ليه الحكومة ماسكة في صندوق النقد وبتشيل الدعم وتزنق الناس

ليه الحكومة مصرة تسمع كلام صندوق النقد الدولي وتنفذ شروط وليه بتشيل الدعم وصعب على الناس حياتها وليه الحكومة بتجيب لنفسها الصداع والمشاكل لغاية عندها وإيه بديل صندوق النقد الدولي.. تابعونا في الفيديو ده وهنعرف التفاصيل
 

من يوم الخميس والناس عايشة في حكاية رفع اسعار البنزين والسولار ما بين جنيه ونصر و2 جنيه وبعدها طبعا كل حاجة زادت زي المواصلات وأسعار الخضروات والمحاصيل وكل اللي علاقة باستخدام البنزين والسولار وهنا الناس بدأت برودوا تسأل هو ليه الحكومة ماشية ورا صندوق النقد الدولي وليه سمعت كلامه وبترفع الدعم عن الكهربا والمواد البترولية وحتي العيش الحاف بتاع التموين..

في الاول خلونا نوضح حاجة .. أي اتفاق مع صندوق النقد الدولي واي دولة حتي بخلاف مصر بيكون فيه اتفاقية الدولة اللي بتصيغها تقريبا وبتقول أنا عاوزة قرض وليكن مثلا مليار دولار وهلتزم بالسداد وهعمل خطوات واحد واتنين وتلاتة يعني الدولة بتلتزم قدام الصندوق إنها هتدفع اقساط القرض بالفوايد وفي نفس الوقت هتعمل اصلاحات اقتصادية عشان الصندوق يضمن إن فلوسه ترجعله يعني الصندوق مش بيفرض عليك حاجة غير إنه طبعا بيستغل حاجتك للمال عشان تحل أزمة بلدك الاقتصادية وعادة محدش بيروح الصندوق غير الدول المزنوقة أو اللي عندها أزمات اقتصادية كبيرة.
طيب ليه مصر راحت الصندوق الدولي عشان تستلف منه؟
الاجابة على السؤال ده فيها تفسير لكل اللي بيحصل في مصر من سنين طويلة وهي الاقتراض الكبير والمستمر من الخارج وهي أن البلد مفهاش ايرادات دولارية ضخمة توازي احتياجاتها من النقد الاجنبي بمعني إن مواردك الدولارية في أفضل احوالها من قناة السويس والسياحة والتصدير والتحويلات والاستثمار لسه موصلتش لمرحلة تحقيق الوفرة الدولارية الكبيرة اللي تساوي قيمة الاستيراد وسداد اقساط الديون القديمة وفي نفس الوقت تلبية مستحقات الشركات الاجنبية وغيرها .. يعني ببساطة عشان انت دولة معندكش دولار وفير فانت مضطر تروح تستلف من الصندوق وتخسل لو انت بتصدر مثلا زي تركيا ولا حتي فيتنام ب300 مليار دولار في السنة مكنتش هتتحوج لصندوق النقد الدولي ولا غيره من مؤسسات التمويل الدولية وده غير إن الموارد الدولارةية في مصر فيها أزمات خطيرة كانت السبب في انخفاضها بشكل كبير على مدار 2023 وبداية 2024 زي انهيار ايردات قناة السويس بسبب الاحداث في البحر الاحمر وازمات السياحة بسبب الصراعات في المنطقة ولسه معندناش أرقام كويسة في الصادرات وحتى تحويلات المصريين كانت شبه واقفة في الشهور اللي فاتت قبل قرار التعويم.. يعني مواردك الدولارية كانت مفيش وانت محتاج دولار بأي شكل فكان لازم تاخد قروض وبالتالي ترضي باللي اتفقت عليه مع الصندوق يعني الحكومة في حكم المضطر انها تستلف من الصندوق عشان معندهاش بديل يلبي احتياجاتها من الدولار.
طبعا ترشيد الدعم ورفعه بالتدريج كان شرط محوري في اتفاقية صندوق النقد وفي نفس الوقت محاولة للوصول لنقطة التوازن في اسعار الوقود محليا وعالميا وفي نفس الحكاية في قطاع الكهربا واللي الحكومة بتستعد ترفع جزء من الدعم عنه.