دعم قوي للجنية وضربة للدولار.. إيه اللي بيحصل في البنك المركزي؟
يا ترى ايه اللي بيحصل في البنك المركزي في الشهور الأخيرة؟ وايه حكاية صافي الأصول الأجنبية اللي ارتفعت للشهر التالت على التوالي؟ وايه تأثير ده على عودة الجنية ومستقبل سوق صرف الدولار؟
في آخر تحديث لبيانات البنك المركزي سجل صافي الأصول الأجنبية في مصر ارتفاع للشهر التالت على التوالي في يوليو اللي فات بعد ما فضل يسجل ارقام سلبية لأكثر من سنتين بسبب التوترات اللي بتحصل من بعد اندلاع الحرب الروسية الأوكرانية ولحد دلوقتي.
وقفز صافي الأصول الأجنبية إلى 644.8 مليار جنيه في نهاية يوليو من 626.6 مليار جنيه في يونيو ووفقاً لحسابات وكالة رويترز اللي استندت إلى سعر الصرف الرسمي للبنك المركزي وقتها بما يعادل 13.27 مليار دولار في نهاية يوليو و13.05 مليار دولار في نهاية يونيو.
طب ايه أهمية الأصول الأجنبية دي؟
بص صافي الأصول الأجنبية بيشمل الأصول الأجنبية لدى كل من البنك المركزي والبنوك التجارية وفي اوقات معينة بيستخدم للمساعدة في دعم العملة.
وأصبح صافي أصول مصر الأجنبية سلبي من فبراير 2022 و هبط إلى سالب 28.96 مليار دولار في يناير ..لكن في فبراير اللي فات عززت الحكومة ماليتها من خلال بيع حقوق تطوير منطقة رأس الحكمة على ساحل البحر المتوسط مقابل 35 مليار دولار ومن خلال التوقيع في مارس اللي فات على حزمة دعم مالي بقيمة 8 مليار دولار مع صندوق النقد الدولي.. واتفاقيات تانية مع مؤسسات تمويل دولية.. وده بعد ما تم تخفيض قيمة العملة بشكل حاد مما أدى إلى تدفق الاستثمارات في الأسهم والسندات وغيرهما من الأصول المالية، فضلا عن زيادة التحويلات المالية من العاملين المصريين في الخارج..وزادت الأصول الأجنبية، وكذلك الالتزامات الأجنبية، لدى البنوك التجارية والبنك المركزي في يوليو 2024.
طب ايه اللي هيحصل بعد ارتفاع صافي الأصول الأجنبية؟
فيه فوايد كتير لارتفاع صافي الأصول الأجنبية في البنوك المصرية والبنك المركزي .. اولها أن ده مؤشر قوي على توافر العملة الصعبة ورسالة للسوق أن فيه استقرار في سعر العملة .. وتاني حاجة ان ده دعم قوي للجنيه المصري وبيقوي موقفه في معركته مع الدولار يعني ارتفاع صافي الأصول الأجنبية ده كله مكاسب
