كاش باك والعروض نزلت.. بداية الانفراجة في سوق السيارات
ايه اللي بيحصل في سوق السيارات دلوقتي وإيه حكاية الانفراجة الكبيرة في السوق اليومين دول وسر الكاش باك والعروض اللي بدأت تنزل وهل الوقت مناسب لشراء سيارة دلوقتي..
سوق السيارات ليه فترة كبيرة بيعاني من ارتفاع أسعار السيارات وتقريبا هو السوق الوحيد اللي مش بيتأثر بسرعة بتراجع الدولار ودا بسبب الدورة الاستيرادية للسيارات واللي لتستمر 3 شهور تقريباً لغاية السيارات ماتوصل السوق من ساعة التعاقد عليها.. لكن اللي حصل في الأيام الأخيرة في سوق السيارات مفاجأة مهمة جدا وهي إن السوق بدأ يتعاطي أخيرا مع توافر الدولار ونزول سعره أمام الجنيه في البنوك على مدار اكتر من شهر تقريبا وفقد اكتر من 190 قرش في الأسابيع اللي فاتت قدام الجنيه.
اسباب تراجع الدولار طبعا هتكون من أهم أسباب هبوط أسعار السيارات في السوق المصري ودا بسبب اعتماد السوق على الاستيراد بشكل شبه كامل سواء استيراد السيارات كاملة التصنيع أو صناعات التجميع أو حتي قطع الغيار ودا اللي بياكده خبراء السوق اليومين دول.
خبراء سوق السيارات أكدوا أن الأسعار بدأت تنزل بشكل حقيقي في الأيام الأخيرة ودا بسبب نزول سعر الدولار وقالوا إن التخفيض بيحصل مع انخفاض تكلفة الاستيراد للسيارة وقطع الغيار في نفس الوقت و قالوا إن عدد كبير من وكلاء ومعارض سيارات في مصر بدأت تطرح تحفيضات وعروض استرداد النقود "كاش باك" للعملاء، خلال إبريل ومايو على عدد كبير من الطرازات بنسب تراوحت من 5 إلى 15% يعني التحار بقوا يرجعوا للمشترين جزء من الفلوس اللي دفعوها عشان الأسعار نزلت بشكل ملحوظ..
التجار قالوا إن سبب طرح العروض دي هي زيادة حجم المعروض من السيارات سواء نتيجة توافر النقد الأجنبي وتيسير إجراءات الاستيراد أو التصنيع المحلي لبعض الطرازات وعشان كمان نمو مبيعات سوق السيارات بقطاعات المختلفة إلى أكتر من 32 الف سيارة تقريبا خلال الربع الأول من 2025 بزيادة 76%، وقادت سيارات الركوب الملاكي الزيادة في المبيعات وسجلت أكتر من 24.1 ألف سيارة خلال الشهور الأولى من العام الحالي مقارنة بحوالي أكتر من 13.4 ألف سيارة خلال الفترة المماثلة من العام الماضي بنسبة نمو سنوي 80% ودا اللي قاله تقرير مجلس معلومات سوق السيارات (أميك).
ومن ناحية تانية وخلال الشهور اللي فاتت أعلن عدد كبير من شركات ووكلاء السيارات بدء العمل على إنتاج وتجميع سيارات محلية بنسبة مكون محلي تجاوزت 40% ومن المخطط افتتاح مصانع جديدة خلال الفترة الجاية لزيادة عدد الطرازات المصنعة محليا و زيادة حجم الإنتاج.
الارقام والبيانات بتقول إن أسعار السيارات هتستمر في النزول في الفترة الجاية مع استمرار توافر الدولار ونزول سعره اكتر ودا بخلاف تسريع وتيرة التجميع والتصنيع المحلي واللي هتفرق بشكل كبير جدا في توفير معروض من السيارات بشكل دايم في السوق وعلى مدار السنة وكل ده هيساعد في تخفيض اسعار السيارات وعشان كده كله بينصح الناس اللي بتفكر تشتري سياره جديدة أو مستعملة أنها تصبر شوية لأن الأسعار كل مالها مابتنزل عشان الأسباب اللي قلنا عليها.
