قبل الزيادة.. اعرف أرخص أسعار باقات الإنترنت

هي أسعار باقات النت هتغلى قريب؟ ، طب لو زادت إيه هي أفضل وأرخص الباقات اللي ممكن حضرتك تشترك فيها من دلوقتي، بحيث انك تضمن خدمة كويسة وبسعر مناسب قبل ما يتطبق قرار الزيادة، وفي حالة إنك اشتركت عليها واتطبقت الزيادة ماتكونش غالية عليك أوي.. هنقولك كل التفاصيل في الفيديو ده.
 

مع زيادة الكلام عن حدوث زيادة جديدة في أسعار باقات الإنترنت وكروت الشحن واللي شركات الاتصالات ممكن تطبقها قريب، رجعت الشركات تفكر العملاء بأسعارها القديمة.

وده بيجي بعد ما رئيس الجهاز القومي لتنظيم الاتصالات، قال إن هيحصل زيادة في أسعار خدمات الاتصالات خلال الفترة الجاية، وأكد إن الموضوع ده حتمي وواجب ومافيش كلام فيه.

عشان كده، شركات المحمول اللي شغالة في مصر، أعلنت عن أرخص أسعار باقات الإنترنت المنزلي في مصر، وهي باقات super من المصرية للاتصالات، 140جيجا بايت سعرها 160 جنيه شهريا، و200 جيجا بايت سعرها 225 جنيه، و250 جيجا بايت سعرها 280 جنيه، و400 جيجا بايت سعرها 440 جنيه، وكمان باقات mega، فال 250 جيجا بايت بسعر 410 جنيه شهريا.

نيجي لأورانج، أرخص باقة 140 جيجا بايت سعرها 160 جنيه شهريا، و200 جيجا بايت سعرها 225 جنيه، أما ال 250 جيجا بايت فسعرها 280 جنيه، وال 300 جيجا بايت سعرها 325 جنيه.

أما  فوادفون، فهي 140 جيجا بايت سعرها 160 جنيه، وال 200 جيجا ب 225 جنيه، وال 300 جيجا بايت سعرها 330 جنيه.

أخيرا، أسعار إي آند مصر أو اتصالات، ال 140 جيجا بايت سعرها 160 جنيه، وال200  جيجا بايت سعرها 225، وال 300 جيجا بايت سعرها 330 جنيه، واللي 250 جيجا بايت سعرها 410 جنيه.

وماتنساش، إن شركات الاتصالات، كانت بتطلب من شهور من القومي لتنظيم الاتصالات، السماح لها برفع أسعار خدماتها اللي بتشمل كروت الشحن وباقات الإنترنت، وده بعد ما حصل زيادة لأسعار الوقود، وتحرير سعر صرف الجنيه، وأكدت أنها بتعتمد على السولار والمازوت اللي أسعارهم ارتفعت، عشان تشغل أبراج المحمول بتاعتها الموجودة في كل محافظات الجمهورية.

والكلام عن زيادة أسعار باقات النت وكروت الشحن، جه بالتزامن مع إطلاق الجيل الخامس للمحمول، لأن امبارح الدكتور عمرو طلعت، وزير الاتصالات وتكنولوجيا المعلومات، شهد توقيع منح ترخيص تشغيل خدمات الجيل الخامس للتليفون المحمول بين الجهاز القومي لتنظيم الاتصالات، وشركات المحمول في مصر؛ زي أورانچ وڤودافون وإي آند مصر اللي هي اتصالات.

وعشان تعرف هتستفيد إزاي من تشغيل خدمات الجيل الخامس، فهي هتنعكس بالإيجاب على سرعات الإنترنت وكمان الاقتصاد القومي، ومش بس كده لأ ده كمان على ترتيب مصر في المؤشرات الدولية في قطاع الاتصالات وتكنولوجيا المعلومات، باعتبارها إحدى الركائز الأساسية في تعزيز البنية الرقمية للدولة

كمان، تقنيات الجيل الخامس هيساهم بسكل كبير في تحقيق التحول الرقمي، عشان هيتيح لشبكات الجيل الخامس سرعات فائقة تدفع عملية التحول الرقمي وتحقق رؤية مصر لأهداف التنمية، كمان بتُعتبر تقنيات الجيل الخامس عامل محوري في تعزيز وتوسيع خدمات إنترنت الأشياء، واللي بيعتبر من أهم ركائز الثورة الصناعية الرابعة، عشان بيشغل منظومات المدن الذكية والخدمات الرقمية بقطاعات الدولة المختلفة.

يعني من الآخر، خليك ناصح واختار باقة كويسة ومناسبة وماتكلفكش كتير