دهب ولا عقارات.. شوف أفضل وسيلة لاستثمار فلوسك دلوقتي
لو أنت معاك فلوس وعايز تستثمرها، تحطها في الدهب ولا في عقار، أنهي واحد بيكسب أكتر وفي أقل وقت، وكمان مخاطره قليلة، وامته بالظبط تاخد القرار الصحيح.. هنقولك كل التفاصيل في الفيديو ده فتابعنا للآخر.
كتير من المصريين بيحتاروا يحطوا فلوسهم أو تحوشيتهم في إيه، دايما بيستشيروا خبراء وناس فاهمة، وفي النهاية بياخدوا القرار الصح والمناسب ليهم، واللي غالبا بيكون يا دهب يا عقار.. طب انهي أفضل؟
بص يا سيدي، خيارات الاستثمار في الدهب أو العقارات هي الأكثر شيوعًا وانتشار ا بين ناس كتير، سواء كانوا ناس عادية محوشة فلوس، أو مستثمرين، وده بهدف الحفاظ على المدخرات أو تحويشة العمر، في ظل الظروف والأوضاع الاقتصادية اللي بيشهدها العالم دلوقتي، خاصة التوترات الجيوسياسية وارتفاع معدلات التضخم العالمي.
نيجي للسؤال، هل الدهب أفضل أم العقارات، وإيه مميزات وعيوب الاتنين؟
الخبرا بيقولوا إن الدهب من الأصول الأكثر انتشارًا وجذبًا للمستثمرين على مستوى العالم، لأنه الملاذ الآمن للاستثمار، كمان بينفرد الدهب بمجموعة مميزات، وهي أنه آمن ضد التضخم، لأن مع وجود ارتفاع للتصخم، نلاقي سعر الدهب يعلي، وده كمان بيحصل في حالة انخفاض قيمة العملات، فالدهب دايما في المنطقة الآمنة.
كمان الدهب يتميز بأنه صاحب سيولة مرتفعة، بمعنى ممكن جدا تبيعه بسهولة في أي وقت، وده بييجعله خيار مرن للادخار أو الاستثمار، وده بالإضافة لانه صاحب تاريخ طويل من القيمة العالية طويل كوسيلة للحفاظ على قيمته المالية.
ولكن رغم المميزات دي، إلا أن في عيوب للاستثمار في الدهب مقابل العقارات، وهي عدم تحقيق عوائد إيجارية زي العقار ، يعني مش هيجي منه إيجار شهري، وده سبب كافي يخلي الدهب أقل جاذبية للمستثمرين اللي بيبحثوا عن دخل مستمر.
ضيف على ده تقلبات الأسعار، فرغم أن الذهب ملاذ آمن، إلا أن أسعاره طالع نازلة، يعني بتشهد تقلبات سريعة وبشكل كبير.
طيب بعيدا عن الدهب، هل الاستثمار في العقارات مربح؟
نقدر نقول، إن النوع ده من الاستثمار مختلف بشكل كبير عن أي حاجة تانية، لأن العقار بيوفر دخل شهري ثابت في حالة إنك أجرته، والسبب ده بيعلى أسهم العقار عن المستثمرين.
كمان بيمتاز العقار بزيادة القيمة، فمع مرور الوقت بيحقق مكاسب كبيرة، ممكن كمان تكون في مزايا ضريبية متعلقة بالعقارات.
ولكن كل المزايا دي، في عيوب للاستثمار في العقارات، وهي التكاليف العالية، لأن الاستثمار في العقارات بيتطلب رأس مال كبير بالإضافة لتكاليف الصيانة والضرائب.
وفي عيب كمان وهو السيولة المنخفضة، لأن بيع العقار بياخد وقت طويل، وده معناه إن من الصعب تحويله إلى فلوس بسرعة.
ممكن كمان العقار يتعرض للمخاطر، لأن أسعاره بتتأثر بتغيرات السوق والاقتصاد، وده ممكن يؤدي إلى فقدان القيمة.
ونقدر نقولك عزيزي المشاهد، لو حضرتك بتدور على دخل ثابت فالعقارات هي الخيار الأفضل لك، اما إذا كان الهدف هو الحفاظ على فلوسك ضد التضخم فالدهب هيكون خيار كويس جدا.
يعني من الآخر، مافيش اختيار مناسب للجميع، حضرتك اازم تقيم ظروفك وتحدد أهدافك وبعد كده تختار الحل الأنسب لك عشان تستثمر فلوسك صح .
