"فيزا مشتريات" لكل مواطن وتخفيض على تذاكر المترو.. مفاجآت الدعم النقدي

هو ليه الدعم النقدي بقى حديث كل وسائل الإعلام دلوقتي، يا ترى الحكومة بتفكر تطبقه امته، وإيه طبيعة الدعم النقدي ده، والمواطن هيقدر يستفيد بيه كل شهر إزاي، وهل هيكون متقصر على السلع الأساسية بس ولا ممكن يوصل لخدمات تانية، هنقولك كل التفاصيل في الفيديو ده فتابعنا للآخر. 
 

لسه ملف الدعم النقدي زي ما قولنا حديث الساعة أو تريند على جوجل والسوشيال ميديا، وده حصل بعد ما طلع الدكتور مصطفى مدبولي رئيس مجلس الوزراء وقال إن تم إحالة الملف للحوار الوطني للمناقشة وإبداء رأي عشان يبدأ التنفيذ.

طب إيه هو الدعم النقدي ده؟

بص يا سيدي، بالمختصر كده الدعم النقدي هو مستحقاتك في التموين هتتحول لفلوس، يعني بدل ما تاخد زيت وسكر ومكرونة والذي منه، هتاخد فلوس كل شهر، زي مرتب كده، وبيه حضرتك تقدر تشتري احتياجاتك اللي عايزاها وتخلص من فكرة السلع المفروضة عليك من وزارة التموين.

كل الكلام ده بيندرج تحت جملة التحول من الدعم العيني اللي هو التموين إلى الدعم النقدي، ولكن رغم ده، في ناس كتير بتسأل مين اللي هيستفاد بيه ومين الغير مستحق؟

الإجابة هي، إن لو حضرتك بتاخد تموين هتبقى مستحق للدعم النقدي واللي بيقدر بمبلغ يقرب من 200 جنيه كل شهر للفرد الواحد، يعني لو أسرة مكونة من 4 أفراد هتاخد 800 كل شهر.

وبلغة الأرقام كده، ففي حوالي 64 مليون مواطن مصري، هيستفيوا من الدعم النقدي، واللي هم مسجلين في التموين، وبياخدوا كب شهر سلع تموينية بقيمة 50 جنيه للفرد الواحد.

ومن هنا، أكد الدكتور مصطفى مدبولي، رئيس مجلس الوزراء، خلال اجتماع الحكومة الأسبوعي، أن الملف ده تم توجيهه للحوارالوطني للوصول إلى قرار بشأنه، وقال إن الحكومة ملتزمة بتطبيق ما سيتم التوصل إليه من توصيات وقرارات بخصوص الملف ده، ومش بس كده، لأ ده كمان قال إن الشكل المطبق بيه ملف الدعم حاليا غير مقبول، والدولة على استعداد لضخ المزيد من الأموال الموجهة لملف الدعم، ولكن لازم تضمن أنه موجه للمستفيدين الحقيقيين من الطبقات الفقيرة والمتوسطة المستحقة للدعم.

أما الدكتور شريف فاروق، وزير التموين والتجارة الداخلية، فاتكلم عن آلية التطبيق، وقال إن تطبيق الدعم النقدي في حالة التوافق عليه، هيكون بشكل متدرج وتجريبي في بعض المناطق أولا، ومتوقع جدا مع بدابة الستة المالية الجديدة يتم تطبيقه بشكل كامل، والوزير أكد كمان إن الشغل الشاغل لوزارة التموين دلوقتي، هو السيطرة على الفساد سواء في الدعم العيني أو النقدي.

يعني ببساطة كل الكلام ده بيؤكد إن هدف الحكومة من التحول من الدعم العيني إلى الدعم النقدي، هو توصيل الدعم إلى المستحقين،  منع الهدر في السلع أو الاستيلاء على مخصصات بعض المستفيدين بالبطاقات التموينية.

وعشان كده، الدعم النقدي هيوصل للمواطن عن طريق( فيزا) بطاقة مشتريات هيسمح باستخدامها داخل منافذ بعينها، وهتكون قاصرة على عدد من المنتجات والسلع وكمان الخدمات، وكمان هيتم تطوير جميع     المجمعات الاستهلاكية عشان تواكب هذا التغيير.

ومن المتوقع أن يتم السماح للمستفيد باستخدام بطاقة الدعم الجديدة في الحصول على الخدمات زي تذاكرالمترو و القطار، وكمان الخدمات الطبية، لكن الكلام ده لسه في إطار البحث والدراسة والنقاش حتى الأن.

وماتنساش، إن التحول للدعم النقدي هيقضي على عملية الضرب الوهمي للخبز أو العيش، يعني هيتم اضافة مبلغ الدعم المخصص للخبز على بطاقة الدعم ، و بكده ينفع حضرتك تشتري احتياجتك الفعلية من العيش فقط، وباقي المبلغ ممكن تستفيد منه في الحصول على سلع أخرى وخدمات تانية.