بدأت النهاردة.. خدمات بنكية مجانية إلحق قبل ما العرض يخلص

هي البنوك بتقدم خدمات مجانية اليومين دوم، طب بمناسبة إيه، وايه هي طبيعة الخدمات دي، وإزاي العميل يقدر يستفيد بيها، والعرض المجاني ساري لحد امته.. هنقولك كل التفاصيل في الفيديو ده فتابعنا للآخر. 
 

من 24 ساعة بالظبط، البنوك اللي شغالة في القطاع المصرفي المصري، بتقدم عدد من الخدمات المجانية، وده بمناسبة اليوم العالمي للادخار اللي بتحتفل بيه البنوك ضمن فعاليات الشمول المالي.

وبدأت فعليا، البنوك في تقديم الخدمات المجانية للعملاء من ساعات وهتستمر  لحد يوم 31 أكتوبر الجاري.

طب إيه هي الخدمات دي؟

بص يا سيدي، أول الخدمات المجانية هي  فتح حساب للعملاء الجدد بدون مصاريف وبدون حد أدنى، وكمان السماح للبنوك بالتواجد خارج فروعها وعرض المنتجات المصرفية.

ومن ضمن الخدمات بردو، إصدار البطاقات المدفوعة مقدمًا مجانا، وإنشاء المحافظ الإلكترونية والتطبيقات البنكية وتشجيع العملاء على تفعيل محافظهم واستخدامها، وكمان تفعيل البطاقات الائتمانية واستخدامها في معاملات الشراء.

طب ده كلام جميل جدا، ظب إيه هي استفادة البنوك من أنها تقدم خدمات وماتخدش عليها فلوس؟

هنا نقدر نقولك إن البنوك بتهتم تقدم   الخدمات المجانية دي كنوع من الترويج لها وزيادة قاعدة عملائها، وده بيحصل خلال الفعاليات المختلفة، ومن ضمنها اليوم العالمي للادخار، اللي بتبتقى حريصة فيه على تعزيز الوعي وتقديم خدمة ومنتجات تساعد الأفراد على بناء مستقبل مالي آمن.

يعني نقدر نقول، إن حضرتك مسموح لك تروح أي فرع بنك قريب لك، وتطلب فتح حساب ومش هتدفع جنيه واحد، وهنا ممكن تختار  حساب جاري أو توفير من غير رسوم أو حد أدنى لفتح الحساب، كمان هتاخد بطاقة ميزة للخصم الفوري مجانا، بجانب بطاقة ميزة المدفوعة مقدما مجانا، وممكن جدا تفتح حساب شمول مالي للشركات ذات النشاط الاقتصادي مجانا بردو.

وهنا، البنك بيعفي العملاء الأقل من 16 سنة من مصاريف إصدار البطاقة المدفوعة مقدما ضمن برنامج الشباب، كمان بيفتح الحساب مجانا بدون الحاجة إلى موافقة ولى الأمر للعملاء من 16 سنة إلى 21 سنة، ومتاح إصدار بطاقات الخصم الفوري مجانا ضمن برنامج الشباب، وكمان إصدار بطاقة الخصم الفوري مجانا مع الإعفاء عن مصاريف إصدار البطاقة الائتمانية في حالة الحصول على قرض شخصي.

كمان هنقولك إزاي تفتح حساب أونلاين برقم البطاقة؟

أول حاجة، حضرتك هتختار البنك اللي أنت عاوز تفتح حساب فيه، بس لازم يكون معاك بطاقة رقم قومي سارية وتكون بتعرف تقرأ وتكتب، بعدين هتقدم طلب على موقع البنك، لفتح الحساب باستخدام الرقم القومي المدون بمستند البطاقة أو جواز سفر يكون ساري.

وأول الخطوات، هي إن من على موقع البنك، تفتح خانة فتح حساب جديد، وبعدين هتدخل الرقم القومي لحضرتك ورقم الهاتف المحمول الخاص بك، بعد كده بيتم إدخال OTP رمز الأمان المرسل على رقم تليفونك اللي عايز تربطه بالحساب.

بعد كل ده، بتقوم بإدخال البريد الإلكتروني الخاص بك، وتجيلك رسالة على الميل عشان يتم التحقق من انك الشخص الصح.

وهتيجي خطوة المستندات المطلوبة، وهنا لازم حضرتك تزور  أقرب فرع للبنك اللى فتحت فيه الحساب، أو ممكن تطلب زيارة موظف البنك لبيتك، ده في حالة لو عايز تنجز نفسك.

وفي النهاية، نقدر نقولك لو انت محتاج أي خدمة من الخدمات المجانية اللي بتقدمها البنوك دلوقتي، فماتترددش قبل انتهاء العرض المجاني.