خد بالك قبل ما تدفع.. 3 اختبارات تكشفلك الدهب المغشوش من الأصلي
الفترة اللي فاتت السوق المصري اتقلب.. كل يوم نسمع عن ناس اتنصب عليهم بسبب سبايك دهب طلعت مغشوشة.. الموضوع ما بقاش سهل.. والمحتالين بقى عندهم طرق تخدع أي حد، حتى لو شاري من مكان شكله محترم.
طيب نتصرف إزاي؟ وإيه اللي نعمله قبل ما نحط تحويشة العمر في سبيكة؟
هنقولك على 3 اختبارات بسيطة.. لو عملتهم، هتطمن بنسبة 90٪ إن الدهب اللي في إيدك أصلي مش مضروب.. بس قبل كده.. لازم تعرف إن الدهب النهاردة مش مجرد زينة.. ده بقى خزنة متنقلة.. بيديك أمان..وسهل تشتري وتبيع في أي وقت..
يعني لو معاك جرام واحد بس.. إنت كده بدأت تستثمر.. وده اللي خلى الإقبال يزيد.. ومعاه زاد الغش
نرجع لخطوات التأكد من الدهب الأصلي.. خد بالك كويس.
الخطوة الأولى: اختبار المغناطيس
هات مغناطيس قوي.. وقربه من السبيكة أو القطعة اللي ناوي تشتريها..لو حسيت بأي جذب أو شفط.. يبقى في حديد أو معدن تاني داخل في التكوين، وساعتها نقولك: ابعد فورًا.. الدهب الحقيقي مش بيحب المغناطيس.. ولا بيتحرك ناحيته أصلا.
الخطوة التانية .. خدش الكشف
هات أي حاجة معدنية مدببة.. ودّي خدشة خفيفة جدًا على الطرف أو الجنب.. لو لقيت اللون الذهبي تحت الخدش زي ما هو.. يبقى تمام، ده ذهب مضمون.
لكن لو ظهر لون بني فضي أو حتى رمادي.. فده مؤشر خطر.. القطعة دي مش دهب صافي.
الخطوة التالتة: اختبار “مياه النار” وده للمحترفين بس
ودي طريقة قوية جدًا.. لكنها خطيرة ومش لأي حد… الصياغ الكبار بيستخدموها لأنها تكشف المعدن الحقيقي فورًا.. مياه النار بتآكل أي طلاء أو معدن مغشوش.. إنما الذهب الحقيقي بيفضل ثابت ولامع..وبعض المحلات كمان عندها أجهزة إلكترونية بتحدد نسبة الذهب بدقة.
فلو ناوي تشتري دهب وبالذات سبايك متستهونش أبدًا..اختبر.. اسأل.. وافحص قبل ما تدفع.. ومتنساش.. الدهب مش بس استثمار، ده أمان شخصي.. حافظ عليه صح.
