لو عايز تشتري عربية جديدة بأرخص سعر.. شوف السوق بيقولك إيه

إيه اللي بيحصل دلوقتي في سوق السيارات، هل في زيادة جديدة في الأسعار ولا الدنيا نايمة، ولو ناوي تشتري عربية جديدة فتعمل حسابك على كام "مكسيمم كده".. هنقولك السوق بيقولك إيه، فتابعنا للآخر.
 

سوق السيارات دلوقتي بيشهد حالة من الهدوء، والأسعار شبه ثابتة أو بتميل لانخفاض محدود، وده حصل بعد ما سجلت الأسعار ارتفاعات كبيرة لمعظم العلامات التجارية من كام شهر، بسبب توقف عمليات الاستيراد وبسبب رجوع ظاهرة" الأوفر برايس" من جديد، بمعنى إن ييتم فرض مبلغ إضافي يتم على سعر العربية من قِبل الوكلاء وتجار السيارات، وده بيكون مقابل توفير الطراز المطلوب والتسليم الفوري.

لكن لو أنت مهتم بسوق السيارات وبتدور على الأسعار الجديدة فهنقولك الدنيا ماشية على إيه.

بص يا سيدي، الأسبوع ده واللي هو الأسبوع الأخير من شهر أغسطس، بيشهد حالة من خفض أسعار العربيات، واللي كان أبرزها العربيات الصينية، زي الكروس أوفر "JS2
موديل 2024 ، واللي بتصنف بأنها أرخص سيارة كروس في مصر، وانخفض سعرها بقيمة 150 ألف جنيه، يعني دلوقتي سجلت 699 ألف جنيه.

كمان عربيان" أوبل كورسا"، سجلت مليون و250 ألف جنيه، وأوبل كروس لاند مليون و350 ألف جنيه.

ضيف على ده، إن عربيات "أوبل موكا"، سجلت سعر رسمي مليون و550 ألف جنيه، و"أوبل جراند لاند" كمان بتبدأ من مليون و850 ألف.

طب بالنسبة لعربيات "شيري تيجو 8"، اللي بيفضلها فئة كبيرة من الناس؟

دلوقتي موديل 2025 منها بيبدأ من مليون و100 ألف جنيه للفئة الأولى، والفئة التانية مليون و155 ألف جنيه، أما الفئة التالتة فتمنها مليون و225 ألف جنيه، والفئة الرابعة بمليون و280 ألف جنيه.

ولو حضرتك مش جاهز تشتري دلوقتي، وعايز تعرف توقعات أسعار السيارات في الأيام أو الشهور الجاية، فنقدر نقولك أن سوق السيارات بيشهد تحولات يومية، يعني اللي بيشتري انهاردة ممكن يخسر بكره، وممكن في أي لحظة الأسعار ترتفع تاني، لأن كل يوم في جديد.

كمان، الموجود في سوق المستعمل والجديد مبقاش يكفي، فمن الطبيعي جدًا الأسعار ترتفع الأيام الجاية، ومع توقف الاستيراد بقى في أزمة في السوق المحلي، لأن المخزون عند وكلاء السيارات أصبح ضئيل أو قليل خاصة لماركات أو علامات تجارية معينة.

فمتوقع جدًا تشهد الأسعار زيادة توصل لـ 100 ألف جنيه حسب نوع العربية أو بنسبة تقدر ب 10%، فلو حضرتك عايز تشتري عربية، ماترددش وانزل اشتري.

وهنقدملك شوية نصايح وأنت بتشتري عربية جديدة عشان مايضحكش عليك، واللي من أهمها إن حضرتك لازم تختار العربية المناسبة لميزانيتك وماترهقش نفس ماديا.

كمان، اختار عربية بمواصفات أمان كويسة، زي (قوة الفرامل، ثبات السيارة، جودة الإطارات وهكذا )

ولازم تحدد طريقة تمويل العربية سواء كانت كاش ولا تقسيط، ومهم جدا وجود ضمان لأطول مدة، ضيف على ده إن سعر العربية يكون متناسب مع الإمكانيات بتاعتها.

وخليك عارف، إنك لو اخترت أرخص عربية ممكن تقع في الفخ، لأن إمكانياتها هتكون ضعيفة، فلازم تراعي عنصر الجودة، وفي النهاية اعتمد على وكيل صاحب سمعة كويسة وعنده خبرة طويلة عشان يوفر لك صيانة وتأمين كويس.