سر قرار المركزي المفاجئ.. تحول خطير في سوق الدولار
هو إيه اللي حصل في الكام ساعة الأخيرة وليه البنك المركزي خد قرار مفاجئ بيسمح بخروج مبالغ من الدولار مع المسافرين وايه الرسالة اللي عاوز يوصلها المركزي لسوق الصرف والمستثمرين والمؤسسات الدولية.. كل التفاصيل هتلاقوها في الفيديو ده خليكم معانا للآخر .
زي ما احنا عارفين البنك المركزي المصري سبق واخد إجراءات كتيرة بخصوص وقف نزيف الدولار في ذروة أزمة العملة على مدار سنة 2023 وبداية 2024 ومنها تخفيض وتقييد عملية السحب الدولاري من البنوك ودا بعد اكتشاف استغلالها للبيع في السوق الموازية والاستفادة بفرق السعر كمان فرضت قيود على الاستخدام الغير قانوني للبطاقات الائتمانية لاصحاب الحسابات الدولارية ودا بعد ملاحظة زيادة السحب بالخارج من الحسابات الدولارية بطريقة مريبة واكتشف المركزي أن الدولارات دي بتدخل في عمليات المضاربة وبتوصل لإيد تجار العملة.
وفي 17 أكتوبر اللي فات اصدر البنك المركزي المصري توجيهات للبنوك التجارية بفرض قيود على استخدام العملاء لبطاقات الائتمان في المعاملات بالعملات الأجنبية في الداخل والخارج، وكانت دي المرة التانية خلال أسبوع واحد اللي يقرر فيها المركزي اتخاذ إجراءات صارمة بشأن البطاقات وكانت القرارات بمنع تفعيل البطاقات الائتمانية الجديدة للاستخدام بالعملات الأجنبية حتى مرور 6 أشهر من تاريخ الإصدار.
بعدها قرر البنك المركزي تخفيف القيود ا على استخدام بطاقات الائتمان في الخارج، وألغى شرط تقديم العملاء لإثبات السفر قبل مغادرتهم.. وبعد قرار تحرير سعر الجنيه اقرت البنوك تخفيف جديد بلحدود المطبقة على البطاقات الائتمانية، بعد عودة تدفقات وتحويلات المصريين بالخارج عن طريق البنوك ورفع البنك التجاري الدولي على سبيل المثال الحد الشهري للمشتريات إلى 1500 دولار بدل من 500 دولار ورفع الحد الشهري للمشتريات إلى 2500 دولار بدلا من 1000 دولار وارتفع الحد الشهري للسحب النقدي إلى 100 دولار بدلا من 60 دولارا.
وكمان رفع البنك الأهلي المصري حد المعاملات الدولية الشهرية ببطاقة كلاسيك خارج مصر إلى 500 دولار بدلا من 250 دولارا، بينما تسمح بالسحب النقدي حتى 50 دولارا.
طيب ايه الجديد في قصة حدود السحب الدولاري ؟
من ساعات فجر البنك المركزي مفاجأة من العيار التقيل بالموافقة لبنوك مصرية وهي الاهلي المصري وبنك مصر على زيادة حدود الصرف على بطاقات الائتمان الخاص بالعملة الأجنبية من 4 آلاف دولار على أقصى بطاقة ائتمانية إلى 6 آلاف دولار في الشهر مع السماح لعميل البنك المسافر إلى الخارج بشراء 5 آلاف دولار نقدًا من البنك كل شهر ومش مرة واحدة في السنة.
وعشان نفهم الاسباب والمغزي من القرار تعالو نشوف محمد الأتربي، رئيس مجلس إدارة بنك مصر ورئيس اتحاد بنوك مصر، قال ايه على القرار .
الأتربي طلع في مداخلة هاتفية بأحد البرامج وقال إن كل عميل دلوقتي يقدر يروح البنك ويشتري 5 آلاف دولار بحد أقصى، بعد إظهار ما يثبت أنه مسافر للخارج، إضافة إن لو معاه بطاقة ائتمانية يقدر يصرف بيها لحد 6 آلاف دولار، حسب درجة البطاقة وقال كمان الاتربي إن التسهيلات الجديدة اعتمدت بعد توافر رصيد كبير من العملات الأجنبية في البنوك، بجانب اختفاء ظاهرة. سوء استخدام للبطاقات، بعد توحيد سعر الدولار في السوق، وارتفاع تحويلات المصريين العاملين في الخارج واللي وصلت في بنك مصر لـ 20 مليون دولار مقارنة بمليون دولار كحد أقصى، وأن إجمالي تحويلات العاملين بالخارج ارتفعت باكتر من 32% ووصلت إلى 17 مليار دولار مقارنة بـ11.7 مليار دولار عن السنة اللي فاتت وإن دا ساهم في زيادة صافي الأصول الأجنبية بالقطاع المصرفي لتصل إلى 13.2 مليار دولار فائض مقارنة بعجز في يناير الماضي وصل إلى 28 مليار دولار.
الاتربي قرأ الفاتحة على روح السوق السوداء وقال إن زمن المضاربة على سعر الدولار انتهي وأشار لتحسن كل المؤشرات الاقتصادية والمالية في مصر بعد قرار التعويم ومنها ارتفاع حد السحب النقدي من 150 ألف جنيه إلى 200 ألف جنيه، والكارت من 20 الف جنيه حتى 30 الف جنيه ومن المؤشرات دي كمان كان قرار المركزي للبنوك باستئناف تمويل استيراد 13 سلعة كان محظور استيرادها ضمن إجراءات ترشيد استخدام الدولار في وقت الأزمة.
الرسالة اللي عاوز يوصلها المركزي للخارج وللواهمين وتجار الأزمات وهواة التسخين هي أن أزمة الدولار انتهت من مصر وإن فيه وفرة تسمح لأي عميل بسحب الدولار دلوقتي والسفر بيه كمان واتاحة السحب من البطاقات الائتمانية ودا دليل على أن المركزي عنده رصيد كبير من النقد الأجنبي.
