هنبيع كهربا للسعودية والخليج.. تطور كبير في ملف الطاقة

سمعنا كتير عن مشروعات الربط الكهربائي مع السعودية واليونان والسودان، والناس كلها بتقول هو احنا فايض منا كهرباء علشان نبيع لدول تانية.. يا تري اية تفاصيل مشروع الربط الكهربائي مع السعودية.. وأزاي مصر هتستفيد منه.

وزارة الكهرباء والطاقة المتجددة، حاليا شغالة وبكل قوة علشان تشغل مشروع الربط الكهربائي بين مصر والسعودية واللي هيكون بقدرة 3000 ميجاوات، وهتبدأ المرحلة الأولي منه في شهر مايو لعام 2025، واللي هتكون بقدرة 1500 ميجاوات.
وزارة الكهرباء كمان اشترت المحول الأول واللي هيكون موجود في محطة الربط الكهربائي مع السعودية في المحطة الوحيدة اللي هتكون في مدينة بدر، وده المحول الأول من نوعه من حيث الحجم وتكنولوجيا التصنيع والتشغيل والاستخدام على خطوط الربط مع الشبكات الكهربائية فى الشرق الأوسط واللي هيكون بجهد 500 كيلو فولت.

طيب ليه الكهرباء عايزة تعمل ربط كهربائي مع السعودية؟.
الدولة حاليا شغالة وبكل قوة علشان مترجعش تطبق تخفيف الأحمال مرة تانية، ومشروع الربط الكهربائي مع السعودية الهدف من استغلال الاختلاف فى وقت حدوث ذروة الحمل بين شبكتي البلدين، وده لتعظيم قدرات التوليد فى مصر والسعودية وخفض معدلات استهلاك الوقود والتشغيل الاقتصادى للشبكة.

وزارة الكهرباء والطاقة المتجددة، انتهت من تنفيذ أكثر من 50% من مشروع الربط الكهرباء مع السعودية، وكمان انتهت من الحفر الأفقى للمواسير اللى هتمر فيها الكابلات اللي هتمشي تحت مياه البحر الاحمر فى منطقةة الشعب المرجانية وهيكون وضع الكابلات علشان الشعب المرجانية متتكسرش وتتدمر بسبب الكابلات اللي هتمر في البحر الاحمر، وكمان انتهت الدولة من تصنيع ما يقرب من 70% من مهمات مشروع الربط الكهربائي بين البلدين.
الشركة المصرية لنقل الكهرباء بدأت كمان فى تركيب جزء كبير من المهمات الخاصة بأبراج نقل الكهرباء، والمشروع هيكون من 3 محطات تحويل جهد عالى المحطة الاولي منهم هتكون في محطة شرق المدينة المنورة والثانية هتكون في محطة تبوك في المملكة العربية السعودية، والثالثة هتكون في مدينة بدر شرق القاهرة، ومحطات المحولات هتربط بينهم خطوط نقل هوائية هتوصل أطوالها لـ 1350 متر وكابلات بحرية في خليج العقبة بطول 22 كيلو متر.

طيب اية هيا اهداف مصر من مشروع الربط الكهربائي بين مصر والسعودية؟.
المتوقع أن المشروع وقت تشغيله  هيكون له فوايد مشتركة للبلدين منها تعزيز موثوقية الشبكات الكهربائية الوطنية ودعم استقرارها والاستفادة من قدرات التوليد المتاحة فيها ومن فروقات التوقيت في ذروة أحمالها الكهربائية، وكمان الربط الكهربائي بين مصر والسعودية هيكون له إمكانية لبيع الطاقة لدول الخليج فى المستقبل، وهيكون خطوة من خطوات مصر للتحول لمركز إقليمي لتبادل الطاقة .
توقيع عقود مشروع الربط الكهربائي بين مصر والسعودية لتبادل القدرات الكهربائية خلال أوقات الذروة بيرجع تاريخه لشهر أكتوبر 2021، وتكلفة المشروع بالكامل هتوصل لمليار و800 مليون دولار، مصر هتدفع منها 8 مليار جنيه بس