحالف عالمي ضخم اسمه "دمياط أليانس"، وده بيضم شركات تقيلة من ألمانيا وإيطاليا وأكبر خطوط الشحن في العالم زي "هاباج لويد"، والشركة المسؤولة عن التشغيل بدأت فعلاً تشتغل على البنية الفوقية، يعني التجهيزات اللي فوق الأرض، وده معناه إن المشروع داخل على الجد جدًا!
وأشار التقرير إلى أن المحطة استقبلت لحد دلوقتي 12 ونش رصيف عملاق من الصين من شركة HHMC، واللي تعتبر من أحدث الأوناش في العالم.. الونش الواحد يقدر يشيل 75 طن، وطول دراعه 72 متر، وبيشتغل على ارتفاع يوصل لـ 57.5 متر!.. يعني ببساطة، يقدر يتعامل مع سفن حاويات ضخمة جداً، فيها لحد 11 دور حاويات فوق بعض!
واستعرض تقرير بانكير، مميزات محطة "تحيا مصر 1"، أبرزها أن رصيفها طوله 1970 متر، وعمقه 18 متر، ومعاه ساحة ضخمة ورا بمساحة 922 ألف متر مربع، يعني طاقة استيعابية توصل لـ 3.5 مليون حاوية في السنة!
