إيه حكاية صفقة الـ40 مليار دولار اللي جاية.. وليه مدبولي قال اللي جاي أحلى.. شوف الفيديو وهتعرف

ياترى ليه مدبولي قال اللي جاي أحلى وإيه حكاية صفقة الـ40 مليار دولار دي وهتيجي أمتى ومين اللي هينفذها.. وإزاي هتكون نقطة فاصلة في الاقتصاد المصري... هنعرف التفاصيل في الفيديو ده خليكم بس معانا للأخر
 

من كام وفي عز الناس ما زعلانه من ارتفاع اسعار البنزين والسولار وتذاكر القطارات والمترو والكهربا اللي جاية في الطريق وارتفاع اسعار السلع والمواصلات خرج الدكتور مصطفي مدبولي واتكلم عن الوضع الاقتصادي وقال إننا عارفين إن فيه مشاكل ومش هننكرها لكن احنا بنعمل ان كل الازمات دي ما تتكررش تاني في المستقبل يعني معنى كلامه مش هيكون فيه ازمة دولار ولا تضخم وارتفاع اسعار تاني ولا أزمات من النوع التقيل.
وفي وسط كلام رئيس الحكومة قال جملة محدش ركز فيها وهي إن اللي جاي أحلى وأفضل وخير وكتير مركزوش فيها وقالوا إن الدكتور مدبولي بيصبر الناس وخلاص عشان أزمات ارتفاع الاسعار الاخيرة للمواد البترولية والمواصلات والكهربا لكن بانكير فضل ورا الجملة وفتش ودور ولغاية ماوصل لمفاجأة من العيار التقيل هتقلب موازين الاقتصاد المصري .
ياترى ايه هي المفاجأة دي وليه الحكومة مكتمة عليها؟
شوف ياسيدي المعلومة الاكيدة معانا إن فيه صفقة من العيار التقيل وهتزيد على صفقة راس الحكمة كمان وهتوصل قيمة استثماراتها الاولية وخلي بالك من كلمة الاولية دي لـ40 مليار دولار .. أيوا زي ما حضرتك سمعت كده 40 مليار دولار والتفاصيل بتقول إنها هتكون بردو في الساحل الشمالي ومشروع ترفيهي وسياحي صناعي تجاري وفنادق وسوق حرة وبراندات عالمية وليلة كبيرة.
المعلومات بتقول إن الصفقة على وشك الاعلان وهتكون مع دولة خليجية وهنسيب لحضراتكم تربطو الاحداث وزيارة الضيف الكبير الخليجي اللي كان في مصر والصفقة اللي بنتكلم عليها تقريبا خلصت من كل التفاصيل وفاضل على الاعلان في الوقت المناسب وهتكون قريب جدا ودا كان سبب كلام الدكتور مصطفي مدبولي إن اللي جاي أفضل.
عشان تصدق ان اللي جاي أفضل رغم ازمة رفع الدعم جزئيا عن البنزين والسولار والكهربا وتذاكر السكة الحديد نحب نقول لحضرتك إن فيه موجة استثمارات خليجية ضحمة جاية في الطريق بدأت بزيارة الشيخ محمد بن زايد رئيس الامارات العربية الشقيقة للعلمين الجديدة والمباحثات الهامة اللي أجراها مع الرئيس السيسي وكمان الزيارة تزامنت مع زيارة مسئول سعودي كبير أعلن فيها إن فيه تعاون كبير في الايام الجاية بين مصر والسعودية في مشروعات كتير منها صناعة البترول وأعلن كمان إن المملكة بصدد تحويل الودايع بتاعتها في مصر واللي بتزيد عن 10 مليار دولار الى استثمارات في مصر يعني البنك المركزي هيشيل من على كتافه هم سداد المبلغ الكبير لأنه خلاص هيتحول لمشروعات سعودية في مصر.
صفقة القرن اللي جاية والاستثمارات السعودية الجديدة معناها إن هيكون فيه وفرة كبيرة في الدولار وقتها وده هينعكس على قوة الجنيه واسعار كل السلع في الاسواق.