وداعا للدولار وأهلا باليوان.. مصر والصين تعمقان تعاونهما الاقتصادي.. ما القصة؟
يا ترى ليه مصر بتركز قوي على علاقتها مع الصين الفترة دي؟.. إيه المكاسب اللي ممكن نحققها من التعاون ده؟.. وهل فعلاً التجارة مع الصين بتفيد الصناعات المصرية ولا بتنافسها؟.. وهل ممكن نشوف منتجات "صنع في مصر" تباع في الصين قريب؟
مصر ماشية بطوات ثابتة في المجال الاقتصادي، ودي حاجة مهمة جدًا بتحصل على الساحة الدولية.. احنا فعلا بنشوف تعاون كبير بين مصر والصين بيزيد يوم عن يوم، وده مش بس في الكلام، لا ده على الأرض بجد.
خلينا نبدأ بالاقتصاد والتجارة مثلا، وده لأن الصين بقت من أكبر الشركاء التجاريين لمصر، وكل سنة بنشوف زيادة في الصادرات والواردات بين البلدين، يعني مثلًا، الصين بتستورد مننا منتجات زراعية كتير زي البرتقال والعنب.. وفي المقابل، مصر بتستورد تكنولوجيا ومعدات بتساعد في تطوير المصانع والبنية التحتية.
ولو هنتكلم عن التجارة الإلكترونية.. فالصين عندها خبرة كبيرة في المجال ده، وابتدت شركات زي "علي بابا" تدعم شباب مصريين يفتحوا مشاريع أونلاين، وده خلق فرص شغل جديدة، وساعد ناس كتير تشتغل من بيتها.
طيب والصحة؟.. في تعاون جامد في مجال الصحة العامة، وده لأن الصين ساعدت مصر بأجهزة ومعدات طبية، وكمان اتعاونوا سوا في تصنيع اللقاحات، زي ما حصل في وقت كورونا، وده زود قدرات مصر في مواجهة الأوبئة وحسن المنظومة الصحية.
مش بس وكده، ده الصين بتتساعد مصر تدخل في مشاريع طاقة نظيفة، زي الطاقة الشمسية وطاقة الرياح، يعني بنشتغل سوا علشان نحافظ على البيئة ونقلل التلوث… خطوة مهمة لمستقبل ولادنا.. والتعاون ده مش بس مكاسب اقتصادية، ده كمان شراكة بتفتح أبواب للتطور والنمو الحقيقي.
وبمناسبة إننا قربنا نحتفل بالذكرى السبعين للعلاقات بين مصر والصين سنة 2026، ناس كتير شايفين إن التعاون بين البلدين هيزيد بشكل كبير، خصوصًا في الاقتصاد.
تفتكروا إيه اللي حصل الفترة اللي فاتت؟
الصين ومصر وقّعوا كذا وثيقة تعاون مهمين جدًا، في مجالات زي التجارة الإلكترونية، والطاقة الخضرا، والصحة، والتمويل، وحتى المساعدات التنموية.
يعني إحنا مش بنتكلم عن كلام على ورق، لأ ده شغل على الأرض فعلًا، والمثير بقى، إن من بين الاتفاقيات دي، كان في مذكرة تفاهم بين البنك المركزي المصري وبنك الشعب الصيني، الهدف منها تعميق التعاون المالي بين البلدين.
يعني إيه الكلام ده؟
يعني هيبتدوا يشتغلوا على التسويات المالية باستخدام العملة المحلية، ويتعاونوا كمان في مجالات زي الابتكار الرقمي والعملات الرقمية للبنوك المركزية.
وده معناه إيه؟.. أن التعامل بالعملة المحلية هيساعد نخفف الضغط على العملات الأجنبية، ويخلي حركة التجارة مستقرة أكتر، وكمان يفتح الباب لتنسيق مؤسسي أقوى بين مصر والصين.
والملفت بقى، إن التعاون ده مش بس اقتصادي ده كمان سياسي، يعني الصين بتدعم مصر والعرب في قضايا زي فلسطين، ومصر كمان بتدعم الصين في قضايا زي مبدأ الصين الواحدة.
الخلاصة.. أن مصر بموقعها الجغرافي تعتبر بوابة ذهبية بتربط آسيا بأفريقيا بأوروبا.. وده بيخليها شريك استراتيجي مهم جدًا في رؤية الصين للتنمية المشتركة، ومن سنة 2014، العلاقات بين مصر والصين بقت شراكة استراتيجية شاملة.. واللي جاي أكتر، والتعاون بيكبر يوم عن يوم.
