بعد رفع أسعار البنزين والسولار.. صدمة جديدة للمواطنين

 
 
الغاز والبنزين واحد من اهم الحاجات اللي متعلقة بخدمات كتيرة قوي المواطن عايزها بشكل يومي، واحد من اهم الخدمات دي هو العيش بانواعه وخصوصا العيش السياحي.. يا تري هل اسعار العيش السياحي هتزيد في الايام اللي جاية.. ولو زاد اسعاره هتكون كام

زيادة اسعار الخدمات الاساسية والسلع اللي بتقدمها الحكومة زي البترول والغاز البنزين والكهرباء وغيرها بتترتب عليها زيادات كتيرة في اسعار حاجات تانية خصوصا الخدمات اللي بيقدمها القطاع الخاص واللي بتكون معتمدة علي اسعار الخدمات الحكومية زي العيش السياحي واللي سعره بيكون مرتبط باسعار الدقيق والسولار اللي بتقدمهم الحكومة للمواطنين.
وطبعا زي ما احنا عارفين أن لجنة تسعير المواد البترولية قررت زيادة اسعار السولار البنزين من 48 ساعة وتحديد الخميس اللي فات، وطبعا الزيادة دي هيكون لها انعكاس علي كل الخدمات سواء بقي النقل والمواصلات واسعار الخضروات والفاكهة واسعار الدقيق وغيرها من الخدمات اللي بيكون النقل عنصر اساسي في وصولها للمواطن .
طيب اية اللي هيحصل في اسعار العيش السياحي الفترة اللي جاية؟.
خلال الـ48 ساعة اللي فاتوا، كل الكلام عن اسعار العيش السياحي والعيش الفينو هيوصل سعرهم لكام بعد الزيادة وهل زيادة اسعار الوقود والسولار هترفع اسعارهم ولا هيتم الابقاء علي الاسعار الحالية، ولو الاسعار ارتفعت متوقع سعر الرغيف سواء بقي عيش سياحي ولا عيش فينو يوصل لكام.
عبد الله غراب رئيس الشعبة العامة للمخابز بالاتحاد العام للغرف التجارية، اتكلم عن تأثير رفع أسعار السولار والبنزين على الخبز المدعم والسياحي، وقال إن سعر رغيف الخبز المدعم مش هيتحرك بعد زيادة أسعار السولار، وده بسبب أن وزارة التموين هي اللي هتتحمل فرق سعر التكلفة عن أصحاب المخابز.

رئيس شعبة المخابز بالاتحاد العام للغرف التجارية اتكلم كمان وقال أن الفترة اللي جاية هيحصل زيادة قليلة في أسعار العيش الحر السياحي ووصف الزيادة ان الواطن مش هيحس بيها قوي.
طيب اية اخبار العيش المدعم اللي المواطن بيشتريه علي بطاقات التموين وهل اسعاره هتزيد هيا كمان بعد زيادة اسعار البنزين والسولار ولو زاد سعره هيوصل لكام؟.
الدكتور شريف فاروق وزير التموين والتجارة الداخلية اتكلم علي تاثير تحريك اسعار السولار والبنزين علي العيش المدعم وقال أنه مش هيتم المساس باسعار العيش المدعم واسعاره هتفضل زي ما هي، وهتفضل اسعار علي بطاقات التموين بـ 20 قرشا للرغيف، والمواطن هيفضل يحصل علي العيش المدعم بسعره الحالي دون اية زيادة جديدة علي الأسعار، وان الدولة ممثلة في الهيئة العامة للسلع التموينية التابعة لوزارة التموين والتجارة الداخلية هيا اللي هتتحمل فرق تكلفة الإنتاج العيش المدعم اللي بتقدمه الافران البلدية للمواطنين، وهيتم سداد فروق الزيادة الجديدة في صورة دعم نقدي من الدولة لاصحاب الافران، خصوصا ان للدولة طول عمرها في صف المواطن المصري، وبتدعمه علشان يواجه ارتفاع الأسعار.