ركب الصاروخ.. إيه اللي بيحصل لأسعار الدهب؟

خلاص ركب الصاروخ.. إيه اللي بيحصل في سوق الدهب، وليه سعر الجرام قفز 40 جنيه مرة واحدة خلال أقل من 24 ساعة، وأسعار المعدن الأصفر رايحة على فيه الأيام الجاية.. هنقولك كل التفاصيل في التقرير دة فتابعنا للآخر. 
 

في الساعات الأخيرة، أسعار الدهب في السوق المحلي ارتفعت بشكل كبير، وكسرت الزيادة حاجز الـ40 جنيه في الجرام الواحد، وده مش بس لعيار 21، لأ ده حصل لمعظم الأعيرة الدهبية.

عشان كده عيار 21 الأشهر والأكثر شراء بين المصريين سجل حوالي 3505 جنيه للبيع و 3525 جنيه للشراء، وده بيعتبر ارتفاع مفاجئ للأسعار

أما عيار 14 الأقل فئة فسجل حوالي 2343 جنيه للبيع و2356 جنيه للشراء، وكمان عيار 18 سجل نحو 3004 جنيه للبيع و 3021 جنيه للشراء، أما الجنيه الذهب فسجل نحو 28.2 ألف جنيه للشراء و 28.04 ألف جنيه للبيع.

ونيجي لأغلى أعيرة الدهب وهو عيار 24، واللي سجل هو كمان حوالي 4005 جنيه للبيع و4021 جنيه للشراء.

وعلى أرض الواقع ووفقا لبورصة الدهب، فأسعار المعدن الأصفر خلال الساعات الأخيرة، ركبت الصاروخ، وبيرجع السبب في الارتفاع ده لتقلبات السوق، واللي حصلت بعد قرار بنك الاحتياطي الفيدرالي بخفض أسعار الفائدة بشكل ملحوظ يوم الأربعاء اللي فات، عشان كده اتجهت التوقعات لإمكانية انخفاضها بمقدار 50 نقطة أساس أخرى بحلول نهاية السنة دي.

ضيف على ده، إن صناع السياسات في الفيدرالي الأمريكي، قالوا إن أسعار الفائدة ممكن تنخفض إلى 3.4٪ في سنة 2025، مقارنة بتوقعات سابقة بلغت 4.1٪، ومن المتوقع جدا أنها توصل إلى 2.9٪ في سنة 2026، بعد ما كانت التوقعات بتشير إلى نسبة 3.1٪، وكل ده طبعا ساهم في زيادة الطلب على الدهب، لأنه ملاذ آمن للاستثمار والادخار كمان في ظل تقلبات السوق وانخفاض سعر الدولار في السوق المحلية.

لكن المخاوف مازالت مستمرة بخصوص تباطؤ النمو الاقتصادي في الولايات المتحدة والصين، بالإضافة إلى التوترات الجيوسياسية المتصاعدة في الشرق الأوسط، لأن كل ده بيدعم أسعار الدهب خاصة وسط حالة من عدم اليقين السياسي في الولايات المتحدة قبل الانتخابات الرئاسية اللي هتحصل في شهر نوفمبر الجاي، عشان كده كل البنوك المركزية بتحوط نفسها كويس بالدهب.

وقياسا على مصر، فاللي حصل إن  أرصدة الدهب عند البنك المركزي ارتفعت إلى 498.234 مليار جنيه بنهاية شهر أغسطس الماضي، مقابل 479.386 مليار جنيه بنهاية يوليو السابق، ومن هنا احتياطي الدهب بيسجل ارتفاع بقيمة 18.848 مليار الجنيه، فكل ده مؤشر إيجابي جدا للاقتصاد المصري، لكنه لا يعكس إمكانية التنبؤ بأسعار الدهب في الشهور الجاية.

عشان كده، لو حضرتك بتفكر تنزل تشتري دهب عشان تحافظ على فلوسك، فماتترددش وانزل دلوقتي.