بنك أمريكي يفجر مفاجأة غير متوقعة عن أسعار الذهب.. إيه اللى هيحصل فى الصاغة الفترة الجاية؟
رصدت بانكير، عدد من الأحداث المحلية والعالمية، عبر منصاتها المختلفة خلال الساعات الأخيرة، ولذلك سوف نستعرض معكم أبرز الأخبار ضمن الجولة العالمية الجديدة في أسواق المال والشركات والطاقة حول العالم، تأتيكم من بانكير.
يا ترى اللى بنسمعه فى الساعات الأخيرة بخصوص الدهب ممكن يحصل فعلا.. إزاي أكبر بنوك الاستثمار في العالم بيتوقع تراجع أسعار الدهب؟ .. هل الملاذ الآمن مبقاش آمن خلاص؟ .. معقول بعد ما الدهب وصل لأرقام تاريخية وعدى الـ 3400 دولار للأونصة.. ممكن نشوفه بينهار قدام عينينا؟ .. وإزاي ده ممكن يحصل والعالم كله مولع نار.. حروب في كل حتة وتوترات سياسية مبتخلصش؟
فى خبر هز أسواق الدهب فى العالم خبراء «سيتي بنك» توقعوا تراجع الدهب إلى ما دون 3000 دولار للأوقية في الفترة الجااية بعد انتهاء الارتفاع القياسي اللي حققه المعدن الأصفر وده بيعني نهاية واحدة من أبرز موجات الارتفاع في أسعار السلع الأساسية.
خبراء البنك توقعوا ان أن سعر الدهب هيعود إلى ما بين 2500 و2700 دولار للأوقية بحلول النص التاني من عام 2026.
وقالوا ان التراجع ده ممكن يكون مدفوع بضعف الطلب الاستثماري وبتحسن آفاق النمو العالمي وخفض أسعار الفائدة من قِبَل الاحتياطي الفيدرالي.
وطبعا كلام الكبار زي سيتي بنك لازم نقف عنده ونحلله بالمللي.. لإن كل كلمة فيه بتكون محسوبة.. وممكن تكون إشارة لحاجة كبيرة بتحصل ورا الكواليس.
سيتي بنك يا جماعة مش أي بنك.. ده واحد من أكبر أربع بنوك في الولايات المتحدة الأمريكية.. بيدير استثمارات بتريليونات الدولارات.. ولما بيطلع تقرير منه.. العالم كله بيسمع.. والمستثمرين الكبار بيعملوله ألف حساب.
التقرير اللي قالب الدنيا ده بيقول إن فيه احتمالية كبيرة إننا نشوف "تصحيح سعري" كبير في الدهب.. يعني بمعنى أصح.. تراجعات في الأسعار
طب ليه يا عم سيتي بنك؟.. إيه اللي جد عشان تقول كلام عكس اللي كل الناس شايفاه؟
هنا بقى لازم نركز.. لأن تفسيرهم عكس كل التوقعات التقليدية.. سيتي بنك بيقول إن السبب الرئيسي اللي ممكن يوقع الدهب هو "هزيمة التضخم".. أيوه زي ما سمعت كده.. البنوك المركزية العالمية.. وعلى رأسهم البنك الفيدرالي الأمريكي.. بقالهم أكتر من سنتين في حرب شرسة ضد التضخم.. وسلاحهم الرئيسي كان "رفع الفايدة".
ولما الفايدة بتكون عالية.. الدهب بيزعل.. ليه؟.. لإن الدهب مابيديش عائد.. يعني لو معاك سبيكة دهب.. مش هتاخد عليها أرباح شهرية أو سنوية.. لكن لو حطيت فلوسك في البنك.. هتاخد فايدة عالية ومضمونة.. فالمستثمر بيبدأ يفكر.. "أنا إيه اللي يخليني أجمد فلوسي في دهب مش بيكسبني.. في حين إني ممكن أخد عائد خرافي من السندات أو شهادات الاستثمار؟".
طيب واحد هيسأل سؤال منطقي جداً.. هيقولي.. وإيه أخبار الحروب والتوترات اللي في العالم؟.. مش دي المفروض بتخلي الناس تجري تستخبى في الدهب؟.. مش ده اللي بيعلي سعره؟
كلامك صح 100%.. وده اللي حصل فعلاً في الشهور اللي فاتت.. لولا التوترات في أوكرانيا.. والوضع في الشرق الأوسط.. عمرنا ما كنا هنشوف الأرقام التاريخية دي للدهب.. لكن نظرية سيتي بنك بتقول حاجة مختلفة.. بتقول إن الأسواق "سعّرت" بالفعل كل المخاطر دي.. يعني سعر الدهب الحالي واخد في اعتباره كل السيناريوهات السيئة دي خلاص.. ومبقاش فيه محفزات جديدة تخليه يطلع أكتر من كده.
بمعنى تاني.. السوق بيقولك "أنا عارف إن فيه حروب.. وعارف إن فيه توترات.. والسعر اللي قدامك ده هو تمن كل الكلام ده".. فأي هدوء بسيط في أي جبهة من دول.. أو حتى مجرد عدم تصعيد أكتر.. ممكن يكون كافي جداً إنه يخلي المستثمرين يبيعوا الدهب عشان ياخدوا أرباحهم.. وده اللي هيوقع السعر.
