مفاجآت الحكومة للمصريين في أغسطس.. شوف هيحصل إيه

يا ترى إيه هي المفاجآت اللي جهزتها الحكومة المصرية للمواطنين في شهر أغسطس الحالي، هل هي متعلقة بتخفيض أسعار  ولا علاج بطالة ولا خدمات جديدة هتعلن عنها قريب.. هنقولك كل التفاصيل في الفيديو ده. 
 

بص يا سيدي، دلوقتي حكومة الدكتور مصطفى مدبولي التانية، بيجلها تعليمات دورية من القيادة السياسية بتخفيف الأعباء عن المواطنين، عشان كده الحكومة قررت تفرح الشعب بشوية إجراءات وقرارات متعلقة بخفض أسعار بعض السلع والإعلان عن خدمات جديدة اليومين دول.

ومن ساعات، وزارة التموين أعلنت عن حدوث انخفاض في أسعار الرز والزيت في منافذها، وقالت إن سعر الرز الأبيض في المجمعات الاستهلاكية وصل 24 جنيه للكيلو  بدلا من 25 جنيه، يعني تم تخفيض سعر الأرز للمرة الثانية بعد ما كان بـ26 جنيه للكيلو.

كمان أسعار الزيت هي كمان بتنزل، وانخفض سعر لتر زيت الطعام الخليط من 80 إلى 61 جنيها، وكمان تراجع سعر عبوة زيت الطعام "ذرة" وزن 2.2 لتر من 265 جنيها إلى 213 جنيها، وانخفض سعر عبوة زيت "ذرة" 1.6 لتر من 200 إلى 160 جنيها.

أما سعر عبوة زيت "ذرة "وزن 800 جرام، فانخفض هو كمان عشان يوصل بـ 83 جنيها بدلا 100 جنيه.

وانخفض سعر زيت طعام "عباد" عبوة 2.2 لتر من 230 جنيها الى 181 جنيها، وانخفض سعر عبوة زيت "عباد" 1.6 لتر من 170 جنيها الى 135 جنيها.

ضيف على ده، إن سعر عبوة زيت "عباد" وزن 800 جرام انخفض من 88 جنيها الى 71.5 جنيه، والأمر بالمثل لسعر عبوة زيت "عباد" وزن 750 جرام اللي انخفض من 73 جنيها إلى 61.5 جنيه.

ومش كده بس، ده الهيئة العامة للسلع التموينية، قالت كمان إنها تعاقدت على كمية 36 ألف طن زيت عباد خام مستورد منها كمية 24600 طن وصول خلال الفترة من 15 اكتوبر إلى 31 أكتوبر 2024، وكمية 12 ألف طن وصول خلال الفترة من 1 إلى 15 نوفمبر 2024، عشان تقدر توفر احتياطي من الزيت يكفي لأكثر من 3 شهور وبكده تضمن عدم رفع أسعاره.

وده معناه، إن أسعار السلع الاستراتيجية واللي بتدخل في جميع أكلات المصريين بتنخفض واحدة ورا التانية، وده بيحصل وسط توقعات من المسئولين بوجود انخفاض في أسعار سلع تانية في الفترة اللي الجاية.

ومن أسعار السلع للإنترنت، انهاردة كشفت تقارير عالمية، إن مصر جت في المركز الثاني إفريقيًا، والخامس على مستوى العالم، من حيث انخفاض تكلفة الإنترنت، وده معناه إن الدولة بتدعم الإنترنت بأسعار منخفضة، ومصرة على أن مصر تفضل في مكانة كويسة عالميا من حيث سرعة الإنترنت وكفاءته.

وده طبعا، مؤشر إيجابي جدا لأننا كلنا مانقدرش نستغنى عن الإنترنت وكل حياتنا بقت إلكترونية، فما بالك الحكومة تدعمه وتحافظ على زيادة كفاءته.

والكلام ده معناه، إن التكلفة المنخفضة لسعر الإنترنت في مصر هتساهم بشكل كبير فى دعم الاقتصاد القومي وتعزيز ريادة الأعمال ودعم مسيرة التحول الرقمي، وكل ده طبعا هيعود بالنفع على الأفراد والشركات والاقتصاد ككل بالخير.