قرار مفاجيء من صندوق النقد .. إيه اللي بيحصل فى الكواليس ؟

يا ترى ليه تم تأجيل المراجعة الرابعة لبرنامج صندوق النقد الدولي مع مصر؟ وهل فيه تطورات حصلت فى الأيام الأخيرة بين الحكومة ومسئولي الصندوق؟ وامتى هتتم المراجعة بالظبط ؟ وهل اول ما تخلص المراجعة هنستلم الشريحة الجديدة من قرض ال 8 مليار دولار؟

من فترة انتشرت معلومات بتقول ان صندوق النقد هيعمل المراجعة الرابعة لبرنامج الاصلاح اللى بتنفذه الحكومة وكلنا  كنا مستنيين نتيجة المراجعة دي  بس فجأة النهاردة المراجعة اتأجلت وفقا برضوا لتسريبات صحفية

بس يا ترى ليه التأجيل حصل  ؟ وإيه اصلا المراجعة دي؟

المراجعة دي زي امتحان كده، صندوق النقد الدولي بييجي يتأكد إننا ماشيين صح في الخطة اللي اتفقنا عليها عشان نصلح اقتصادناو لو النتيجة كانت كويسة هنقدر ناخد فلوس تساعدنا نعمل مشاريع جديدة ونحرك الاقتصاد.. ودي كانت من شروط الاتفاق مع الصندوق ان القرض يصرف على شرايح وكل شريحة يسبقها عملية مراجعة

أما ليه المراجعة اتأجلت من اكتوبر ل نوفمبر؟

فيه شوية اسباب كده خلوا المراجعة يتم تأخيرها شهر اضافي .. أهمها ان  صندوق النقد الدولي بيعقد اجتماعات سنوية مهمة جداً، وده بيأثر على جدول أعماله وبيخليه فى احيان كتير يأجل بعض الملفات وتانيها ان الصندوق بيمنح الحكومة وقت اضافي لتنفيذ مزيد من الإصلاحات الإقتصادية عشان  عايز يتأكد إن كل حاجة ماشية كويس.. بالاضافة الى ان فيه قوانين جديدة كتير الحكومة المصرية اقرتها الفترة اللى فاتت والمسئولين فى الصندوق عايزين  يتأكدوا إن القوانين دي هتساعد في تحسين الاقتصاد.

يعنى مفيش مشاكل بين الصندوق والحكومة المصرية؟

لا مفيش اى خلافات أو مشاكل بين الصندوق ومسئولى الحكومة بالعكس الصندوق كان طلع من فترة قريبة واشاد بالاصلاحات اللى عملتها ولسه بتعملها الحكومة واعلن كمان تخفيف بعض شروط اقراض مصر مع بعض التسهيلات التانية للحكومة

والحكومة عملت بعض الإجراءات خلال الشهور اللى فاتت ضمن الاتفاق مع صندوق النقد الدولي منها زيادة أسعار الوقود البنزين والسولار والغاز الطبيعي والمازوت وأنابيب البوتاجاز واسعار تذاكر القطارات والمترو ورفعت الحكومة أسعار الكهربا وفقاً لشرايح الاستهلاك بداية من شهر أغسطس اللى فات .

وأعلن رئيس الوزراء مصطفى مدبولي في نهاية شهر يوليو أن الحكومة المصرية وضعت خطة من 4 إلى 5 سنين لتحرير أسعار الكهرباء وقال انه هيتم فرض زيادات طفيفة على الشرايح اللي تشمل 80% من الشعب المصري.

نيجي للسؤال المهم هو متوقع امتى المراجعة الرابعة تنتهى ومصر تحصل على الشريحة الجديدة من قرض الصندوق؟

المراجعة زي ما تم الاعلان هتحصل فى شهر نوفمبر وغالبا هتحصل على نهاية الشهر وبعدها فى اجتماع للمجلس التنفيذي لصندوق النقد فى شهر ديسمبر هتعرض عليه نتيجة المراجعة وبناء عليه هيقرر صرف الشريحة الجديدة من قرض ال 8 مليار دولار واللى هتوصل الى مليار و300 مليون دولار