3.4 مليار دولار.. شوف سر الارتفاع التاريخي في تحويلات المصريين بالخارج
يا ترى إيه اللي حصل خلا تحويلات المصريين في الخارج توصل لأعلى رقم في تاريخها في شهر مايو، وإزاي الرقم ده ممكن يفرق في الاقتصاد المصري؟
البنك المركزي المصري أعلن إن تحويلات المصريين العاملين بالخارج وصلت في شهر مايو 2025 ل 3.4 مليار دولار، وده رقم عمره ما حصل في نفس الشهر في أي سنة قبل كده.
والأهم من كده، إن الرقم ده بيمثل زيادة بنسبة 24.2% عن نفس الشهر السنة اللي فاتت، وده كده على مستوى الشهر، طيب على مستوى السنة؟
من يناير لمايو 2025، يعني في أول 5 شهور من السنة، المصريين بره بعتوا حوالي 15.8 مليار دولار، وده مقارنة ب9.9 مليار في نفس الفترة من السنة اللي فاتت، يعني إحنا بنتكلم عن زيادة ضخمة بنسبة 59%.
ولو بصينا على السنة المالية من يوليو 2024 لحد مايو 2025، هنلاقي إن التحويلات وصلت ل 32.8 مليار دولار، مقارنة ب19.4 مليار في نفس الفترة من السنة اللي فاتت، يعني زيادة بنسبة تقريبًا 70%.
طيب، إيه سر الطفرة دي؟
بص يا سيدي، في كذا عامل وراء الزيادة دي، اولهم هو تحسن سعر الصرف في مصر، لان ده خلا الناس تحب تبعت فلوس أكتر عشان يستفيدوا من فرق العملة، وتأتي حاجة هي زيادة عدد المصريين العاملين بره خاصة في دول الخليج، بعد تحسن أوضاع العمل هناك في قطاعات زي الإنشاءات والخدمات.
تالت حاجة بقؤ، هي ثقة المصريين في النظام المصرفي المحلي، ودي نقطة مهمة، لما المغترب يحس إن الفلوس بتوصل بسرعة وأمان وبيستفيد منها، بيشجعه يبعت أكتر، وفوق كل ده العائد العالي على شهادات الاستثمار داخل مصر، زي شهادة ال27% من البنك الأهلي اللي خلت كتير من المصريين في الخارج يحولوا فلوسهم ويستثمروا فيها.
طب إيه فايدة الرقم الكبير ده للاقتصاد المصري؟
أول حاجة، هي ان التحويلات دي بتعتبر مصدر مهم جدا للعملة الصعبة، يعني بتزود احتياطي البنك المركزي من الدولار، وده بيساعد في استيراد السلع وسداد الالتزامات الدولية وكمان بيدعم الجنيه المصري.
تاني حاجة، هي ان التحويلات بتدخل بشكل مباشر في الاقتصاد، يعني أهل المغتربين بيصرفوا، يشتري بيت أو يفتح مشروع، فده بيحرك السوق ويوفر فرص شغل.
وثالث حاجة، هي إن لما الرقم ده يفضل يكبر بيدي ثقة للمستثمرين الأجانب، لأن تحويلات المصريين تعتبر مؤشر على قوة الروابط الاقتصادية والاجتماعية ما بين الداخل والخارج.
والخلاصة، هي إن المصريين في الخارج بيثبتوا كل يوم إنهم ركيزة أساسية للاقتصاد، وتحويلاتهم مش بس فلوس، دي شرايين بتضخ حياة في السوق، وكل دولار بيتحول من بره، بيحرك عجلة الاقتصاد جوه.
