الأزمة بتخلص.. تطورات مهمة في ملف الدولار
يا ترى الدولار هيروح على فين الايام الجايه؟ .. سعره هيفضل يهبط كده زي ما احنا شايفين اليومين دول ولا فيه مفاجآت جاية في الطريق؟.. وإيه يعني تحرير سعر الصرف اللي الكل بيتكلم عنه؟
خلينا نبتدي بالسؤال اللي في دماغ الكل .. الدولار بيهبط ليه دلوقتي؟ .. من أيام قليلة بس كنا بنسمع إن سعر الدولار في البنوك نزل تحت الـ50 جنيه لأول مرة من ساعة التعويم الأخير في مارس 2024 .. يعني إيه؟ .. يعني سعر الشراء في البنوك وصل لحوالي 49.78 جنيه والبيع بقى بين 49.88 و50 جنيه .. ده تراجع ملحوظ لو قارناه بأرقام الـ60 و70 جنيه اللي كنا بنشوفها في السوق السوداء قبل كده.
طيب إيه السبب؟
فيه عوامل كتير لعبت دور .. أولها إن البنك المركزي المصري بدأ يتحرك بجدية بعد زيارة بعثة صندوق النقد الدولي للقاهرة .. البعثة دي أشادت بالإصلاحات الاقتصادية اللي مصر بتعملها .. وخصوصاً قرار تحرير سعر الصرف اللي ضرب السوق السوداء في مقتل.
خليني أفسرلك ببساطة .. تحرير سعر الصرف يعني إن البنك المركزي ساب الجنيه المصري يتحدد سعره بناءً على العرض والطلب في السوق .. مش هو اللي بيحدد سعر ثابت زي زمان .. يعني لو الدولار طلب عليه زاد .. سعره يرتفع .. ولو العكس حصل .. يهبط .. الفكرة هنا إن السوق هو اللي بيقرر .. وده بيخلي الأسعار أكتر واقعية ويقلل من الفجوة بين السوق الرسمية والسوق السوداء .. ليه ده مهم؟ .. لأن لما كان فيه سعر رسمي وسعر موازي .. كان فيه مضاربات كتير وتلاعب في الأسعار .. دلوقتي البنك المركزي بيحاول يوحد السعر ده عشان يحقق استقرار.
طيب .. نسأل سؤال تاني مهم .. الدولار هيفضل يهبط ولا ممكن يرجع يرتفع تاني؟
الحقيقة إن الإجابة مش بسيطة .. لأن سعر الدولار بيتأثر بعوامل كتير .. زي مثلاً كمية الدولارات اللي متوفرة في البنوك .. وده بيعتمد على استثمارات أجنبية زي صفقة رأس الحكمة اللي جابت لمصر 35 مليار دولار .. منهم 10 مليار وصلوا فعلاً .. .. كمان فيه حاجة زي السياسة النقدية .. يعني قرارات البنك المركزي زي رفع الفايدة أو خفضها .. وطبعاً التضخم اللي لسه بيأثر على أسعار المنتجات المستوردة .. لو البنوك التجارية قدرات تدبر دولارات كفاية للمستوردين .. السوق السوداء هتضعف أكتر والسعر هيستقر .. لكن لو حصل نقص في الدولارات .. ممكن نشوف ارتفاعات تانية ..
خلينا نركز شوية على إيه اللي بيحصل دلوقتي .. حاليا السوق بيشهد تراجع في سعر الدولار بشكل ملحوظ .. وده نتيجة تحسن في السيولة الدولارية بعد صفقات زي رأس الحكمة ودعم من صندوق النقد الدولي .. كمان البنك المركزي بيحاول يضمن إن الدولارات تكون متوفرة في البنوك التجارية عشان يغطي احتياجات المستوردين .. وده بيخفف الضغط على السوق الموازية .. يعني بدل ما الناس تروح تشتري دولار من السوق السوداء بأسعار مبالغ فيها .. بقت البنوك هي اللي بتقدم الأسعار التنافسية ..
بس برضو لازم نبقى واقعيين .. الاقتصاد المصري لسه بيواجه تحديات .. زي مثلاً الدين الخارجي اللي وصل لـ156 مليار دولار .. .. وكمان التضخم اللي بيرفع أسعار المنتجات المستوردة زي السلع الأساسية .. تحرير سعر الصرف ممكن يساعد في حل المشاكل دي على المدى الطويل .. لكن على المدى القصير ممكن نشوف تقلبات في الأسعار .. يعني الدولار ممكن يهبط أكتر لو استمر تدفق الاستثمارات الأجنبية .. أو يرتفع لو حصل أي أزمة عالمية زي ارتفاع أسعار الطاقة أو اضطرابات في التجارة.
