إزاي مصر تستفيد من سوق تريليونية جديدة.. شوف التفاصيل
سوق بتريليونات الدولارات لسه مصر بعيدة عنها لكن قدامها فرصة تكسب مليارات الدولارات منها.. إيه السوق دا وإيه قصة تريليونات الدولارات دي وإيه هي فرص مصر منها.. تعالو نشوف التفاصيل في التقرير دا خليكم معانا للنهاية.
العالم مليان فرص وفي الخارج كل حاجة بتصلح للاستثمار والمكسب حتى المجالات اللي فاكرينها مجرد ترفيه ولعب زي السوق الرياضية واللي اتحولت لصناعة عالمية ضخمة بقيمة سوقية وصلت 1.3 تريليون دولار.
ايه صناعة الرياضة دي بقي؟
شوف حضرتك هي ببساطة كده كل نشاط اقتصادي ليه علاقة بالرياضة بمختلف اللعبات بداية من كوتش اللعيب لغاية حقوق الرعاية العالمية والتذاكر والتسوق والاستادات والاعلانات وكل اللي ليه علاقة بصناعة الرياضة وعشان نعرف أهمية الاستثمار دا تعالو نشوف الأرقام بتقول إيه.
شوف حضرتك صناعة الرياضة صعدت بتجارة التجزئة الخاصة بيها إلى 475 مليار دولار وفق أخر دراسة وبتنمو بمعدل سنوي يفوق 7%، وفيه توقعات إنها هتتجاوز سوق المعدلات الرياضية 89 مليار دولار بحلول 2027 وكمان التوقعات بترجح ارتفاع قيمة النشاط الرياضي إلى 1.8 تريليون دولار إذا تم إضافة سلاسل الإنتاج في القطاعات التانية زي النقل والطعام والشراب وغيرها.
زي ماقلنا صناعة الرياضة، مبقتش مجرد منافسات وبطولات، لكن دي بقت صناعة ضخمة يعتمد عليها العديد من الدول في نموها الاقتصادي.
طيب مصر فين من صناعة الرياضة؟
شوف بدأت مصر خطوات جادة للحاق بتلك الصناعة وجني مكاسبها، ودا من خلال تحقيق مقومات الصناعة، وصناعة الرياضة في مصر دلوقتي بتشكل 25% من حجم الاستثمار الرياضي في الوطن العربي، ودي نسبة كبيرة جدا وبتساهم كمان بنسبة 2.7 % من إجمالي الاستثمارات في القطاعات المختلفة داخل مصر، وبنسبة 8% من الاستثمار في القطاع السياحي والمرتبط عائده بقطاع الرياضة، بحسب دراسة للمركز المصري للدراسات الاقتصادية.
الحكومة انتبهت بدري لأهمية صناعة الرياضة وعملت تغيرات كبيرة على مدار السنين اللي فاتت، بداية من 2017 لما اصدرت قانون الرياضة رقم 71 لسنة 2017، لمواكية التغيرات العالمية في مجال الرياضة وعدم حصرها في إطار الأنشطة والممارسة بس والتعامل معاها على إنها صناعة ونشاط استثماري، وفتح مجال الاستثمار
والحكومة نفذت خطة لتطوير استادات مصر وهيئاتها الرياضية، عشان تكون مؤسسات رياضية اجتماعية ترفيهية اقتصادية شاملة، بأحدث المعايير والتكنولوجيا العالمية، وتحويل المنشآت الرياضية إلى المستوى العالمي، وتجهيزها لاستضافة أهم الأحداث والبطولات.
طيب إيه هي مقومات صناعة الرياضة؟
شوف ياسيدي فيه شركة إنجليزية هولندية متعددة الجنسيات متخصصة في التحليل عملت دراسة لسوق صناعة الرياضة ووصلت لنتيجة إنه أي دولة عاوزة تعمل صناعة رياضة حقيقية يبقي لازم يكون عندها امكانيات معينة زي الممتلكات والخدمات زي الأندية الرياضية القوية والمرافق الرياضية، وإنشاء الملاعب والتشغيل والتأجير والاستفادة القصوى والعلامة التجارية للنادي وغيرها.. تاني حاجة هي الأحداث الرياضية ودي عن طريق قدرة الدولة على تنظيم واستضافة الأحداث الرياضية وإدارتها، وتعود بالفوائد على الاقتصاد والدولة، من الناحية المالية والثقافية والسياحية والاجتماعية.
وكمان مبيعات السلع الرياضية ودي بتشمل منتجات العلامات التجارية للأندية والإكسسوارات الرياضية ومبيعات التذاكر وحقوق النقل والإعلانات والتسويق الرياضي واللي بيعتبر عصب صناعة الرياضة في العالم.
