بالمجان.. إزاي تفتح حساب أونلاين برقم البطاقة

إزاي تفتح حساب في البنك أون لاين من تليفونك وأنت قاعد على الكنبة، وإيه هي المستندات المطلوبة عشان تقدر تنجز الحساب، وهل الموضوع هيتطلب تعمل مشوار للبنك.. هنقولك كل التفاصيل في الفيديو ده. 
 

كتير من الناس دلوقتي بيدوروا على طريقة لفتح حساب في البنك أون لاين، خاصة في الفترة دي، لأن البنوك المصرية بتسمح دلوقتي بفتح الحسابات مجانا و بدون حد أدنى، وده بمناسبة الأسبوع العالمي للشمول المالي واليوم العالمي للادخار، وفقا لما أعلن البنك المركزي المصري.

طب يا ترى إزاي تفتح حساب بنكي أونلاين وبالمجان؟

بص يا سيدي، حضرتك في البداية هتختار البنك اللي أنت عاوز تفتح حساب فيه، بس لازم يكون سنك مش أقل من 21 سنة، كمان لازم يكون معاك بطاقة رقم قومي سارية وتكون بتعرف تقرأ وتكتب.

ومن هنا، تقدر تقدم طلب على موقع البنك، وتفتح الحساب باستخدام الرقم القومي المدون بمستند البطاقة أو جواز سفر يكون ساري.

وأول الخطوات، هي إن من على موقع البنك، تفتح خانة فتح حساب جديد، وبعدين هتدخل الرقم القومي لحضرتك ورقم الهاتف المحمول الخاص بك، بعد كده بيتم إدخال OTP رمز الأمان المرسل على رقم تليفونك اللي عايز تربطه بالحساب.

بعد كل ده، بتقوم بإدخال البريد الإلكتروني الخاص بك، وتجيلك رسالة على الميل عشان يتم التحقق من انك الشخص الصح.

بعد كده، تيجي خطوة المستندات المطلوبة، وهنا لازم حضرتك تزور  أقرب فرع للبنك اللى فتحت فيه الحساب، أو ممكن تطلب زيارة موظف البنك لبيتك، ده في حالة بو عايز تنجز نفسك..

كل ده كان بخصوص فتح حساب من على موقع البنك، طب لو عايز تفتح حساب من خلال أبليكشن البنك أو التطبيق الإلكتروني الخاص به.. تعمل إيه؟

في الأول، حضرتك هتحمل تطبيق البنك، زي تطبيق بنك مصر مثلا، بعدين هتقوم بإنشاء حساب جديد على التطبيق باستخدام بياناتك الشخصية، وتختار نوع الحساب (جاري-توفير - استثماري أو غيره)، بعدين هتدخل البيانات المطلوبة لفتح الحساب زي الاسم والرقم القومي والعنوان وغيرها.

وتحدد الفرع اللي انت عايز تزوره عشان تتمم إجراءات تفعيل الحساب، بس ماتنساش وانت رايح البنك تاخد بطاقة الرقم القومي الخاصة بك، بعد كده البنك هياخد توقيعك وتقدر هنا تاخد رقم حسابك.

طب في ناس بتسأل، هل متاح فتح حساب بنكي وإتمام كل الإجراءات من غير ما تروح للبنك؟

الإجابة، اه ممكن جدا وده بيتم من خلال إن حضرتك تطلب زيارة موظف من البنك لبيتك عشان ياخد توقيعك بس ده متاح لكبار السن وذوي الاحتياجات الخاصة فقط، أما لو الخيار ده مش مناسب لك، فهنا لازم تعمل  التوقيع الحي، يعني تروح للبنك توقع بنفسك.

طيب، هل في تكاليف لفتح حساب في البنك دلوقتي؟

في الفترة الحالية لأ، لأن فتح الحساب مجاني خلال أسبوعين بمناسبة مبادرة البنك المركزي للشمول المالي، ولكن في الأيام العادية بيكون فتح الحساب الجاري بحد أدنى 2500 جنيه بالعملة المحلية و3 آلاف للحساب الجاري ، أو 100 دولار أو يورو للحسابات بالعملات الأجنبية.

وفي النهاية لو حضرتك محتاج تفتح حساب بنكي عشان شغلك أو بيزنس خاص بك، الحق دلوقتي قبل ما العرض المجاني يخلص.