بأوامر مباشرة من السيسي.. شوف الحكومة هتعمل إيه الفترة الجاية في الملفات الصعبة

طبعا كلنا شوفنا تابعنا التشكيل الحكومي الجديد والاسعار اللي اختارها الدكتور مصطفي مدبولي لتولي الحقائب الوزارية.. يا تري اية هو اهم النقاط اللي في برنامج الحكومة لحل مشاكل الدولة.. والحكومة هتعمل اية في الملفات الاقتصادية.

الحكومة الجديدة اللي شكلها الدكتور مصطفي مدبولي واللي مضت عدد كبير من الوزراء واللي اغلبهم مش معروفين للشعب المصري، واغلب الشعب دلوقتي لما بيسمع اسم وزير من المجموعة الوزارية الجديد بيقول مين الوزير ده وتاريخه اية علشان يتولي منصب وزاري زي ده .
الاسماء الجديدة اللي حلفت اليمين الدستورية قدام الرئيس عبدالفتاح السيسي في الحكومة الجديدة، الدكتور مصطفي مدبولي رئيس مجلس الوزراء طلع واتكلم عليها وقال انه بيراهن عليهم وعلي نجاحهم في ادارة ملفات الحكومة خصوصا انهم كلهم عندهم رؤية وخطط لتطوير العمل الإداري والخدمي اللي هتقدمه الوزارات للمواطنين وخصوصا في الملفات الخدمية والاقتصادية واللي كل التركيز عليهم في الفترة الرئاسية الجديدة خصوصا ان هدف القيادة السياسية والحكومة في الفترة الرئاسية الحالية هيا زيادة واتاحة الخدمات اللي بتقدمها الدولة للمواطنين .
طيب ايه اللي هتقدمه الحكومة للمواطنين في الفترة الرئاسية الجديدة واية هيا مستهدفات العمل الحكومي في الفترة الحالية؟.
الدكتور مصطفي مدبولي طلع واتكلم وقال أن الملفات الخدمية هيا اللي هتاخذ اولويات الحكومة في الفترة الرئاسية الجديدة وعلشان كده اول اجتماعين عملهم كانوا مع وزراء التموين والمالية والكهرباء والبترول والثروة المعدنية علشان الوزارات دي مطلوب منها حل مشاكل ارتفاع اسعار السلع وحل مشكلة تخفيف الأحمال وقطع الكهرباء اللي بيحصل علي كل البيوت المصرية.
طيب اية هيا مستهدفات الحكومة في الفترة الرئاسية في الملفات الاقتصادية ؟.
الملفات الاقتصادية واحد من اهم واقوي الملفات واللي هتاخذ شغل كتير جدا من الحكومة الجديدة خصوصا ان مصر علي مدار شهور طويلة فاتت كانت بتعاني من ازمات كبيرة في توفير الدولار والعملات الاقتصادية بشكل كامل، دي كانت ازمة بتهدد الاقتصاد المصري بشكل عام، وكانت السوق السودا في التجارة بالعملة بتهدد الاقتصاد المصري بشكل كلي قبل التدخل الجراحي اللي عملته الحكومة بتوقيع عقود الاستثمار السياحي في راس الحكمة واللي كانت الضربة المهمة لتعديل مسار الاقتصاد المصري بشكل كامل .
الحكومة في الفترة الرئاسية الجديدة ووفقا للبرنامج اللي قدمته لمجلس النواب بتستهدف زيادة متوسط النمو السنوي للإيرادات العامة لـ 17.4% وخفض عجز الموازنة لـ 6.6% وزيادة معدلات النمو الاقتصادي لـ 5.5%، وتحقيق فائض أولي بنسبة 3.3% من الناتج المحلي الإجمالي، وخفض معدلات البطالة لـ 6.5%، وتحقيق الاكتفاء الذاتي من القمح بنسبة 53%، وزيادة قيمة الصادرات لـ 130 مليار دولار، وزيادة الإيرادات السياحية  إلى 17.1 مليار دولار، وزيادة نسبة الاستثمارات الخاصة من إجمالي الاستثمارات إلى 51%، ده غير تامين احتياجات السوق المحلية من السلع والقمح اللازم لتامين غذاء المواطنين .