بعد الساحل الشمالي والعلمين .. تحول تاريخي بيحصل في سيناء

هو ايه اللي بيحصل في سيناء وايه القرارات الجديدة اللي الحكومة خدتها وازاي هتتول لمركز تجاري وصناعي وسياحي وترفيهي وتسويقي عالمي وإزاي هتعدي العلمين والساحل الشمالي وهتدخل مليارات الدولارات لخزينة الدولة.. تعالوا نشوف اللي حصل في التقرير التالي.

النهاردة تقدر تقول إن الحكومة عملت اجتماع مخصوص عشان سينا واللي هتتحول الفترة الجاية 180 درجة وهتبقي مركز عالمي في كل حاجة وبوابة المليارات والاستثمارات..
النهادرة الدكتور مصطفي مدبولي رئيس الوزراء اجتمع مع مجموعة من المسؤولين وكل اللي ليه علاقة بسيناء واتفق على تنفيذ مجموعة من القرارات منها تيسير إجراءات الدخول والخروج للمستثمرين والبضايع إلى سيناء وده لأن الدولة بتسعى دلوقتي لجذب الاستثمارات لسيناء، خاصةً منطقة شرق بورسعيد وأكد مدبولي إن الدولة مش هتسيب فرصة إلا واستغلتها خاصة وإن سينا ملها مزايا واعدة  وفرص اقتصادية متنوعة.

مش كده وبس اجتماع مبدولي النهاردة مكانش لاستعراض الاجراءات وبس دها كمان قرر البدء فورا في تنفيذها.
طيب يعني ايه السماح بعبور البضاعة والمستثمرين ؟
عشان نفهم النقطة دي لازم ناخد بالنا إن شبه جزيرة سينا بكل الامكانيات اللي فيها والمعادن والثروات والشواطيء والمناطق الاثرية لكن كانت منطقة مغلقة لسنين طويلة والاستثمار فيها صعب خاصة بعد احداث يناير 2011 بسبب نشاط الجماعات الارهابية وقتها واللي القوات المسلحة المصرية قررت تطهرها ودخلت معاها مواجهات شاملة وطهرت سيناء شبر شبر ومزرعة مزرعة لغاية مارجعت لصحابها وفي الظروف دي مكانش ينفع يدخل مستثمر ولا يتعمل مشروعات ضخمة.
طيب اهي الاوضاع في سيناء استقرت ايه اللي فيها مختلف؟
شوف لو الحكومة ركزت بس على سينا مش هتحتاج ولا دولار من بره وزي مابنقولك كده لأن امكانيات المنطقة ضخمة جدا وفيها كمية معادن ملهاش حصر غير التعدين والحديد والاسمنت والرخام والرمال السودا والجرانيت والفوسفات والدهب والبترول والغاز.
ودا مش كل حاجة سينا فيها كمان شواطي مش موجودة في العالم وهي امتداد لشواطي الساحل الشمالي وغير جنوب سينا ودي حكاية لوحدها وغير المناظر الخلابة والمحميات الطبيعية وراس جميلة ودير سانت كاترين ومسار العائلة المقدسة ومشروع التجلي الاعظم ولو قعدنا من هنا للصبح مش هنقدر نقول كل امكانيات وثروات سيناء.
النهاردة الحكومة قررت فتح الباب على اخره للمستثمرين عشان يضخوا فلوس ويعملوا مشروعات ويصدروا ويستغلوا قرب سيناء من قناة السويس ومواني السخنة وشرق بورسعيد والعريش وكل الامكانيات دي هتحول سينا قريب جدا لأجمل مدن العالم بجانب الثورة الاقتصادية والصناعية اللي هتقوم فيها واللي هتغير شكل الاقتصاد المصري وتقلب موازين الاسواق الدولية.