ليه المركزي بيسحب السيولة من البنوك... لعبة صندوق النقد ورعب التعويم الوهمي الجنيه.. إلحق اشتري اللي انت عاوزة بنص التمن في الأوكازيون

متابعينا الكرام في كل مكان أهلا وسهلا بكم وتحليل جديد لأهم التقارير اللي قدمتها وحدة أبحاث بانكير على مدار الساعة النهاردة الثلاثاء 6 أغسطس 2024.
الحقيقة منصات بانكير قدمت النهاردة عدد كبير من التقارير و التحليلات والقراءات في الشأن الاقتصادي والمالي ومنها تقرير عن أسباب سحب البنك المركزي للسيولة ومبالغ كبيرة من البنوك النهاردة..

وقال التقرير إنه فى الساعات الأخيرة سحب البنك المركزي سيولة بقيمة 1.249 تريليون جنيه في عطاء السوق المفتوحة من 29 بنك بعد قراره الأخير بتعديل سياسات قبول العطاءات بفائدة 27.75%.. وحصل المركزي على سيولة بقيمة 920.050 مليار جنيه في عطاء السوق المفتوحة من 33 بنك الأسبوع اللى فات.

وشرح التقرير إنه اى حد متابع القطاع المصرفي اكيد لاحظ انه ما بيمرش أسبوع واحد من غير ما يقوم البنك المركزي  بسحب سيولة من البنوك تفوق التريليون جنيه من خلال عطاءات السوق المفتوحة وبعائد ثابت مرتفع يصل إلى 28%.

ولفت بانكير إن  السيولة الفائضة معناها وجود معروض نقدي كتير في السوق ولو "المركزي" ما سحبهاش هتقوم البنوك بإقراضها للشركات والأفراد، وهيزداد الطلب على السلع والعقارات والخدمات، وبالتالي هيرتفع التضخم والاسعار هتزيد.

وشرح بانكير إنه عشان يسحب السيولة بيقوم البنك المركزي بربط ودائع للبنوك عنده لمدة أسبوع فقط..وبتتضمن أهداف العملية دي عدم السماح بوجود تشوه في أسعار الفائدة في السوق..والبنوك عندها  بالفعل سيولة مرتفعة وارتفعت سيولة القطاع بنحو 1.5 تريليون جنيه في أول 5 شهور من 2024، لتصل إلى 10.3 تريليون جنيه بنهاية مايو.

منصات بانكير قدمت تقرير وتحليل خاص انهاردة عن مصير اسعار الدهب في الأوضاع العالمية والإقليمية الصعبة في المنطقة ..

وسلط بانكير الضوء على إن التغيرات السياسية وتصاعد التوترات الجيوسياسية في المنطقة بتفرض نفسها بقوة على الأوضاع الاقتصادية في مصر والعالم كله .. وبيتوقع كتير من خبراء الاقتصاد أن أى تحرك إيراني عسكري ضد إسرائيل هيؤدي إلى ارتفاع غير مسبوق في أسعار الدهب العالمية وطبعا ده هينعكس بقوة على أسعار الدهب في مصر

ولفت التقرير إنه وفقا لتوقعات صادرة من شعبة الدهب والمجوهرات بالاتحاد العام للغرف التجارية فيه مؤشرات كتير بتأكد زيادة أسعار الدهب عالميا خلال فترة الجاية والسبب وجود العديد من الأحداث المؤثرة على تحديد سعر الدهب في مصر والعالم خصوصا في ظل التوترات الموجوده في المحيط الإقليمي

وقال التقرير إن التغيرات السياسية هتؤدي إلى زيادة كبرى في الأسعار العالمية للمعدن النفيس بالاضافة كمان للهبوط الحاد اللى حاصل حاليا في بورصات الأسهم في أمريكا والعالم هيأثر هو كمان على أسعار الدهب في مصر.

وشهدت أسعار الدهب ارتفاع جديد فى التعاملات الأخيرة وزاد سعر المعدن النفيس بحوالي 10 جنيه في كافة الأعيرة وسجل  عيار 24 حوالي 3832 جنيه للبيع و3795 جنيه للشراء

وحدة أبحاث بانكير قدمت تحليل خاص عن المثار بخصوص وجود تويم جديد على الأبواب بعد خروج الأموال الساخنة مرة تانية.. السوق بيقول إيه

وقال بانكير إنه من ساعة صندوق النقد الدولي ماوافق على صرف الشريحة التالتة من القرض المصري بقيمة 820 مليون دولار والتصريحات اللي طلع قالها وقتها بأن الحكومة المصرية مطالبة بتكريس سياسة السعر المرن للجنيه وإزالة كل المعوقات أمام السعر الحر والناس بدأت تتكلم على التعويم الجديد اللي جاي والحقيقة حصلت حيرة كبيرة إزاي يبقي فيه تعويم جديد والدولار طالع نازل براحته حسب العرض والطلب من 6 مارس اللي فات بعد اعتماد البنك المركزي لسياسة التعويم والسعر المرن ورفع ايده من على الجنيه وشفنا السعر الرسمي قفز ازاي وقتها من 30 جنيه للدولار الواحد إلى أكتر من 49 جنيه ودا بيأكد إن الدولار بقي حر..

وشرح بانكير إن تصريحات الصندوق عبارة عن تأكيد على اللي اتنفذ بالفعل وبيقول كده عشان يضمن ان الحكومة تفضل بعيد عن التدخل أو توجيه سوق الصرف لو حصلت قفزة في الاسعار لكن الحقيقة على الارض هي إن الدولار بيتحرك بحرية في سوق الصرف وعشان كده الكلام على تعويم جديد ملهوش أي محل من الاعراب لأنه منطقيا الدولار مفيش أي قيود عليه بدليل إن سعره قفز امبارح وقرب على ال50 جنيه والبنك المركزي متحركش ولا اتدخل في تحديد السعر.

وأشار التقرير ان خروج جزء من الاموال الساخنة أو الاسثمارات الغير مباشرة من السوق كان ليه تأثير على سعر الدولار في الأيام اللي فاتت لكن تاثير مايخوفش لأن مفيش فجوة دولارية زي اللي حصلت في 2023  وبالتالي صعود الدولار مش مقياس على وجود شح في العملة الأمريكية لكن بيدلل  على ارتفاع الطلب على الدولار.
ولفت التقرير إن البنك المركزي مايقدرش يعوم تاني لان الجنيه فعلا عام وشبع عوم كمان وبقي سعره حر تماما واس كلام عن تعويم جديد يبقي كلام ضد العقل والمنطق.

التقرير الأخير معانا في لايف النهاردة بيتكلم عن اخبار سارة بخصوص أسعار السلع  وخاصة سلع وملابس ومستلزمات المدارس واللي بقت متاحة بنص التمن..

ولفت بانكير إنه انهاردة، الأوكازيون الصيفي لسنة 2024 بدأ وهيستمر لمدة شهر، والأكازيون ده طبعا مرتبط في أذهاننا كلنا بتخفيض الأسعار وتحطيم أسطورة "اللبس اللي مش هانقدر نشتريه"، يعني هتشتري كل اللي في نفسك فيه.

وشرح التقرير إن الأوكازيون السنة دي بيقدم خصومات على السلع الغذائية ومستلزمات المدارس وكمان الملابس بنسبة تتراوح من 10% ل50%، وأكبر نسب خصومات بتكون على الملابس والسلع الموسمية الخاصة بالصيف.

ولفت كمان إن السنة دي في 1000 محل بيقدم تخفيضات وخصومات في كل المعروض في الأوكازيون، ومرشح أن المحلات دي توصل ل 4 آلاف محل، يعني هتقدر تتسوق وتروق وتوفر فلوسك.

وقال التقرير إن ووزارة التموين اللي مسئولة عن تنظيم الأوكازيون، أكدت على المحلات المشاركة في الأوكازيون، أنها لازم تلتزم بالإعلان عن ثمن السلع المعروضة للبيع بالتخفيض اللازم والمحدد، وحذرتهم كمان من التلاعب في الأسعار، أو انهم يعملوا إعلانات مضللة اللي بتكون على عكس الحقيقة، وقالت كمان إن اللي هيعمل كده هيعرض نفسه لعقوبة الغش التجاري، وغرامة مالية قد تصل إلى 2 مليون جنيه.

كمان وزارة التموين، طالبت المحلات التجارية الراغبة في المشاركة بالأوكازيون الصيفي، بسرعة التوجه إلى مديريات التموين الواقع في دائرتها المحل للحصول على الموافقة والحصول على تصريح، عشان يقدر يشارك حوالي 4 آلاف محل على مستوى الجمهورية، وتقدم كل خدماتها للمواطنين بأسعار مخفضة.

ووضح التقرير أن المحلات المشتركة في الأوكازيون بتحط   نسبة التخفيضات على المعروضات عشان تجذب أكبر عدد من الزبائن وينشط حركة البيع والشراء، كمان التجار بيستنوا موسم الأوكازيون عشان يخرجوا من حالة الكساد اللي بيعانوا منها طول السنة، أما المواطنون فهما كمان بيستنوا الأوكاوزيون عشان يشتروا احتياجاتهم من السلع المختلفة بأسعار مخفضة تناسب دخولهم.

وأشار التقرير إن محلات الملابس هي الأكتر جذبا للمواطنين، لأن اللبس دايما بيرتبط بالمواسم وبينزل عليه خصومات ممكن توصل للنص.. وطبعا كل المحلات عايزة تتخلص من اللبس القديم بأي شكل عشان لا تخزن ولا تخسر، وكمان عشان الموضة كل سنة بتتغير.