مجموعة عالمية تبحث إنشاء مصنع للمنسوجات والملابس الجاهزة في مصر.. شوف المكاسب الاقتصادية للمشروع
يا ترى إيه طبيعة المشروع الجديد اللي هيعمل قلبان في قطاع المنسوجات والملابس الجاهزة في مصر، وإيه هي المكاسب اللي ممكن تجيبها صفقة زي دي لاقتصاد مصر، وإزاي مصنع واحد ممكن يغير شكل الصناعة ويوفر آلاف الوظايف؟
في الأيام الأخيرة، في شركة عالمية اسمها "كريستال مارتن"، ومقرها في هونج كونج، بدأت مفاوضات جدية عشان تفتح مصنع عملاق للمنسوجات والملابس الجاهزة هنا في مصر، وده بالتعاون مع هيئة الاستثمار والمجلس التصديري للغزل والمنسوجات.
والمصنع ده هيكون على مساحة 1.5 مليون متر مربع، وكمان هيقدر يوفر أكتر من 4 آلاف فرصة عمل مباشرة، غير آلاف الفرص غير المباشرة.
بس السؤال هنا، يا ترى إيه هي المكاسب اللي ممكن تحققها مصر من المشروع ده؟
بص يا سيدي، أولا توطين الصناعة، يعني اللشركة مش جاية تصنع وخلاصؤ دي هتنقل التكنولوجيا الخاصة بيها لمصر، وده معناه تدريب وكمان خبرات وكفاءة أعلى، ودفع كبير للقطاع النسيجي في البلد، والأجمد، ان من 60% ل 70% من المكونات هتكون محلية، يعني "صنع في مصر" بجد.
ثاني مكسب هو التصدير للأسواق العالمية، وده لان كريستال مارتن بتصنع لبراندات عالمية زي ليفايس و أديداس و نايكي، ومخططين يخلوا مصر مركز رئيسي للتصدير لأوروبا وأمريكا، خاصة إن مصر عندها اتفاقيات تجارة حرة معاهم، وده معناه إن المنتج المصري يوصل لهم بضرايب أقل وأسعار منافسة.
تالت مكسب هو ان مصر موقع استراتيجي، وده لان عندنا بنية تحتية حديثة وشبكة طرق وموانئ قوية ومناطق حرة جاهزة، يعني المصنع هيشتغل بأقل تكلفة توصيل ممكنة وهيوصل الأسواق بسرعة، ودي ميزة مهمة جدا في الصناعة اللي بتعتمد على السرعة والمرونة.
رابع حاجة معانا، هي استثمارات مباشرة، لأن حجم أعمال الشركة عالميًا بيعدي 2.5 مليار دولار سنويا، ودلوقتي جزء كبير من الاستثمار ده جاي على أرض مصر، وده مش بس بيدخل فلوس، ده كمان بيبعث رسالة للمستثمرين التانيين إن السوق المصري فيه فرص حقيقية وآمنة
خامس مكسب، هي الرخصة الذهبية، وده لان الشركة ناوية تقدم على الرخصة الذهبية، وده معناه تأسيس وتشغيل سريع وحوافز استثمارية كبيرة ومناخ عمل واضح ومرن، وكل ده في إطار خطة الحكومة لتشجيع المستثمرين الجادين
وفي النهاية، المسئولين المصريين قالوا إننا بنشتغل على تحويل مصر لمركز إقليمي لصناعة وتداول الملابس الجاهزة خلال سنتين، يعني مش مجرد مصنع، لأ ده إحنا بنتكلم عن مدينة صناعية كاملة في مدن زي المنيا والعلمين الجديدة والعاشر من رمضان والمنطقة الاقتصادية لقناة السويس.
والخلاصة، هي ان اللي بيحصل ده خطوة كبيرة في طريق إننا نكون لاعب رئيسي في صناعة الغزل والمنسوجات العالمية، وكل مصنع جديد يعني فرص عمل أكتر وصادرات أعلى، ودخل عملة صعبة بيدعم الاقتصاد ويقلل العجز ويحفز النمو.
