لغز الدولار الغامض.. سر ارتفاع سعر العملة الأمريكية فى البنوك
يا ترى ايه سر عودة ارتفاع الدولاؤ من جديد فى البنوك؟ وازاى سعر العملة الأمريكية ارتفع 18 قرش مرة واحدة فى التعاملات الأخيرة؟ وهل كده ممكن ترجع السوق السودا من جديد؟
فى التعاملات الأخيرة ارتفع سعر الدولار الى مستويات كبيرة وصلت الى 48 جنيه و35 قرش فى بعض البنوك بزيادة 18 قرش فى سعر الدولار الواحد مرة واحدة وده يعتبر اعلى سعر للعملة الأمريكة من بعد استقرار سوق الصرف وده خلا ناس كتير تبدأ تتكلم عن عودة السوق الموازية والمضاربة على الدولار وسط كلام كتير عن شح العملة وعدم قدرة البنوك على توفير احتياجات المستوردين
فيا ترى الكلام ده حقيقي فعلا؟
فى البداية كده لازم نكون عارفين ان اللى بيحصل فى سوق صرف العملات الأجنبية طبيعى جدا يعنى ممكن النهاردة تلاقى الدولار اتحرك لفوق وبكره تلاقيه انخفض لأن مصر من بعد 6 مارس بتطبق نظام سعر صرف مرن بيتم تحديد قيمة الجنيه بناء على قوانين العرض والطلب وحاليا فيه طلب كبير على الدولار وبالتالى متوقع السعر يرفع لكن الارتفاع لسه فى الحدود الآمنة ومفيش قفزات كبيرة تخليك قلقان ولا خايف من عودة السوق السودا زي ما ناس كتير بتحاول تنشر اشاعات عن عودة المضاربات على العملة الأمريكية يعنى باختصار اللى كان بيحصل قبل كده مش هيكون مسموح بيه تانى
طب ليه اصلا سعر الدولار بيزيد فى الفترة الأخيرة ؟
بص يا سيدي البنك المركزي رفع سعر شراء الدولار والبنوك هي كمان سعر البيع والشراء ووصل أعلى سعر للبيع 48.35 جنيه للدولاروأعلى سعر للشراء 48.25 جنيه للدولار..وعملية الرفع والزيادة دي، لازم تتعود عليها الفترة دي، وخاصة أخر كل أسبوع، لسببين، أولهم ده وقت استحقاق، أذون وسندات خزانة أجنبية، فلازم أرفع وعشان أغريه يرجع تاني..وتاني حاجة وأهما انه نظرًا لحاجات كتير هنحصل في المستقبل في مصر فالبنك المركزي المصري بيتوسع في شراء الدولار يعني بيحتاط وبيزود إحتياطيه اللى هيستخدمها فى مشروعات وملفات مهمة جدا الشهور الجاية.
وطبعا فيه اسباب تانية ورا الارتفاع أولها زيادة الطلب على الاستيراد خصوصا مع بدء موسم استيراد جديد ساهم في الضغط على سعر صرف الدولار، وكمان التوترات الجيوسياسية في المنطقة أثرت بالسلب على عوائد قناة السويس وده قلل من تدفقات الدولار وأثر على سعر صرفه بالإضافة كمان ان ارتفاع الدولار بيعكس التزام البنك المركزي بتطبيق سياسة العرض والطلب في تحديد سعر الصرف وده بيؤدي إلى تقلبات طبيعية في السوق
