الدولار داخل على 47 جنيه.. الأزمة اتحلت
ليه الدولار لسه بينزل لغاية دلوقتى وهل البنك المركزي رجع من تاني يحمي الجنيع ويتحكم في سوق الصرف وايه اللي بيحصل في البنوك دلوقتي.. كل دا ومفاجآت جديدة هتعرفوها في الفيديو ده خليكم معانا للآخر
حضرتك عارف إن الدولار نزل 20 قرش مرة واحدة في اسبوع بالظبط يعني من الاتنين اللي فات لغاية النهاردة وسجل 48.33 جنيه مقابل 48.53 جنيه واكيد عارف إن الاسبوع اللي قبله بردو الدولار نزل حوالي 16 قرش والأهم من دا كله انت عارف إن الدولار لاول مرة يقعد الفترة دي كلها من غير زيادة أو مفاجآت في الأسعار قدام الجنيه.. ايوا دا حصل وعلى فكرة دا مش معناه إن الدولار ضعيف وعشان كده بينزل لكن معناه إن الجنيه بيقوى وقيمته بتزيد وهي في النهاية معادلة قوة زي ما قلنا.
طيب ايه الي حصل وهل في طه تدخل من المركزي تاني في سوق الصرف ؟
عشان نبقي مطمن إن المركزي من المستحيل يتدخل تاني في سعر الصرف إلا لو حصلت كارثة لاقدر الله لكن طول ما الأمور ماشية صح ومفيش تلاعب أو أزمات ضخمة في الأسواق يبقي مفيش تحكم تاني في سعر الدولار واللي حضرتك بتشوفه دا هو سعر الدولار الحقيقي واللي بيخصع بس لقانون العرض والطلب ومن غير اي تدخل وعشان تبقي عارف لو البنك المركزي رجع يحمي الجنيه هتبقي أزمة مع صندوق النقد الدولي ومع المؤسسات المالية الدولية ومع المستثمرين عشان مصر التزمت ببرنامج اصلاح مالي وخدت فلوس بناء على الإتفاق دا واكيد طبعا المركزي مش هيرجع يحمي الجنيه في السر ويتحكم في سعر الدولار لأن مفيش حاجة بتستخبى اصلا في عالم الاقتصاد دلوقتي.
وبعيدا عن دا كله فيه حاجة مهمة مش هتخلي الببنك المركزي يرجع لحماية الجنيه وإدارة سوق الصرف بالأمر المباشر وهي إن مصر بدأت تجني ثمار تعويم الجنيه وتصحح التشوه المالي ورجعت الاستثمارات الضخمة من تاني وحصلت انطلاقة اقتصادية كبيرة واي فرض سيطرة على سوق الصرف مصر هتخسر كل اللي عملته وهنرجع بقي للتقارير السلبية من المؤسسات المالية الدولية ووكالات التصنيف والاستثمار يرجع يهرب تاني وندخل في دوامة مالهاش لازمة
طيب ليه الدولار بينزل وهل فيه حاجة غريبة بتحصل ؟
الدولار زي ماقلنا بينزل ويطلع عادي جدا ودا الطبيعي في سوق الصرف الحر والي بيحكمه بس العرض والطلب وطول مافيه زيادة وهبوط في أسعار العملات طول ما تطمن إن اقتصادك ماشي صح وإن سوق العملة مفيهوش تلاعب والدولار سعره بينزل عشان الطلب عليه قليل اليومين دول وعشان فيه تدفقات مستمرة للدولار من الخارج وارتفاع في موارد الدولة الطبيعية من العملة الصعبة وكمان عشان ترشيد الاستيراد وزيادة التصدير والتصنيع وحاجات تانية كتير خاصة بالإصلاحات والمواد الاجنبيه من العملة وطبيعي الجنيه ياخد اتجاه صعودي مع تحسن المؤشرات الاقتصادية وانتهاء أزمة نقص العملة من ساعة قرار تحرير سعر الصرف واللي فتح الطريق قدام الاقتصاد المصري عشان يدخل مرحلة جديدة.
الخلاصة مفيش اي تحكم في سوق الصرف ولا في البنوك ووارد جدا سعر الدولار يرجع يرفع تاني واحنا بنكلم حضراتكم دلوقتي لأن الموضوع إن السوق هو اللي بيحدد السعر والطلب والعرض.
