مش احتفالات بس.. السيسي كان بيعمل ايه في روسيا

إيه المفاجأة في زيارة الرئيس السيسي لروسيا.. وايه هدف الزيارة الحقيق لبلاد القيصر الروسي.. وايه الملفات الاقتصادية اللي فتحها الرئيس السيسي في موسكو وليه علاقتها باللي هيحصل في الأيام الجاية. 

الرئيس السيسي زار مؤخرا العاصمة الروسية موسكو وكان هدف الزيارة المعلن هو حضور الرئيس لاحتفالات النصر الروسية واللي شهدت لأول مرة مشاركة قوات مصرية في العروض العسكرية في روسيا.. لكن في أسباب تانية لزيارة الرئيس السيسي تتخطى برتوكول الزيارة والتهنئة بالاعياد الروسية.

أسعار الغاز الأوروبية ترتفع مع تصاعد النقاش حول حظر واردات روسيا

الرئيس السيسي يوجه بزيادة الاحتياطي

ياترى ايه هي الأسباب الحقيقية وراء الزيارة ؟
لو حضرتك متابع الأخبار هتلاقي إن الرئيس السيسي التقى اكتر من مرة بالرئيس الروسي فلاديمير بوتين واللي بيكن اعتزاز كبير لمصر ورئيسها وظهر دا من الحفاوة الروسية باستقبال رئيس مصر ومشاركة القوات المصرية في الاحتفالات الروسية والرئيس السيسي استغل الزيارة في فتح ملفات اقتصادية مهمة مع الروس أولها زيادة أعداد السائحين الروس إلى مصر بأكبر قدر ممكن ودا وضح من خلال إعلان شركات روسية كبيرة تسييير رحلات سياحيه ضخمة لمصر في الصيف الحالي وخاصة لمدن البحر الأحمر السياحية اللي بيفضلها الروس ومتوقع زيادة ضخمة في اعداد السياح الروس السنة دي ودا لأسباب كتير وهي إن السوق المصري بقي رقم واحد عند الروس والأكثر إمانا بعد الأزمة الأوكرانية ومع ابتعاد السائح والشركات الروسية عن أسواق تانية زي أوروبا وأمريكا بسبب حالة العداء بينها وبين بلادهم ومصر هتحقق أرقام قياسية من السياحة الروسية.

كمان الرئيس الروسي عبر عن دعمه للشراكة الاستراتيجية مع مصر واللي تم توقيعها في 2018 وقال إنها  ركيزة لمزيد من التعاون وإن روسيا منفتحة اكتر على الأسواق المصرية  وروسيا لو فاكرين ليها منطقة صناعية في المنطقة الاقتصادية لقناة السويس، وهي بتبني أهم مشروع طاقة كهربائية في مصر والشرق الأوسط وأفريقيا وهو مشروع محطة الضبعة لتوليد الكهرباء بالطاقة النووية.

مش كده وبس دا بوتين اتكلم كمان عن مستوى جديد من العلاقات الاقتصادية مع مصر فى الفترة الجاية مع انطلاق أعمال اللجنة المشتركة بين البلدين خلال شهر مايو الجاري واللي هتطرق لتوسيع الاستثمارات الروسية في مصر في مختلف المجالات وتوطين الصناعة الروسية ونقل التكنولوجيا  وتعزيز التعاون في مجالات الطاقة والأمن الغذائي والتعدين والزراعة والصناعة بجانب التعاون مع مصر فى مجموعة البريكس.

السيسي استغل العزلة الروسية المفروضة عليها من أوروبا وأمريكا لتوسيع التعاون مع الروس في مختلف المجالات الاقتصادية والتجارية والاستثمارية ودا لأن مصر بديل ممتاز لروسيا بعيدا عن اووربا ومتوقع حدوث نقلة نوعية في التعاون مع روسيا في الفترة الجاية وهنشوف صفقات ضخمة تتيح لروسيا النفاذ للأسواق العالمية عن طريق استغلال موقع مصر الجغرافي والبنية اللوجستية وقربها من الأسواق الدولية.