هتتشال من التموين.. شوف الدولة هتعمل إيه مع اللي بيسرقوا كهربا

 
الفترة دي في شغل كتير قوي في قطاع الكهرباء وخصوصا في موضوع محاضر سرقة التيار الكهرباء.. يا تري الحكومة هتعمل اية مع الناس اللي بتسرق كهرباء وازاي الحكومة بتواجه سرقة التيار الكهربائي
 

الحكومة عندها مشكلة كبيرة قوي في قطاع الكهرباء وهيا ارتفاع نسب سرقة التيار علي الشبكة الموحدة للكهرباء، واللي وصلت لـ40% يعني ما يقرب من نصف الطاقة الكهربائية اللي محطات توليد الكهرباء بتنتجها مش بيدفع حسابها، وطبعا دي خسارة كبيرة علي الدولة المصرية لما نص الطاقة الكهربائية بتكون بتتسرق بدون وجه حق وبدون ما يكون معروف مين اللي سارقها علشان الدولة تاخذ معاه الاجراء القانوني.
طيب اية اللي السبب في وجود ازمة سرقة التيار الكهربائي علي الشبكة الموحدة للكهرباء؟.
في خلال السنين اللي فاتت واللي كانت بعد فترة حكم جماعة الأخوان، وبعدها الفترة اللي شهدت تعديات كبيرة علي الاراضي الزراعية من الناس والتعدي علي أملاك الدولة .. والفترة دي في مدن كاملة جديدة ظهرت في المحافظات وخصوصا محافظات الصعيد، وطبعا اغلب المناطق دي مكنش محطوطة في البنية التحتية لقطاع الكهرباء والأهلي قاموا بتوصيل مرافق للبيوت دي بطرق غير قانونية وخصوصا الكهرباء، وده طبعا عمل احماء اضافية علي شبكة الكهرباء، وده غير السرقة العادية للناس اللي بتحصل من وراء العدادات وتمرير اسلاك بطرقة غير قانونية لتشغيل الاجهزة الاعلي استهلاكا في البيوت زي التكييفات وغيرها، والناس كانت بتعمل كده علشان تشغل الأجهزة وتوفر في فاتورة الاستهلاك، وللاسف ده تزامن مع التوسعات الجديدة اللي عملتها الدولة واللي طبعا هيتم توصيل المرافق والبنية التحتية لها، وطبعا كل التوسعات دي عملت حمل اضافي علي شبكة الكهرباء، وده تزامن مع موجهات الطقس الحار اللي بتضرب محافظات الجمهورية واللي بتتطلب تشغيل المكيفات والمراوح واللي طبعا بيكون استهلاكها عالي ومختلف عن الاستهلاكات العادية.
طيب الدولة بتعمل اية مع الناس اللي بتسرق كهرباء؟..
في الكام يوم اللي فاتوا الحكومة اخذت اكثر من قرار لمواجهة ظاهرة سرقة التيار الكهرباء، واحد من القرارات دي هيا اعلان تعريفية غالية لحساب المواطنين في وقائع سرقة التيار الكهربائي والناس اللي لسه شغالين بنظام الممارسة واللي بتوصل 241 جنيها، ودي تعتبر اعلي شريحة موجودة في قائمة الاستهلاك المنزلي، يعني بالعربي ده اي حد هيتمسك بيسرق كهرباء هيدفع رقم كبير بسبب السرقة دي والرقم ده بيكون حسابه علي اعلي قيمة استهلاك.
نظام الممارسة برضوا في استهلاك الكهرباء بيكون بنفس قيمة سرقة التيار خصوصا أن اللي موصل كهرباء بالممارسة في تعريف القانون بيكون التعامل معاه كانه سارقة كهرباء وبيكون حسابه في تعريفية الاستهلاك بيكون في نفس القيمة.

الكهرباء اعلنت كمان عن خطة جديدة لزيادة تحصيل الكهرباء وهيا تحصيل نسبة 7% علي التاخير في سداد فواتير الكهرباء علي الناس اللي يقعد شهر كام من غير ما يسدد فاتورة الاستهلاك خصوصا ان في ناس كتيرة بترفض تدفع فاتورة الاستهلاك بتاعها لمده شهور طويلة وخصوصا الناس اللي لسه شغالة بالعدادات الميكانيكية القديمة، علشان كده الدولة شغالة دولوقتي وبكل قوة علشان تشيل العدادات القديمة وتركب بدلا منها عدادات جديدة مسبقة الدفع اللي هو العداد بكارت، وده بيضمن ان الدولة تحصل قيمة الاستهلك قبل التشغيل .
في اجراء جديد الدولة هطبقه في الشهور اللي جاية مع الناس اللي بتسرق كهرباء وهو حرمانهم من السلع التموينية وفعلا االكهرباء بعتت قائمة فيها 500 ألف اسم لوزارة التموين لرفع اسمائهم من قائمة بطاقات السلع التموينية، ده بقرار من رئيس الوزراء برفع التعديين علي خدمات الدولة سواء التعدي بالبناء علي الاراضي الزراعية أو سرقة الخدمات بحرمانهم من الخدمات والسلع الاساسية وخصوصا التموين .