هل حدثت صفقة في الكواليس.. إيه سر تغير صندوق النقد المفاجيء مع مصر؟
يا ترى ايه سر التغير المفاجيء في تعامل صندوق النقد مع مصر؟ وليه الصندوق قرر بشكل مفاجيء تخفيف شروط التمويل اللى بيقدمه لمصر؟ وهل فيه صفقة حصلت فى الكوليس بين الحكومة المصرية والمسئولين فى الصندوق؟ وايه تأثير اللى بيحصل على أزمة شح العملة والفجوة التمويلية؟
فى الساعات الأخيرة مفيش سيرة داخل الأوساط المالية العالمية ومؤسسات التمويل الا عن التغير المفاجيء اللى حصل فى لغة خطاب صندوق النقد الدولى تجاه مصر.. والكل بيسأل يا ترى ايه اللى حصل خلا الصندوق يعلن تخفيف شروط قرض مصر؟ وليه موقف الصندوق اتحول 180 درجة ؟ وازاى بعد ما كان كل شوية بيطلع وينتقد ويشتكي من تأخر الحكومة المصرية فى تنفيذ شروطه بقا حاليا بيشيد بالاجراءات اللى حصلت؟
وقبل ما نجاوب على كل الأسئلة دي خلونا نعرف الأول هو ايه اللى حصل جديد من الصندوق؟
في خطوة مفاجئة صندوق النقد الدولي أعلن أنه خفف بعض الشروط في حزمة الدعم المالي البالغة 8 مليار دولار المقدمة لمصر وكمان منح الحكومة المزيد من الوقت لتنفيذ الإصلاحات وده بعد مرحلة سابقة كان الصندوق فيها بيتعنت مع مصر وأجل أكتر من مرة صرف شرايح القرض بسبب الاعتراض على بعض الملفات
وبيجري صندوق النقد مراجعتين سنوياً قبل صرفشرايح قرض ال8 مليار دولار ووفقا لآخر مراجعة واللى تمت في أواخر يوليو اللى فات وافق الصندوق على تأجيل نشر عمليات التدقيق السنوية على الحسابات المالية اللي يصدرها الجهاز المركزي للمحاسبات حتى نهاية نوفمبر بدلاً من الموعد الأصلي في نهاية مارس، مع انتظار تعديل القانون اللى بيحكم عمل الجهاز.
وسمح الصندوق كمان بتأجيل إعداد خطة إعادة رسملة البنك المركزي، واللي كان من المقرر إعدادها في نهاية أبريل لتكون حتى نهاية أغسطس لإعطاء الحكومة مزيداً من الوقت لتقدير حجم رأس المال الجديد المطلوب ووضع استراتيجية.
طب وبالنسبة للدعم ورفعه عن بعض الخدمات ؟
الصندوق يمكن للمرة الأولى تخلى عن زيادات أسعار الوقود الفصلية مقابل التزام حازم من الحكومة برفع الأسعار إلى مستويات التكلفة بحلول نهاية 2025.
ووفقا للصندوق فالجهات الحكومية في مصر هتخفض مديونياتها للبنك المركزي بواقع 100 مليار جنيه كل سنة مالية حتى تصل إلى صفر بموجب خطة العمل الخاصة بمطالبات البنك على الهيئات الحكومية.. وقال أن الجهات الحكومية سددت بالفعل مطالبات للبنك المركزي بواقع 150 مليار جنيه بنهاية يوليو.
وعن متأخرات شركات النفط العالمية كشف الصندوق اناه وصلت إلى 5 مليار دولار، ولكن هيئة البترول وضعت خطة للتعامل معها، وتوقع ان خطة السداد تؤدي إلى خفض المتأخرات لما بين 3.5 و3.8 مليار دولار بنهاية السنة المالية الجارية
طب الكلام ده كله معناه ايه؟ وهل نفهم من كده ان مصر عملت صفقة مع الصندوق؟
مفيش صفقات ولا حاجة كل الفكرة ان الصندوق مش مؤسسة خيرية ولا بيرمي فلوسه على الأرض وبمجرد ما مصر وقفت على رجلها وبدأت تدفقات النقد الأجنبى ترجع من جديد بزيادة ملحوظة فى الاستثمارات الأجنبية المباشرة وتحويلات المصريين فى الخارج .. الدنيا بدأت تظبط شوية ومؤشرات الاقتصاد كلها بدأت تتعافى وده ادى انطباع للصندوق ان الاقتصاد المصري ماشي فى الطريق الصح وبيسترد عافيته بشكل ملحوظ ومن هنا كان لازم يتم تخفيف حدة الشروط لأن الصندوق كده ضامن سداد مصر لالتزاماتها ومفيش اى مشكلة متوقعة ممكن تعيق عن الهدف ده
