عودة 9 مليارات دولار.. إيه اللي بيحصل في قناة السويس؟
يا ترى رجوع قناة السويس للحياة من تاني هيساهم إزاي في تحسن الاقتصاد المصري؟.. وهل تفتكروا التطوير اللي بيحصل فيالقناة كفاية؟.. ولا لسه محتاجين نقف على حاجات أكتر؟.. وهل ممكن نشوف مشروعات استثمارية جديدة حوالين المجرى الملاحي؟
بعد فترة كانت الملاحة في قناة السويس متأثرة شوية بسبب التوترات حوالينا، واللي كان ليه تأثير كبير على حركة السفن، قناة السويس بترجع تاني تقف على رجليها أقوى من الأول كمان.
يعني في آخر كام أسبوع، شفنا أعداد السفن اللي بتمر رجعت تزيد، والعائدات بتتحسن واحدة واحدة، وده مش من فراغ.. هيئة قناة السويس اشتغلت على خطط بديلة، واستراتيجية مرنة، وقدرت تحافظ على العملاء وتفتح خطوط تواصل مع شركات الملاحة الكبرى، عشان تضمن إن القناة تفضل دايمًا في الصورة، وتفضل دايمًا "الطريق الأقصر والأأمن".
كمان متنساش أن قناة السويس مش بس ممر مائي، دي شريان حياة للاقتصاد المصري، وكل ما القناة ترجع تنبض بالحركة، كلنا بنحس الفرق في العملة الصعبة، في الشغل، وفي الاستثمار، وكلنا شايفين فيه تحسن في الجنيه المصري وبيقوى واحدة واحدة.
مش بس كده، ده الفريق أسامة ربيع، رئيس هيئة قناة السويس، طلع وطن المصريين، وقال بكل وضوح إن القناة لسه محافظة على مكانتها، ولسه هي الممر الملاحي اللي العالم كله ميقدرش يستغنى عنه في التجارة.
وأكد كمان إن رغم كل اللي بيحصل حوالينا من تحديات جيوسياسية ومشاكل في البحر الأحمر، حركة الملاحة في القناة هترجع لطبيعتها بالكامل قبل ما السنة دي تخلص إن شاء الله.
كمان قال إن في تقارير دولية اتكلمت عن مرونة قناة السويس، وقالت إنها قدرت تصمد قدام الأزمات والاضطرابات لمدة سنتين تقريبًا، وده بيأكد إن القناة لسه هي الخيار الأأمن والأكفأ لشحن البضايع على مستوى العالم.
كمان قال إن الهيئة مش قاعدة تتفرج، لأ، اشتغلوا على سياسة اسمها "الأبواب المفتوحة"، يعني تواصل مستمر مع كل عملاء القناة، وعشان كده دخلوا 8 خدمات جديدة تدعم السفن وتسهل عليهم، وده ساعد بشكل كبير إن الثقة الدولية في القناة تفضل قوية ومكانتها تفضل ثابتة.
الخلاصة، أن رغم كل المشاكل اللي بتحصل حوالينا في البحر الأحمر والمنطقة، قناة السويس لسه واقفة على رجليها، ولسه العالم بيعتمد عليها بشكل كبير في حركة التجارة والشحن، وده هيخلينا نركب لمكاسب سنة 2023 لما القناة حققت إيرادات قياسية وصلت لـ 9.4 مليار دولار، وده أعلى رقم في تاريخها، وفي بعض الشهور، القناة كانت بتدخل أكتر من 800 مليون دولار في الشهر الواحد.
