الجنيه يكسب معركته أمام الدولار.. ايه اللي بيحصل في سوق صرف العملات الأجنبية
الدولار رجع سعره ينخفض وده بياكد نجاح الحكومة في تعافي الجنيه المصري.. ياتري اية خطة الحكومة لاستمرار تعافي الجنيه المصري.. واية مستهدفات الحكومة مع نهاية 2025.
من فترات طويلة والحكومة المصرية بدأت تنفذ برنامج اقتصادي طموح للنهوض بالاقتصاد المصري هدفه تحسين وضعيته الاقتصاد المصري علشان يكون قادر علي مواجهة الصدمات اللي منتشرة بسبب التوترات والصراعات الجيوسياسية والاقتصادية، وكمان تدبير عدد كبير من مصادر الدخل الدولاري في الناتج القومي، وفتح السوق المصري قدام الاستثمار الأجنبي واخيرا التخارج من عدد من شركات القطاع العام واللي نتائجها بتحقق خسائر علي الدولة المصرية.
برنامج الاصلاح الاقتصادي اللي الحكومة بتطبيقه حقق نتائج كبيرة وده بشهادة عدد كبير من المؤسسات الاقتصادية العالمية وعلي راسهم صندوق النقد الدولي واللي اشاد بنجاح الحكومة في تطبيق برنامج اقتصادي قوي قادر ينافس اقوي الاقتصاديات العالمية، وده اللي خلالنا نوصل للنتيجة الحالية واللي البنك المركزي حققها وسعر الدولار رجع ينخفض تاني لأول مرة تحت 50 جنية لأول مرة من وقت تحرير سعر صرف الدولار بشكل مرن.
طيب ايه اللي خلي سعر صرف الدولار ينخفض في البنك المركزي؟.
كل خبراء الاقتصاد اجمعوا ان السوق المصري بدأ يتعافي بعد انتهاء الصدمة الكبيرة اللي سببتها الرسوم الجمركية اللي فرضها الرئيس الأمريكي دونالد ترامب وده بعد قرار تجميدها لمدة 90 يوم، وتخفيض الرسوم الجمركية علي الواردات الصينية لـ30% والقرارات دي كان لها عامل السحر في عودة هدوء البورصة العالمية، وبالتالي السوق المصري رجع يستعيد عفايته مرة تانية ويستقطب كبري الشركات ورؤس الأموال الأجنبية لبناء وتشغيل المشروعات في مصر .
الفترات اللي فاتت واللي العالم كله كان بيشهد أزمات عالمية بسبب الرسوم الجمركية الأمريكية، السوق المصري استقبل ارقام كبيرة من الأموال الساخنة لشراء أذون وسندات الخزانة ودي واحدة ومن العوامل المؤثرة في قوة العملة المحلية، ودي كانت سببب اساسي من اسباب تعزيز الاستثمارات الأجنبية في السوق المصري وعززت قوة سعر صرف الجنيه قدام العملات الأجنبية .
الأرقام الكبيرة اللي دخلت للاقتصاد المصري من الأموال الساخنة خلت الجنية المصري يسترد أكثر من 3% من قيمته مقابل الدولار، وده اللي خلي الدولار يترجع من 50.73 جنيه في نصف شهر أبريل اللي قات إلي 49.99 جنيه مع نهاية تعاملات بنكي الأهلي ومصر والتجاري الدولي.
السبب الرئيسي في تحسن سعر صرف الجنية المصري كان سببه السياسة النقدية اللي طبقها البنك المركزي بتحرير سعر صرف الجنية المصري بشكل مرن كانت أكبر دليلا على التزامه بالسياسة اللي اتفق عليها مع صندوق النقد الدولي، وده غير أنها قضت علي السوق السودا في التجارة بالعملات الأجنبية وسدت فجوة التمويل الأجنبي، ده غير أنها كانت سبب في عودة تدفقات تحويلات المصريين العاملين بالخارج ووصولها لمستوى قياسي بالوصول لـ 32 مليار دولار من مارس 2024 إلى فبراير 2025 بزيادة 72% على أساس سنوي.
