بـ 50 مليار جنيه.. شوف إزاي الحكومة هتعيد الروح لصناعة الغزل والنسيج

إيه اللي ناوية الحكومة تعمله في ملف الغزل والنسيج، وليه بتفكر دلوقتي تعيد الصناعة دي لريادتها زي ما كانت زمان، وهل في ميزانية معينة خصصتها للخطة دي ولا لسه بتفكر.. هنقولك كل التفاصيل في الفيديو ده، فتابعنا للآخر. 
 

الفترة دي، الحكومة عملت خطة عشان تطور صناعة الغزل والنسيج، وأكيد بدأت بشركات الغزل اللي تابعة  لوزارة قطاع الأعمال العام، وخصصت لها تكلفة استثمارية بقيمة 50 مليار جنيه.

وطبعا التطوير ده هيشمل المصانع الموجودة في المحلة وكمان تسوية المديونيات المستحقة على الشركات التابعة لصالح جهات حكومية، ضيف على ده إن مشروع التطوير هيكون في 65 مصنع ومبنى خدمي ما بين إنشاء وتطوير وإعادة تأهيل بالشركات التابعة في مختلف محافظات مصر.

عشان كده، وزير قطاع الأعمال العام بيتابع تطبيق برنامج تخطيط الموارد بالشركات التابعة له، وكمان خطط العمل التنفيذية لشركات "القابضة الكيماوية، وناقش مؤخرا فرص الاستثمار فيها.

كمان معروف إن شركة مصر للغزل والنسيج اللي موجودة في المحلة الكبرى، هينوبها من الحب جانب في المشروع القومي لتطوير صناعة الغزل والنسيج، لأنها لوحدها بتمثل حوالي 40% من إجمالي استثمارات المشروع.

والمشروع بيشمل إنشاء 5 مصانع جديدة وإعادة تأهيل 3 أخرى للغزل والنسيج والتحضيرات والصباغة والتفصيل، بالإضافة لتركيب الآلات والمعدات لمصنع "غزل 1" أكبر مصنع غزل في العالم، والمقرر افتتاحه خلال الفترة المقبلة، وكمان إنشاء مجمع مصانع التحضيرات والنسيج والصباغة ومصنع "غزل 6".

والخطة بردو بتضم تطوير مركز تدريب للعاملين بشركة مصر للغزل والنسيج بالمحلة الكبرى وتزويده بنماذج من الآلات والمعدات الجديدة لتدريب العاملين على التعامل مع التكنولوجيا الحديثة،بجانب تشغيل مصنع "غزل 4"بشركة مصر للغزل والنسيج بالمحلة الكبرى، اللي بيعتبر باكورة إنتاج المصانع الجديدة ضمن المشروع القومي لتطوير صناعة الغزل والنسيج، ومتخصص في إنتاج الغزول الرفيعة.

والمصنع ده بيضم نحو 72 ألف مردن بطاقة إنتاجية 15 طن غزل/ يوم، وتم التعاقد على تصدير إجمالي إنتاج المصنع.

أما التمويل، فبيشمل 540 مليون يورو قيمة الماكينات الجديدة، والباقي هيبقي تمويل ذاتي من موارد الشركات، وبكده تكون الحكومة حطت شركات الغزل والنسيج والصناعة نفسها على الطريق الصحيح، عشان ترجع مصر من تاني تكون قلعة صناعة الغزل والنسيج.

كمان، خلال الساعات الأخيرة، المهندس محمد شيمى وزير قطاع الأعمال العام، التقى مع أشرف الجندى محافظ الغربية، عشان يناقش مشروع تطوير شركة غزل المحلة.

والوزير حرص على زيارة شركة مصر للغزل والنسيج اللي موجودة في المحلة الكبرى، واتكلم عن مستجدات الموقف التنفيذى للمصانع الجديدة ضمن المشروع القومي لتطوير الصناعة.

واستمع الوزير  للمقترحات اللي عرضها النواب، وأكد حرصه على التواصل الدائم والفعال مع نواب البرلمان وتكامل الجهود، عشان كل ده هيساهم فى تحقيق الصالح العام والنهوض بهذه الصناعة من جديد.