كله هيشتري.. مفاجأة سارة في سوق السيارات

 
 
إيه اللي بيحصل في سوق السيارات اليومين دول وايه هي المفاجأة اللي أعلنت عنها رابطة مصنعي السيارات في الساعات الأخيرة ولو بتفكر تشتري سيارة ايه هو الوقت المناسب.. شوف الفيديو ده للآخر وهتعرف التفاصيل كلها 
 

 
معروف إن شراء سياره هو حلم لكل أسرة مصرية دلوقتي عشان تستغنى بيها عن زحمة المواصلات وعشان راحة الأسرة خاصة لو فيها اطفال ومع ارتفاع تعريفة الركوب في المواصلات العامة لكن أوضاع السوق في الفترة اللي فاتت مكنتش مشجعة بسبب الارتفاع الكبير في أسعار السيارات نتيجة الأزمة الأخيرة في الجمارك ومشكلة سيارات ذوي الاحتياجات الخاصة اللي اضطررت الحكومة لوقف الاستيراد مؤقتا ودا عمل تعطيش للسوق ونقص المعروض وبالتالي رجعت الأسعار تزيد من تاني وكمان ظاهرة الأوفربرايس رجعت تاني على بعض الموديلات ودا خلى ناس كتير تفكر اكتر من مرة في شراء سيارة لغاية السوق ما يستقر.

طيب ايه اللي حصل في الساعات الأخيرة ؟
شوف حضرتك من ساعات  المهندس خالد سعد أمين رابطة مصنعي السيارات طلع وقال إن أسعار السيارات الزيرو والمستعمل رجعت تنزل تاني مع الانفراجة في الاستيراد وانها لسه هتنزل تاني واتكلم كمان عن مستقبل السوق وقال إنه هتحصل فيه انفراجة كبيرة تاني مع الاتجاه العام للتصنيع والتصدير كمان وإن الاتفاقيات الأخيرة في وزارة الصناعة مع شركات سيارات عالمية بيقول إن مصر ماضية بقوة عشان تكون مركز لتصنيع السيارات في مصر.
المسؤول قال كمان إن  أبرز مهام المجلس الأعلى لصناعة السيارات هو العمل على توطين الصناعات الوطنية المغذية لصناعة السيارات، لاستيعاب حجم التصنيع المحلي وإن أي  تطوير في أي دولة بيعتمد على الصناعة وتعميق الصناعات المغذية، خاصة صناعة السيارات، عشان كده التركيز في الفترة الجاية على تعميق صناعة السيارات في مصر والعمل على التصدير.

أمين رابطة مصنعي السيارات قال كمان إن مصر في الفترة الجاية شغالة على زيادة تصنيع وتصدير السيارات لجلب العملة الصعبة، وسد احتياجات السوق المحلي، بخلاف تقليل الاستيراد وخدمة الدول المجاورة.

الميزة بقي في موضوع تصنيع السيارات في مصر أن  النسبة المضافة للمكون المحلي هتدفع الاقتصاد المصري بقوة وبالتالي تقليل حجم الاستيراد ودعم الصناعة المصرية وتشغيل المصانع، وفيه حاليا 19 مصنع شغالة حاليا في صناعة السيارات، وبيحصل تطور كبير في صناعة السيارات وتحقيق نسبة عالية من التصدير.
طيب ايه سر اللي حصل في سوق السيارات دا؟
مفيش سر ولا حاجة لكن الموضوع كله متعلق بالإرادة والتفكير خارج الصندوق وإن مفيش حاجة اسمها مستحيل مع التخطيط السليم والرغبة في التنفيذ ودا اللي عمله الفريق كامل الوزير وزير الصناعة من ساعة ما مسك الوزارة وقرر أن يكون فيه تغيير شامل وأن مصر لازم يكون فيها صناعة وطنية في كل المجالات ومن بينها صناعة السيارات واللي مصر ليها تاريخ فيه لكن للاسف مواكبتش التطور واللي حصل في مصر الأيام الأخيرة بيقول إن مصر هيكون عندها قاعدة صناعية خاصة في صناعة السيارات بالذات وشفنا الاتفاقيات الأخيرة مع شركات السيارات العالمية واللي قررت تصنع في مصر وتصدر.
دا كله معناه إيه بقي ؟
اكيد معناه تغذية سوق السيارات المحلي ودا هينعكس بشكل مباشر على الأسعار في السوق المصري وعلى أسعار قطع الغيار كمان واللي بتكون سبب في تحديد نوع السيارة بالتالي هيكون فيه انتعاشة في الأسواق كلها والاسعار هتنزل في الزيرو وهتنزل اكتر في المستعمل ولو بتفكر تشتري يبقي هتستنى شوية كمان عشان تشتري عربية حديثة وبسعر مناسب.