هنوفر 25 مليار دولار... الحكومة هتعمل إيه في تصنيع السيارات

مصر حاليا بتحاول بكل الطرق أنها تنوع قائمة التصنيع المحلي في كل المجالات، واحدة من المجالات دي هيا صناعة السيارات.. ياتري مصر بتعمل اية في المجال ده... واية هيا خطوات مصر لخفض استيراد السيارات من الخارج.. خليكم معانا للآخر وهتعرفوا التفاصيل

كلام الرئيس عبدالفتاح السيسي في وقت افتتاح محطة قطارات صعيد مصر، كشف ارقام معبرة عن حجم الاستيراد المصري من الخارج، واحدة من الحاجات المعبرة اللي اتكلم عنها الرئيس السيسي هيا استيراد السيارات واللي وصل معدل الاستيراد فيها لـ25 مليار دولار. 
طيب مصر بتعمل اية في مجال صناعة السيارات في مصر، واية هيا خطوات وقف استيراد السيارات من الخارج؟.
الدكتور مصطفى مدبولي رئيس مجلس الوزراء، قال أن الحكومة حطت خطة لتطوير قطاع السيارات المحلي في مصر لتغطية الاحتياجات المحلية والتحول إلى التصدير.
رئيس مجلس الوزراء اتكلم كمان وقال أن الحكومة عملت اكتر من اجتماع مع مسئولي كبري شركات السيارات في العالم، وحاليا مصر هتبدأ تصنع 6 طرازات جديدة من السيارات من النهاردة ولحد سنة 2027، ودخول مصر لصناعة العربيات هيشمل كمان تصنيع العربيات الكهربائية.

مدبولي اتكلم عن خطة توطين صناعة السيارات في مصر وقال، أن الدولة بتولي اهتمام خاص بملف توطين صناعة السيارات وده بهدف تخفيض الفاتورة الاستيرادية للسيارات واللي بتكلف الدولة سنويًا ما يقرب من  5.5 مليار دولار، وان خطة الدولة في السنين اللي جاية قايمىة علي التحول من الاستيراد الي تغطية احتياجات السوق المحلي من الانتاج المصري .

طيب اية هيا خطة الدولة لزيادة التصنيع المحلي من السيارات؟.
في الفترة اللي فاتت، مصر تقلت أكتر من عرض من شركات عالمية متخصصة في صناعة السيارات علشان تبدأ تصنيع سياراتها محليا في مصر، خصوصا مع الحوافز والتعديلات التشريعية اللي قامت بيها مصر لجذب الاستثمارات الأجنبية، والمنطقة الاقتصادية لقناة السويس هي المنطقة الأكبر واللي عليها العين من اغلب شركات تصنيع السيارات حول العالم للدخول فيها واقامة المشروعات .

وعلشان نعرف أن مصر حاليا موجود فيها ما يقرب من 17 مصنع لتجميع السيارات بتنتج 100 ألف سيارة سنويا، ولكن الازمات اللي مرت بيها مصر في توفير العملة الصعبة وزيادة الاستيراد  أدي لتراجع إنتاج السيارات بأكتر من النصف، وحاليا السوق المصري بيعتمد بحد كبير علي الاستيراد.

خطة الحكومة لتوطين صناعة السيارات بتستهدف كمان توطين صناعة العربيات الكهربائية وفعلا الحكومة حاليا بتخطط لتأسيس مصنع مخصص لتصنيع السيارات الكهربائية  محلياً والمصنع ده هيكون على مساحة 50 ألف متر مربع، وحاليا وزارة قطاع الأعمال العام بتعمل مناقشات متقدمة مع شركة صينية لإعادة إحياء مشروع إنتاج السيارات الكهربائية المملوكة للدولة من خلال شركة النصر للسيارات بالإضافة لشريك أجنبي تاني هيدخل مع الدولة ومتوقع انه يتم توقيع عقود تدشين مشروع العربيات الكهربائية في مصر مع نهاية السنة دي لبدء التصنيع المحلي للعربيات الكهربائية .