سجل قراءة عداد الغاز بنفسك.. وودع الفواتير العالية
عمرك فتحت فاتورة الغاز واتصدمت بالرقم؟ وتقول: أنا ما استهلكتش كل ده! المشكلة غالبًا مش في الاستهلاك المشكلة في عدم تسجيل قراءة العداد.
عشان كده دلوقتي تقدر تسجل قراءة عداد الغاز بنفسك إلكترونيا، ومن غير ما تستنى حد، ومن غير تقدير جزافي، ولا فواتير مضروبة.
تعالى أقولك تعمل إيه خطوة خطوة.. أول حاجة، بتدخل على موقع شركة تحصيل الغاز من خلال جوجل.
أول ما الصفحة تفتح، هتلاقي اختيار واضح اسمه تسجيل قراءة العداد اضغط عليه.
بعد كده هيطلب منك شوية بيانات بسيطة: المحافظة، المنطقة، رقم العمارة، الدور، ورقم الشقة.
ركز بس تدخلهم صح.. الخطوة اللي بعدها مهمة جدًا: هتدخل الرقم التعريفي اللي موجود أعلى فاتورة الغاز القديمة، وده اللي بيعرّف النظام إن العداد ده بتاعك.
بعد كده بقى تيجي أهم خطوة بتدخل قراءة العداد الحالية زي ما هي مكتوبة، أرقام بس ومن غير كسور.
أول ما تخلص، دوس إرسال، وبكده تكون سجلت القراءة بنفسك، والفاتورة الجاية تتحسب على استهلاكك الحقيقي، مش رقم متقدر.
ولو مش حابب تدخل على الموقع؟ في حلول تانية سهلة جدًا.. تقدر تسجل القراءة عن طريق الاتصال برقم مختصر من أي موبايل أو أرضي، أو تستخدم تطبيقات الدفع الإلكتروني زي تطبيقات التحصيل المعروفة.
وفي كمان خدمة الرد الصوتي، تكلم الرقم، تختار تسجيل قراءة، وتدخل البيانات.
وآخر حل.. لو قابلت المحصل، تقدر تقوله القراءة وهو يسجلها فورًا على الماكينة.
