سر تذبذب أسعار الذهب.. وتوقعات الأيام الجاية
يا ترى إيه هو سر تذبذب أسعار الدهب، وليه أسعار المعدن الأصفر مش ثابتة الأيام دي، وتوقعات الأسعار رايحة على فين؟
في الحقيقة، الأسبوع اللي فات شوفنا الدهب وصل لأعلى مستوى ليه من 3 أسابيع عالميا، والأوقية طارت لحد 3355 دولار، بس فجأة رجعت خسرت اللي كسبته، ونزلت تاني.
وده حصل لعدة اسباب، أولها التوترات التجارية اللي حصلت وسببت خوف كبير في السوق، وتحديدا لما امريكا أعلنت إنها ناوية تفرض رسوم جمركية جديدة على واردات من الاتحاد الأوروبي والمكسيك، من أول أغسطس الجاي، يعني باختصار حرب تجارية جديدة.
ومن هنا، المستثمرين أول ما سمعوا الخبر، جريوا على الدهب عشان هو أمان أكتر من الأسهم والدولار، فالسعر طلع بسرعة، لكت بعد شوية، الأخبار عن احتمالية التفاوض والتهدئة خلت السوق يهدى، فالطلب على الدهب قل، وسعره نزل تاني.
طب إيه اللي بيحصل في مصر؟
سعر الجرام عيار 21، ارتفع شوية ل 4660، وبعدها رجع لنفس نقطة البداية، وده بسبب إن السوق المصري بيتأثر بحركتين وهي السعر العالمي وكمان سعر الدولار جوه مصر، يعني ممكن السعر العالمي يطلع، لكن لو الدولار نزل في نفس الوقت، السعر عندنا يثبت أو حتى ينزل.
كمانؤفي عامل تاني مهم جدا، وهو التضخم وسعر الفايدة، وكل العيون دلوقتي على أمريكا، عشان يوم التلات هتعلن بيانات التضخم، واللي منها الفيدرالي هياخد قرار جديد بخصوص سعر الفايدة.
ولو التضخم طلع عالي، ممكن يسيب الفايدة زي ما هي أو يرفعها، وساعتها الدهب ممكن يضعف شوية، اما بقى لو التضخم نزل، فالناس هتتوقع خفض الفايدة وساعتها الدهب هينتعش ويرتفع.
وكمان فيه مضاربات دلوقتي، وفي صناديق عالمية زي SPDR Gold Trust قللت احتياطاتها من الدهب بنسبة بسيطة، وده خلا ناس كتير تقلق وتبيع، وفي نفس الوقت، تقارير أمريكا قالت إن المضاربات على الدهب نزلت، يعني الناس مش بتراهن عليه بنفس القوة اللي كانت من أسبوع.
أما بقى توقعات الأيام الجاية، فنقدر نقول إن لو الحرب التجارية بين أمريكا وأوروبا زادت، الدهب هيولع، اما بقى لو الفيدرالي قرر خفض الفايدة، فالسعر هيرتفع أكتر، لكن لو حصل هدوء في التوترات، ومعاه ارتفاع في الفايدة فممكن جدا الدهب يهدى شوية، يعني ببساطة، احنا داخلين على أسبوع متقلب، وسوق الدهب ما بيحبش المفاجآت.
والخلاصة، هي ان أسعار الدهب دلوقتي ماشية على حبل مشدود ما بين التوترات السياسية، وسياسات الفايدة والمضاربات، فلو ناوي تشتري أو تبيع، تابع الأخبار كويس، وخليك مرن.
