ليه الحكومة بتبيع حصصها في البنوك؟ إيه اللى بيحصل بالظبط ؟
يا ترى ليه الحكومة بتبيع حصصها فى بعض البنوك ؟ وايه علاقة ده بالأزمة الاقتصادية اللى مصر بتعانى منها فى اخر 3 سنين ؟ وازاى بنبيع حصص فى بنوك وشركات كسبانة ؟
فى الأيام الأخيرة بتجري الحكومة محادثات متقدمة لبيع حصتها المتبقية في بنك الإسكندرية البالغة 20% إلى مجموعة إنتيسا سان باولو لتكون أول عملية بيع كبيرة للأصول من قبل الحكومة من وقت تعويم الجنيه الأخير في مارس اللى فات.. وبعد انهاء الصفقة دي هت صبح ملكية المجموعة المصرفية الإيطالية 100% في بنك الإسكندرية .
وبتحظى الصفقة دي تحديدا بمتابعة المستثمرين وصندوق النقد الدولي باعتبارها إشارة على التزام الحكومة الجديدة ببرنامج خصخصة أصول الدولة بعد الاعلان عن سياسة ملكية الدولة فى نهاية السنة اللى فاتت .
فى نفس الوقت تقريبا قرر البنك المركزي طرح حصة من أسهم المصرف المتحد في البورصة المصرية وبيعمل حاليا على الحصول على الموافقات المطلوبة المتعلقة بالطرح بما فيها موافقات الهيئة العامة للرقابة المالية والبورصة المصرية.. والتوقعات بتقول ان الطرح ممكن يتم قبل نهاية الربع الأول من عام 2025، مع مراعاة ظروف السوق والحصول على الموافقات التنظيمية في الوقت المناسب.
والمصرف المتحد واحد من البنوك المصرية اللى بتتمتع بمكانة قوية في القطاع المصرفي نظرا لتنوع منتجاته وقاعدة عملائه اللي بتشمل الأفراد والشركات والمؤسسات الصغيرة والمتوسطة بالإضافة إلى تقديم الخدمات المصرفية الإسلامية وغيرها من خلال كوادر بشرية ذات كفاءة عالية، بجانب التزام البنك بقواعد الحوكمة السليمة وأفضل الممارسات الدولية اللي بتتماشى مع القواعد والقوانين السارية مع الأداء المتميز والنمو المستدام.
وبيضم المصرف المتحد وذراعه المالي غير المصرفي شبكة واسعة من الفروع تبلغ 68 فرع و225 جهاز صراف آلي بالإضافة إلى قنوات رقمية متطورة ويعمل به حوالي 1800 موظف،
طب السؤال المهم .. هو ليه الحكومة بتبيع أصول كسبانة ؟
بص يا سيدي وفقا لخطة معلنة فالدولة الفترة الجاية هتتخارج بشكل تدريجي من كتير من القطاعات لصالح القطاع الخاص والمستثمرين الأجانب فى اطار برنامج الطروحات الحكومية اللى أعلنت عنه الدولة قبل كده واللى بيضم اكتر من 40 شركة وفيه منهم كمان 3 بنوك والهدف هو توسيع مشاركة القطاع الخاص فى الناتج المحلى الاجمالى وكمان ده كان واحد من شروط صندوق النقد الدولى للموافقة على منح مصر قرض بثثيمة 8 مليار دولار
أما بقا ليه الدولة بتبيع مؤسسات كسبانة .. فتعالى اقولك ليه
اى مستثمر هيحط فلوسه فى مصر طبيعي مش هيروح للشركات الخسرانة هو عاوز شركات شغالة وبتنتج وبتحقق ارباح عشان يضخ فلوسه فيها وهو مطمن انه هيكسب لأن ده مستثمر اجنبي كل اللى يهمه هيصرف كام وهيكسب اد ايه وعشان كده الحاجات المطروحة سواء شركات او مصانع او محطات انتاج معظمها شركات ناجحة وبتكسب بس الدولة خلاص هتشيل ايدها من الاقتصاد وهتوسع للقطاع الخاص
