مفاجأة في سوق الدهب.. شركات صينية تضخ استثمارات في مصر.. 15.6 مليار دولار تمويلات تنموية للقطاع الخاص
رصدت بانكير، خلال الساعات الأخيرة، عدد من الملفات على الساحة المحلية والعالمية، التي تم نشرها عبر منصاتها المختلفة، والتي يأتي من أبرزها، مفاجأة في سوق الدهب، وشركات صينية تضخ استثمارت في مصر، و15.6 مليار دولار تمويلات تنموية للقطاع الخاص.
نبدأ من سوق الدهب... النهاردة أسعار الدهب نزلت بشكل ملحوظ في السوق المصري، وده حصل بعد ما الناس بدأت تبيع وتحقق أرباح، خصوصًا بعد ما الدهب وصل لأعلى سعر ليه من 5 أسابيع، وكمان عشان الناس برا بدأت ترجع للمخاطرة شوية وتبعد عن الدهب كملاذ آمن، حسب تقرير من منصة «آي صاغة».
سعيد إمبابي، المدير التنفيذي للمنصة، قال إن جرام عيار 21 نزل حوالي 30 جنيه، وبقى بـ4650 جنيه، وكمان الأوقية العالمية خسرت حوالي 25 دولار وبقت بـ3365 دولار.
أما بقى باقي الأعيرة:
عيار 24 بـ5314 جنيه.
عيار 18 بـ3986 جنيه.
عيار 14 بـ3100 جنيه.
الجنيه الدهب بـ37200 جنيه.
امبارح كمان الأسعار كانت نازلة، وجرام 21 فتح على 4710 جنيه وأقفل على 4680، والأوقية نزلت من 3432 لـ3390 دولار.
نروح بقى لقناة السويس...
وليد جمال الدين، رئيس الهيئة الاقتصادية لقناة السويس، وقّع 3 عقود لمشروعات صناعية جديدة في مجال الملابس والمنسوجات.
اتنين من العقود دول مع شركة صينية اسمها “شاندونغ صن شل”، والتالت مع شركة “زيجيانج شارمينج”، وكلهم هيشتغلوا في منطقة القنطرة غرب الصناعية.
إجمالي استثمارات المشروعات دي حوالي 65.5 مليون دولار (يعني تقريبًا 3.2 مليار جنيه)، وكلها بتمويل ذاتي، وهيخلقوا حوالي 6 آلاف فرصة شغل مباشرة، و90% من الإنتاج هيتصدر للأسواق بره.
الصفقات دي جزء من جولة ترويجية بتعملها الهيئة في الصين، عشان تجيب استثمارات أجنبية أكتر.
ونروح لرانيا المشاط...
وزيرة التخطيط والتنمية الاقتصادية عقدت اجتماع مهم مع باميلا كوك-هاميلتون، مديرة مركز التجارة الدولية التابع للأمم المتحدة، خلال مؤتمر في جنوب أفريقيا عن المشروعات الصغيرة والمتوسطة.
«المشاط» استعرضت تقرير التمويل التنموي اللي أطلقته الوزارة مؤخرًا، واللي بيكشف إن مصر وفرت تمويل ودعم فني للقطاع الخاص بقيمة 15.6 مليار دولار من سنة 2020 لحد مايو 2025، وده خدم مشاريع صغيرة ومتوسطة في مجالات زي الزراعة، والصناعة، والطاقة، والخدمات الرقمية.
ونختم من الروبيكي...
وزارة الصناعة أعلنت عن تسهيلات قوية جدًا من شركة القاهرة للاستثمار في الطرح التاني لـ36 مصنع جاهز بالكامل لإنتاج الجلود في المرحلة التالتة بمدينة الجلود بالروبيكي، واللي بتعتبر أول مدينة صناعية متخصصة من نوعها في الشرق الأوسط وأفريقيا.
المصانع هناك بتبدأ مساحتها من 121 متر مربع لحد 2000 متر، والارتفاعات بتوصل لـ10 متر، وكمان ممكن المستثمر يقدّم على أكتر من وحدة ويجمعهم حسب احتياجه.
المصانع جهزت بالكامل، وجاهزة للإنتاج، والبنية التحتية موجودة من أولها لآخرها، وكمان في خدمات للتدريب والتسويق وتنظيم معارض داخلية وخارجية.
