سر تراجع أسعار الدهب في مصر.. شوف التوقعات رايحة على فين
يا ترى إيه سر نزول سعر الدهب في مصر رغم إنه ثابت في العالم، هل بسبب هبوط الدولار ولا في أسباب تانية غير مباشرة، ولو أنت شايل فلوس تشتري دهب دلوقتي ولا تستنى شوية..
في الحقيقة، الدهب نزل في السوق المصري رغم إنه على المستوى العالمي ثابت ومستقر، وده خلا ناس كتير تسأل: الدهب بيقع هنا واحنا شايفينه ما اتحركش بره؟، عل ده معناه فرصة نشتري، ولا فيه حاجة مستخبية؟
بص يا سيدي، أول حاجة نبدأ بيها إن الدهب في العالم بيقيموه بالدولار، وده معناه إن أي تحرك في سعر الدولار قدام الجنيه بيأثر على سعر الدهب عندنا حتى لو الأونصة عالمياً ما اتحركتش.
طيب.. إيه اللي حصل الفترة الأخيرة؟
البنك المركزي المصري خفض الفايدة بنسبة 1% للمرة التانية على التوالي، يعني المجموع بقى 3.25% تخفيض من بداية السنة، وكمان البنوك دلوقتي شغالة طوارئ، ولجان "الألكو" بتجتمع عشان تشوف هتعمل إيه في أسعار الشهادات والقروض.
طيب وده إيه علاقته بالدهب؟
بص يا سيدي، لما الفايدة بتقل، الناس بتبدأ تشوف بدائل تانية تحفظ بيها قيمة فلوسها، فأول حاجة بتيجي في دماغ الناس هي الدهب، بس هنا المفاجأة هي إن الدهب نزل رغم كل ده، وده بسبب إن الدولار نفسه نزل قصاد الجنيه في البنوك، وده خلا الجرام يقل شوية خصوصًا عيار 21 اللي بقى في حدود 4710 جنيه بعد ما كان قرب من الـ5 آلاف.
ونقدر نقول إن اللي بنشوفه دلوقتي مجرد هدوء مؤقت، لأن التوقعات العالمية بتقول إن الأونصة رايحة على 6000 دولار قريب، خصوصا بعد تصعيد ترامب للحرب التجارية مع أوروبا وفرض رسوم جمركية جديدة، والمخاوف من أزمة الدين الأمريكي.
ودلوقتي سعر جرام الدهب عيار 24 وصل ل 5360 جنيه، أما عيار 22 فسجل 4913، وكمان عيار 21 ب 4710، وأخيرا جرام عيار 14 ب 3140، والجنيه الدهب ب37680.
يعني بالعربي كده الدهب طالع، بس في مصر بيدينا فرصة نلحق نشتري قبل ما السوق يولع تاني، يعني لو معاك فلوس زايدة وبتفكر في استثمار آمن، فالدهب اختيار ممتاز دلوقتي.
ولو عندك دهب خليه، ما تبيعش دلوقتي، أما بقى لو بتستنى السعر ينزل أكتر، فده مش مضمون، لأن أي توتر عالمي أو تحرك في الدولار هيرجّع الأسعار لفوق تاني بسرعة.
والأهم إن الطلب على الدهب في مصر عمره ما بيوقف، سواء عشان الجواز والشبكة والذي منه، أو حتى للادخار، لأن الناس حافظة من زمان إن الدهب أمان، ودلوقتي الفرصة قدامك تاني، وممكن تكون الأخيرة قبل ما الأسعار تنط لفوق.
