تحويل الصحراء لمنابع الذهب.. خطة الحكومة لتأمين الصيف بالغاز الطبيعي.. تمويل 51 ألف مشروع بـ2.2 مليار جنيه
متابعينا الكرام في كل مكان أهلا وسهلا بكم ونرصد أهم التقارير اللي قدمتها وحدة أبحاث بانكير على مدار الساعة.
منصات بانكير قدمت خلال الساعات الماضية عدد من التقارير والتحليلات الخاصة في الشأن الاقتصادي والمالي المصري.
البداية بتقرير عن تحويل الصحراء لمنابع الذهب وقال تقرير بانكير، إن الحكومة في الفترة الرئاسية الجديدة رسمت خطط أنها تعظم إيرادات واحدة من القطاعات المهمة اللي مستهدف زيادة الإيرادات منها وهي قطاع الذهب والتنقيب واكتشاف مناجم الذهب الجديدة، وطبعا على أول القائمة منجم السكري واللي بيعد واحد من اهم وأكبر مناجم الذهب.
وكشف التقرير، أن منجم السكري ده واحد من أكبر وأهم المناجم اللي بيتم استخراج الذهب منها علي مستوي العالم، وده موجود في أعماق صحراء مصر الشرقية، وتحديدًا في منطقة جبل السكري بالقرب من مدينة مرسى علم، والحكومة بدأت الإنتاج الفعلي منه في 2010، وبيعد من أكبر عشر مناجم ذهب في العالم من حيث الاحتياطي.
وأكد التقرير، أن الحكومة حطت خطة لزيادة وتطوير عمليات الإنتاج من منجم السكري، وده بيحصل من خلال زيادة عمليات الاستكشاف في محيط المنجم، واعتماد تقنيات حديثة في التنقيب الجيولوجي وتشجيع الشركات العالمية والمحلية على الدخول في مزايدات جديدة للتنقيب، خصوصا بعد نجاح الجولة الأخيرة واللي كان فيها إقبال غير مسبوق للشركات اللي عايزة تدخل تشارك في عمليات التنقيب، ده غير الجهود اللي بتقوم بيها الحكومة لتطوير البنية التحتية الداعمة لقطاع التعدين زي الطرق والموانئ ومحطات الطاقة، بالإضافة لجهود تحسين بيئة الاستثمار من خلال إصدار قانون الثروة المعدنية الجديد واللي هيمنح المستثمرين مزيد من الحوافز والشفافية.
منصات بانكير قدمت تقرير مختلف النهاردة عن تمويل 51 ألف مشروع بـ2.2 مليار جنيه
أكد التقرير، أن الحكومة دعمت الشباب من خلال ضخ أكثر من 2.2 مليار جنيه في مشاريع صغيرة ومتناهيه الصغر في محافظة الإسكندرية بس، والنتيجة، هي تمويل أكتر من 51 ألف مشروع، وتوفير حوالي 110 آلاف فرصة عمل، والتركيز الأكبر كان على المشروعات الصناعية، خاصة في برج العرب ومنطقة مرغم الصناعية.
وأضاف التقرير، أن جهاز تنمية المشروعات بيساعد الشباب في كل حاجة، زي تمويل سهل وبشروط مرنة، وتدريب وتأهيل قبل ما تبدأ مشروعك، وخدمات فنية ومتابعة عشان مشروعك ينجح، ومؤخرا تسهيلات ضريبية جامدة جدا بفضل قانون 6 لسنة 2025، يعني تدفع ضريبة بسيطة تبدأ من 0.4% على حجم نشاطك، وكمان إعفاء من أنواع كتير من الضرائب والدمغات
وأوضح تقرير بانكير، أنه تم تسليم شيكات تمويل مباشر لعدد من أصحاب المشاريع، وكمان شهادات توفيق أوضاع وتصنيف، يعني مشاريع كانت في الظل دلوقتي بقت رسمية وليها كيان قانوني، واللي رسمي يقدر يستفيد بكل حاجة.
وحدة أبحاث بانكير قدمت تقرير خاص النهاردة عن خطة الحكومة لتأمين احتياجات فصل الغاز الصيف من الغاز الطبيعي
كشف تقرير بانكير، أن كل المؤشرات الموجودة حاليا بتقول ان في الصيف اللي جاي هيكون واحد من أشد فصول السنة في درجات الحرارة، والارتفاع ده في درجات الحرارة بيتطلب زيادة في التغذية الكهربائية وبيكون معاه ارتفاع كبير في الاحمال الكهربائية وبالتالي لازم تكون الدولة والبنية التحتية فيها مجهزة لأقصى درجة لاستيعاب الاحمال الجديدة اللي بتدخل على الشبكة في فصل الصيف
وأوضح التقرير، أنه خلال الفترة اللي فاتت الحكومة استعانت بـ3 سفن لتغييز الغاز الطبيعي وربطتهم بالشبكة الموحدة للغازات، والـ3 سفن دول مهمتهم الأساسية هيا تأمين الاحتياطات الأساسية لمحطات توليد الكهرباء خصوصا في فصل الصيف، وعلشان نكون عارفين ان التكلفة بتاع الـ3 سفن دول بتكون كبيرة جدا والسفينة الواحدة منها ايجارها اليومي بيعدي 250 الف دولار،. الهدف من الفاتورة الكبيرة اللي الحكومة بتدفعها هو تأمين الإمدادات اللازمة لمحطات توليد الكهرباء علشان المحطات تفضل شغالة وتولد الطاقة اللازمة للشبكة الموحدة للكهرباء وميكونش في عودة مو جديد لخطة تطبيق تخفيف الأحمال.
وأشار التقرير إلى أن الحكومة استعانت كمان بـ3 سفن جديدة وحاليا موجودين في مدينة العين السخنة، والسفن دي مش شغالة بكامل طاقتها بس هيا بتأمن احتياجات الدولة المصرية ربما تحصل مشاكل مفاجأة ممكن تتسبب في انقطاع للموارد التقليدية للغاز المصري.
وأضاف التقرير، أن الدكتور مصطفى مدبولي رئيس الوزراء قال إن في سفينتين إضافيتين هيوصلوا قريب جدا للأراضي المصرية هيتم توجيه سفينة منهم وإلى ميناء الإسكندرية، والتانية هتكون في ميناء العقبة الأردني كإجراء طارئ إضافي لفترة الصيف.
