لو خايف على فلوسك.. إزاي تتجنب النصب في الاستثمار أو القروض؟
عمرك سمعت عن حد استثمر فلوسه وخسر كل حاجة؟.. طب سألت نفسك إزاي حصل كده؟ وإزاي ممكن أنت كمان تقع في نفس الفخ؟.. طب قالك قبل كده "هات ألف جنيه وهنرجعهملك 5 خلال شهر"؟.. وليه فيه ناس كتير بتقع في فخ القروض الوهمية؟
لو جالك حد بيقولك تعالى استثمر معانا، أو خد قرض من غير ورق، أو نرجعلك أضعاف الفلوس في وقت قصير، لازم تفكر كويس جدا قبل ما تدفع أو تمضي على أي حاجة، لأنك كده داخل على مشروع نصب كبير هيخليك تخسر فيه كل فلوسك.
إهدى وركز معايا كده وفكر في كلامي، ولازم تركز أوي في الكام نقطة دول، ودول هينقذوك من أي فخ ممكن يتعملك.. طب إزاي هتعرف أنه فخ؟
أول حاجة، لما حد يقولك المكسب مضمون 100%، لازم تهرب فورًا، لأن مفيش حاجة مكسبها مضمون، حتى البنك بيقولك عائد متغير أو ثابت، فلو قالك هتاخد 50% في الشهر يبقى أكيد بيضحك عليك.
تاني حاجة، لازم تسأل على التراخيص، لو شركة بتدعي أنها استثمارية، لازم يكون عندها سجل تجاري وبطاقة ضريبية، وتكون مرخصة من هيئة الرقابة المالية.. مفيش تراخيص يبقى شكرًا، واهرب برضه وماتدفعش ولا مليم.
تالت حاجة، القروض اللي من اغير ضمان ولا ورق واللي منتشرة على السوشيال ميديا مؤخرا، غالبا كلها فخ، لأن ناس كتير بيقولولك "خد قرض ببطاقتك بس"، وبعد كده يطلبوا منك رسوم أو مصاريف قبل ما تشوف أي فلوس، وده نصب صريح، لأن مفيش حد عاقل هيروح يرمي فلوسه في الأرض من غير أي ضمانات.
المهم بقى أنك لازم تسأل الناس وتبحث على الإنترنت، وشوف الناس بتقول إيه عن الشركة أو الشخص ده، ولو لقيت شكاوى كتير أو محدش سمع عنه؟ خليك بعيد.
مش بس وكده، أنا هديك أهم نصيحة، وهي أنك متحطش كل فلوسك في مكان واحد، يعني لو قررت تجرب، حط جزء صغير من فلوسك، مش كله، وخد بالك لو قالك "متقولش لحد"، لأنك ساعتها هتعرف أنك داخل على مصيدة.
الخلاصة.. لو العرض حلو قوي لدرجة إنه مش طبيعي، يبقى غالبًا هو فعلًا مش طبيعي.. لازم تسأل وتدور وتتأكد كويس جدا قبل ما تدفع أو تمضي على أي حاجة، لأن معروفة كل ما الظروف بقت صعبة، حالات النصب بتبقى كتير جدا!
