بيوصل 8 مليون جنيه.. تفاصيل قروض السيارات الكهربائية في 5 بنوك
سمعت عن السيارات الكهربائية الحديثة اللي نزلت مصر ونفسك تشتري واحدة لكن العين بصيرة والايد قصيرة.. متقلقش هنقولك على طريقة تشتري العربية اللي بالكهربا وكمان زيرو ومن غير ما تدفع ولا مليم.. شوف الفيديو دا للأخر وانت هتعرف التفاصيل كلها
بعد ارتفاع اسعار البنزين والسولار في اليومين اللي فاتوا وتوقعات بارتفاعات جديدة في الطريق بعد إعلان الحكومة إلغاء كل الدعم على المواد البترولية بالتدريج على مدار الشهور الجاية ناس كتير فكرت تغير عربياتها من بنزين أو غاز إلى عربية بتمشي بالكهربا عشان توفر تمن البنزين وترحم نفسها من الزيادات في الاسعار كل شوية وكمان الناس اللي لسه ناوية تشتري عربية بتفكر تجيب عربية بالكهربا وزيرو وخاصة إن العربيات الكهربائية دلوقتي بقت هي المستقبل في العالم كله وسنين قليلة هتنافس العربيات اللي شغالة بالبنزين.
ولأن العربيات الكهربائية بتنتشر بسرعة في مصر عدد كبير من البنوك العاملة في مصر قررت منح تمويل السيارات الكهربائية لمواكبة المتغيرات العالمية بتمويل منتجات مستدامة غير ملوثة للبيئة ومع زيادة الاقبال عليها في السوق المحلية وبداية انتاج أعداد كبيرة منها في السوق المصري.
بانكير عمل جولة سريعة في أهم البنوك اللي بتقدم تمويلات للسيارات الكهربائية ومنها بنوك التجاري الدولي CIB وفيصل الإسلامي، والقاهرة، وQNB الأهلي وHSBC".
ومن جولتنا عرفنا إن البنوك دي بتيح قروض السيارات الكهربائية للموظفين بالقطاعي العام والخاص بضمان الراتب وأصحاب المهن والأعمال الحرة.
طيب إيه هي شروط قرض أو تمويل السيارة الكهربائية من البنوك دي؟
شوف حضرتك عادة بتوافق البنوك على قرض السيارة الكهربائية بعد استيفاء الأوراق المطلوبة زي..
عرض بسعر السيارة من معرض معتمد.. وشهادة إثبات دخل من جهة عمل العميل، وإيصال مرافق حديث، وصورة من الرقم القومي... وهنشرح لحضراتكم شروط وتفاصيل قرض السيارة الكهربائية من كل بنك.
الأول بنك فيصل الإسلامي
بتوصل قيمة التمويل فيه إلى 1.5 مليون جنيه كحد أقصى.
فترة السداد 10 سنوات.
سعر العائد يزيد 2% عن سعر العائد لدى المركزي ليسجل 30.25% سنويا على أساس متناقص.
وبخصوص المصروفات الإدارية البنك بيخصم 0.5% من إجمالي قيمة القرض مرة واحدة.
سن العميل: من 21 إلى 65 سنة كحد أقصى.
الدخل الشهري لا يقل عن 1500جنيه كحد أدنى.
وفي بنك HSBC
بتوصل قيمة التمويل 3 ملايين جنيه كحد أقصى.
فترة السداد 7 سنوات.
سعر العائد يبدأ من 30% سنويا على أساس متناقص ويرتفع حسب نوع وظيفة العميل.
المصروفات الإدارية يتم تحديدها مع مدير الفرع.
سن العميل من 21 إلى 65 سنة.
الدخل الشهري لا يقل عن 3 آلاف جنيه.
أما في البنك التجاري الدولي CIB
فقيمة تمويل شراء السيارة الكهربائة بتوصل 8 ملايين جنيه.
فترة السداد على 8 سنين.
سعر العائد من27 % إلى 36% سنويا على أساس متناقص.
المصروفات الإدارية يخصم البنك 1% من إجمالي قيمة القرض.
سن العميل من 21 عاما إلى 65 عاما.
الدخل الشهري لا يقل عن 3 آلاف جنيه.
أما في بنك QNB الأهلي
فقيمة التمويل بتوصل مليون جنيه.
فترة السداد على 7 سنين.
وسعر العائد يتم تحديد مع مدير الفرع ويتباين من عميل إلى آخر حسب نوع الوظيفة، ومدة سداد القرض.
المصروفات الإدارية بيتم تحديدها مع مدير الفرع.
سن العميل: من 21 عاما إلى 60 سنين.
الدخل الشهري لا يقل عن ألف جنيه.
وأخيرا في بنك القاهرة
بتوصل قيمة تمويل شراء السيارة الكهربائية إلى 8 مليون جنيه.
فترة السداد على 7 سنين.
سعر العائد يختلف من عميل إلى آخر حسب نوع الوظيفة وفترة سداد التمويل.
المصروفات الإدارية بيتم تحديدها مع مدير الفرع.
سن العميل من 21 عاما إلى 65 سنة.
الدخل الشهري لا يقل عن 5 آلاف جنيه.
