أمجاد الجنيه راجعة تاني .. ليه مصر بتعمل اتفاقيات تبادلة عملات محلية ؟
يا ترى ليه مصر بتعمل اتفاقيات تبادل عملات محلية ؟ وايه تأثيرها على أزمة الدولارفى مصر ؟ وهل ممكن الاتفاقيات دي تعيد امجاد الجنية من جديد ؟
فى الكام ساعة اللى فاتوا تم الاعلان عن بدء المفاوضات بين مصر والسعودية للتعامل بالجنية والريال بدلا من الدولار فى التعاملات التجارية بين البلدين.. وقبل كده مصر خطت خطوات مهمة فى الوصول الى اتفاقيات تبادل عملات مع أكتر من دولة
بس السؤال المهم هو ليه أصلا مصر بتعمل الاتفاقيات دي ؟
أكيد حضراتكم متابعين وعارفين ان مصر بتواجه أزمة كبيرة بقالها أكتر من سنتين فى توفير عملة اجنبية بسبب تراجع مصادر النقد الأجنبي وبسبب الفوضى الكبيرة اللى كانت حاصلة فى سوق صرف العملات وعشان الحكومة تحل الأزمة دي اشتغلت بالتعاون مع البنك المركزي فى أكتر من مسار واحد منهم كان تقليل فاتور الاستيراد لأقل حد ممكن خصوصا وان مصر بتعتمد على توفير اكترمن 90% من احتياجاتها من الخارج .. يعنى بالبلدي كده معظم الحاجات اللى بنستخدمها فى حياتنا اليومية مسستوردة من بره .. واستيراد يعني دولار وضغط على الاحتياطي النقدي للبلد
ومع تقليل فاتورة الاستيراد كان فيه خطة تانية لتوطين الصناعات وبدل ما ندفع دولار عشان نستورد نصنع ونفتح مصانع جديدة ونوفر فرص عمل لكن ده طبعا مش هيحصل فى يوم وليلة وهياخد وقت على ما نتايجه تبدأ تظهر وتبان وعشان كده الحكومة اتجهت لخطوة تانية ومسار مختلف وهو اتفاقيات تبادل العملات المحلية
ودي اتفاقيات مصر بتوقعها مع بعض الدول وبناء عليها بتتحول التعاملات التجارية والاقتصادية مع الدولة دي من التعامل بالدولار باعتباره عملة عالمية متحكمة فى التجارة الى عملات محلية يعنى جنيه مصري.. يوان صينى.. ريال سعودي.. روبل روسي.. درهم اماراتى وهكذا
وخد بالك ان الاتفاقيات دي تطور مهم وكبيروهيكون ليها تداعيات ايجابية كبيرة على الاحتياطي النقدي فى البنك المركزي وكمان هيتفف الضغط على الدولار وهتقلل فاتورة الاستيراد وهتخليك تقدر تشترى اللى انت عاوزه ومش هيكون عندك أزمة فى توفير سعره
وكل ده فى الاخر بيصب فى مصلحة الجنيه المصري اللى هيكون فيه طلب عليه وفى المقابل هيقل الطلب شوية على الدولار فطبيعي سعره هينخفض
طب والدول التانية بتقبل ليه تعمل الاتفاقيات دي وهي معندهاش أزمة دولار زينا؟
بص يا سيدي فيه اصلا اتجاه عالمي حاليا للتخلى عن الدولار واستبداله بعملات محلية بعد ما امريكا استخدمت عملتها كسلاح فى صراعها مع الروس بعد غزو موسكو لاوكرانيا .. وكل دولة بتحسبها صح وتقول ايه اللى يخليني احط ايدي تحت درس امريكا ما احول معاملاتى لعملات محلية واقلل الاعتماد على الدولار لأقل حد ممكن يعنى صفقة الكل فيها كسبان
طب وده ممكن يأثر على الدولار وقوته فى العالم كله؟
طبعا على المدى القصير حجم التأثير مش هيكون كبير لكن مع الوقت اكيد هيمنة الدولار ونفوذه هيتراجع خصوصا لو ظهرت عملات موحدة جديدة زي اللى بتخطط ليها مثلا دول بريكس
