مكان محدش هيقولك عليه.. الأسعار بـ “رخص التراب” وكل حاجة موجودة من الإبرة للصاروخ
تعرف ان فيه مكان تشتري منه لبس وهدوم وأدوات كهربا وعصافير وكلبشات ومفاتيح عربيات وتليفزيونات.. وكل ده برخص التراب .. طب تعرف ان فيه سوق تقدر تلمّ بيه شقة كاملة بنص تمن أقل قطعة في مول.. فلو نازل تدور على حاجة قديمة.. أو نادرة.. أو مستعملة بس بحالة الزيرو.
سوق الجمعة مش مجرد سوق.. ده حالة.. تجربة كاملة تعيشها من أول ما تدخل من البوابة لحد ما تخرج شايل شنط كتير ومحافظتك لسه فيها فلوس.
السوق بيتفتح كل يوم جمعة من الفجر لحد الضهر.. والمكان الرئيسي ليه تحت كوبري التونسي في منطقة السيدة عائشة في القاهرة.. بس الحقيقة إن السوق كبر وانتشر وبقى ليه فروع في مناطق تانية زي إمبابة والجيزة وحلوان.. بس سوق الجمعة الأصلي هو اللي تحت كوبري السيدة عائشة.
في السوق ده هتلاقي كل حاجة.. من أول هدوم وأحذية وأدوات منزلية وأدوات كهربائية.. لحد حيوانات أليفة وطيور وسمك وعصافير نادرة.. وفيه كمان أدوات ميكانيكا وقطع غيار عربيات وأنتيكات وكتب قديمة وحاجات مش هتصدق إنها لسه موجودة.
حد هيسأل ويقول ايه اخبار الأسعار ؟
السعار هناك برخص التراب حرفيًا.. يعنى ممكن تشتري تيشيرت بـ20 جنيه.. جاكيت جلد بـ100 جنيه.. شفاط مطبخ بـ150 جنيه.. موتور خلاط بـ50 جنيه
بس خد بالك.. الشطارة مش بس إنك تشتري رخيص.. الشطارة إنك تعرف تفاصل.. وتعرف تختار الحاجة الكويسة وسط الزحمة.
وعلشان كده.. دي شوية نصايح مهمة جدًا لو ناوي تروح سوق الجمعة.
انزل بدري.. السوق بيبدأ من الفجر.. وكل ما تيجي بدري كل ما تلحق البضاعة النضيفة وتتفادى الزحمة.
البس كاجوال وخليك خفيف في الحركة.. لأنك هتمشي كتير والجو هناك بيبقى زحمة وحر.
خد معاك كاش فكة.. لأنك هتتعامل مع باعة كتير ممكن ميكونش عندهم فكة أو مش بيقبلوا تحويل.
ماتفاصلش من أول رقم.. اسأل عن السعر وسيب نفسك شوية.. بس لما تبدأ تفاصل خليك واثق.. ممكن تنزل بالسعر للنص أو أقل.
لو بتشتري أدوات كهربائية أو حاجات بتشتغل بالكهربا.. جرّبها الأول كويس أو اطلب ضمان حتى لو بسيط.
وأهم حاجة خد بالك من محفظتك وتليفونك.. لأن الزحمة بتبقى شديدة في بعض الأوقات ودي فرصة سهلة للنشالين.
ولو عايز حاجة محددة اسأل على أسعارها في السوق العادي قبل ما تنزل.. علشان لما تلاقيها هناك بسعر أرخص تبقى واخد قرارك وانت مرتاح.
