تصريح صندوق اللي محدش خد باله منه.. إيه اللي هيحصل في سعر الفايدة

ايه اللي هيحصل في سبتمبر اللي جاي وهل البنك المركزي ناوي على رفع سعر الفايدة تاني وإيه دخل صندوق النقد بقرار لجنة السياسة ولو الفايدة رفعت ايه اللي هيحصل.. خليكم معانا للأخر وهنعرف التفاصيل في الفيديو ده.

طبعا كلنا عارفين إن صندوق النقد الدولي وافق على صرف الشريحة التالتة من القرض المصري وده بعد انتهاء المراجعة التالتة اللي الصندوق بيعملها قبل ما يصرف اي شريحة عشان يتأكد من تنفيذ برنامجه مع الحكومة المصرية.. وبعد الموافقة على صرف الشريحة التالتة بقيمة 820 مليون دولار خرجت رئيسة بَعثة صندوق النقد الدولي إلى مصر إيفانا فلادكوفا هولار، وركز معانا حضرتك في كلامها لأن فيه كلام وسط السطور لازم نخلي بالنا منه كويس جدا .. الست فلادكوفا قالت  إنه هيتم إجراء المراجعة الرابعة بموجب الاتفاق الموسع في إطار تسهيل الصندوق المدد لمصر بين سبتمبر وديسمبر 2024، ودا هيسمح للحكومة المصرية بسحب حوالي 922.8 مليون وحدة حقوق سحب خاصة مايعادل 1.3 مليار دولار... طيب كويس وقالت ايه؟... مسئولة بعثة الصندوق رجعت وقالت إن تنفيذ سياسة ملكية الدولة خطوة ضرورية لتعزيز دور القطاع الخاص، مع أهمية خلق مناخ اقتصادي عادل يعزز المنافسة، ويتيح للشركات الخاصة التنافس بحرية مع الشركات الحكومية، وإن البرنامَج الذي تنفذه الحكومة المصرية تضمن تدابير لتسهيل الإجراءات الجمركية والتجارة، استجابة لمطالب القطاع الخاص، وإن الصندوق هيواصل دراسة المزيد من الإجراءات لتعزيز مساهمته في النمو الاقتصادي وإنه بالرغم من الجهود المبذولة، لكن لسه التضخم بيمثل تحدي كبير، مما يستدعي سياسات تتجاوز الأبعاد الاقتصادية ودي النقطة المهمة اللي في كلام مسئولة صندوق النقد إن معدلات التضخم لسه في مستويات عالية رغم انخفاضها في يونيو ومايو اللي فاتوا وتثبيت المركزي للفايدة.

خطورة تنبيه صندوق النقد على ارتفاع نسب التضخم بيقول إن لجنة السياسة النقدية بالبنك المركزي هتتجه الى رفع سعر الفايدة على الاقراض والايداع في اجتماعها الجاي في 5 مارس.. طيب ايه المشكلة؟.. اكيد رفع سعر الفايدة ودي احتمال كبير جدا يحصل بعد ارتفاع اسعار البنزين والسولار معناه إن تكلفة الاقتراض من البنوك هتزيد أكتر ودا هيضرب مصالح المقترضين الكبار زي الشركات والمؤسسات واصحاب المشروعات والمصانع وبالتالي تكلفة المشروعات هتزيد وهيحصل تضخم من ناحية تانية وغير ان ده ممكن يعطل المشروعات ويرفع اسعار التكلفة زي ماقلنا لأن شركات كتير بتعتمد على التمويل البنكي.. كمان هيكون فيه مشكلة مع المواطنين اللي محتاجين تمويل عادي لكن تكلفة الاقتراض هتخليهم يراجعوا نفسهم.. وبعدين تلميح صندوق النقد عن التضخم وإنه تحدي كبير وإن فيه ابعاد تانية لازم تتعالج بعيد عن الأبعاد الاقتصادية فيه شي كبير من الغموض ومقالش إيه الاجراءات اللي ممكن الحكومة تواجه بيها التضخم لكن الصندوق بيقول كلام كتير بين السطور زي ماقلنا لكن بيكون ليه رسايل واضحة عن اللي جاي.