رغم تقلبات الأسعار والهبوط المفاجيء.. ليه الدهب هو أهم ملاذ آمن في الاستثمار؟
يا ترى ليه الدهب بيظل خيار آمن للناس العادية والمستثمرين رغم التقلبات السعرية اللي بتحصل له، وليه سعره مرة في السما ومرة في الأرض، وإيه هي توقعات الأسعار في الفترة الجاية؟
في الحقيقة، احنا كل يوم بنسمع خبر بيهز السوق، سواء تصريح من بنك مركزي، أو أزمة سياسية في بلد بعيد، أو تضخم فجأة ضرب اقتصاد كبير، ومع كل ده، بتلاقي الناس سواء العاديين أو المستثمرين، بيرجعوا تاني للدهب.
وده طبعا لأن الدهب مش بس بيغري الناس، لأ ده ده كما عمره ما بيخون، والتاريخ بيقول إن الدهب ملاذ آمن ومخزن مهم جدا للقيمة، سواء في حروب أو أوبئة أو حتى انهيارات للاقتصاد، وكمان أول ما الناس تحس بالخطر، تلاقي الكل بيجري عليه.
عندك بردز، الناس العادية بتشتري دهب عشان تحس بالأمان، وكمان المستثمرين بيشتروه عشان يحموا فلوسهم من الضياع، وده لأنه دايما زي ما قولنا ملاذ آمن، يعني مش مرتبط بعملة واحدة، وكمان مش بيحتاج وسيط أو جهة تتحكم فيه، وتقدر تمسكه بإيدك وتحس بقيمته، وفوق كل ده قيمته عمرها ما راحت زي الأسهم أو العملات، يعني ببساطة هو فلوسك بشكل تاني، بس آمن أكتر.
أما بقى دلوقتي، الدهب بيشهد حالة من التذبذب دلوقتي، مش لأنه ضعيف، لكن عشان السوق كله مرعوب ومش ثابت، وكمان أرقام التضخم بتطلع وتنزل، والبنوك المركزية وعلى رأسهم الفيدرالي الأمريكي قراراتهم بحصوص الفايدة بتأثر على كل الأسواق.
لكن الغريب، إن وسط كل ده، البنوك نفسها بقت تشتري دهب بكميات، يعني حتى الكبار شايفين إنه الأمان الحقيقي.
طب بالنسبة للناس العادية، بتشتري دهب ليه؟
بص يا سيدي، في نوعين من الناس، اللي بيشتري دهب للحماية، وهو اللي خايف على قيمة فلوسه، فبيحطها في دهب، وفي اللي بيستثمر، يعني مش مستني مكسب سريع، بس عارف إنه بيأمن مستقبله، وده بيأكد إن الدهب مش بيطلع بسرعة زي البورصة، بس كمان مش بينهار فجأة.
طب الأسعار عاملة إيه دلوقتي؟
بص، دايما هتلاقي حد يقولك الدهب غالي، استنى شوية، ولكن اللي اشترى من سنة كان شايفه غالي والنهاردة بيكسب، يعني الفكرة مش في سعر انهارده، ولكن الكفرة في ليه انت بتشتري دلوقتي؟
لو ناوي تحتفظ على المدى الطويل، يبقى آه، الدهب هو صاحبك اللي مش هيخذلك، بس خلي ابالك ممكن ينزل يومين أو حتى شهر، بس عمره ما هيخسرك نص فلوسك فجأة زي الأسهم، يعني هو مش عصاية سحرية ولكن اللي بيفهمه، بيكسب منه أمان مش بس فلوس.
والخلاصة هي، إن الدهب هيظل واحد من أأمن وأبسط طرق حماية الفلوس، فلو بتدور على الطمأنينة فالدهب دايما هو الحل.
