بعد مفاجأة مدبولي.. شوف خطة الدولة لعدم العودة لقطع الكهرباء

مجلس الوزراء اعلن وبشكل رسمي عدم العودة لخطة تخفيف الأحمال وقطع الكهرباء علي البيوت، الدولة هتأمن خطة استمرار التيار الكهربائي ازاي..واية خطة الحكومة لتوفير المواد البترولية اللازمة لتشغيل محطات توليد الكهرباء .. خليكم معانا للآخر وهتعرفوا التفاصيل.

كل دول العالم عندها مشاكل وخاصة في قطاع الكهرباء ، بس في الحكومة الجديدة، الحكومة بتاعتنا اللي بتوعد بيه بتعمله، وده فعلا اللي حصل لما الحكومة أعلنت قدام الشعب كله التزامها بوقف خطة تخفيف الأحمال علي الشبكة بنهاية العام الحالي، وفعلا الحكومة كانت قد كلمتها وفعلا رئيس مجلس الوزراء الدكتور مصطفي مدبولي طلع واتكلم وقال انه مفيش عودة لخطة تخفيف الأحمال ومفيش قطع كهرباء بالساعات تاني ولا في جداول لقطع الكهرباء علي الناس في البيوت والايام اللي كانت بيحصل فيها الكلام ده انتهت للابد.

طيب الحكومة هتأمن قطاع الكهرباء ازاي في الفترة اللي جاية علشان ميحصلش قطع في الكهرباء جديد؟.
الدكتور مصطفي مدبولي اتكلم وصارح الشعب بالحقائق الاقتصادية الموجود عندنا وقال أن الحكومة ملتزمة بالوعد اللي قطعته علي نفسها ومفيش عودة لخطة تخفيف الأحمال وبيتم توفير احتياجات محطات انتاج الكهرباء من الوقود اللازم للتشغيل، وأكد كمان أن الحكومة هتعلن وبشكل رسمي ايقاف عملية تخفيف الأحمال مع نهاية عام 2024 وبداية عام 2025.

مدبولي قال كمان أنه عمل اجتماعات كتيرة جدا في الشهرين اللي فاتوا لضمان توفير شحنات وقود محطات توليد الكهرباء وكمان تأمين احتياجات كل احتياجات الوقود اللي هتحتاجها الدولة المصرية، وجدد وعده للشعب المصري وقال الكهرباء مش هتقطع مرة تانية ومفيش عودة لتخفيف الأحمال تاني .

مدبولي اتكلم كمان عن الفترة اللي فاتت وقال قطع الكهرباء لما زاد وكانت الاوضاع هتخرج عن السيطرة، الدولة اتدخلت ووفرت تأمين 1.180 مليار دولار لتغطية احتياجات الوقود اللازم لتشغيل محطات توليد الكهرباء لشهور الصيف علشان ميحصلش قطع للكهرباء مرة تانية، وحاليا المبلغ المطلوب تجاوز 2.5 مليار دولار لتوفير احتياجات تشغيل المحطات، والحكومة عندها خطة حاليا لتأمين الشحنات وإدارة المنظومة بالكامل لضمان عدم قطع للكهرباء مرة تانية، وعلشان الحكومة تتلافي الارتفاعات اللي بتحصل في اسعار الطاقة بشكل عام.

طيب ازاي الحكومة هتامن محطات توليد الكهرباء في السنين اللي جاية وهل هنفضل نستورد وقود لتشغيل محطات توليد الكهرباء كده علي طول .

رئيس مجلس الوزراء اتكلم كمان وقال أن الحكومة بتسعى لإضافة 4 جيجاوات من الطاقة المتجددة  من طاقات الشمس والرياح في السنة اللي جاية، وفعلا تم عقد اجتماع مع وزير الكهرباء ووزيرة التخطيط لمناقشة تأمين استثمارات إضافية لرفع كفاءة شبكة التوزيع والنقل لاستيعاب الطاقة الجديدة، وفي 7 مليار جنيه الدولة خصصتهم لوزارة الكهرباء لتنفيذ مشاريع الطاقة المتجددة لحد فصل الصيف اللي جاي .
مدبولي اتكلم وقال ان جزء من أهداف الزيارة اللي قام بيها للمملكة العربية السعودية كانت للاتفاق علي تسريع مشروع الربط الكهربائي بين البلدين، وده هيساهم في تبادل الأحمال خلال ساعات الذروة علشان يكون في تأمين للطاقة بين البلدين .